【猛鬼街忠粉唔會知!】導演Wes Craven4套經典影響全球恐怖片

電影

廣告

猛鬼街導演,有一代鬼王之稱嘅 Wes Craver尋日喺洛杉磯與世長辭,呢位鬼王生前拍過無數咁多套經典恐怖片,令7、8、90後留下無數美好…sorry,應該係恐怖嘅回憶。不過我諗大家都只係知佢拍咗猛鬼街,最多加埋《奪命狂呼》,佢啲恐怖片「猛」到影響埋香港甚至全世界!其實就係靠以下4招放入4套經典入面!

text-專題組

1. 《The Last House On The Left ,1972》 灑鹽花

鬼王出道作品,亦係成名之作,世界10大禁片之一,公路slash movie電影始祖,cult友成日將佢同另1套被強姦復仇cult片《I Spit On Your Grave》比較。但論raw、原創性、同鹹鹹地程度,《I Spit on your grave》絕對輸足9條街,就連我哋香港cult片《山狗》都係向呢套片致敬。

電影講兩個唔識死鄉下妹出城睇演唱會,好不幸撞到班強姦殺人魔,結果梗係被輪姦狎玩再殘殺。片中多幕強姦、性虐片段,鹹得嚟唔單止唔會令你興奮,重會睇到好唔舒服,不過尾段媽媽用口咬甩狂魔gg實在大快人心…死嘞,我係咪好變態?

即睇殺人片段:

2.《The Hills Have Eyes,1977》(港譯:《隔山有眼》,2006重拍版譯《深山大屠殺》) 玩血腥

擁有雙雙雙碩士學位嘅鬼王,曾經喺大學教人文學,佢嘅電影好多時都表達咗佢對人性嘅睇法。好似《The Last House On The Left》同《隔山有眼》,就係佢探討善良嘅人如果遇到極端暴力嘅情況下會點?當然係以暴易暴,鬼王嘅電影,畫面有一半時間都係紅色,受害者嘅死法亦極之血腥,通常都腸穿肚爛。

《隔》片比《The Last House On The Left 》玩得更盡更血腥:一個家庭諗住開開心心去旅行,點知又咁唔好彩遇到以人肉為食嘅變種人魔一家,最後當然又係以暴易暴,玉石俱焚。呢套戲最後香港梁普智導演拍嘅《生死線》亦係向呢套戲致敬!

即睇全片:

內容延讀:

史上最強!50億像素自拍澳洲旅遊景點

識條鐵咩 METAL GEAR蛇叔義肢夠嚇鬼

3.《A nightmare on ELM Street,1984》 (港譯:猛鬼街) 捉深層恐懼

呢套唔使我多介紹,係鬼王嘅代表作。擁有心理學同哲學學位嘅鬼王,將人類潛意識中最深層嘅恐懼同夢境完美結合。佢創作嘅被燒到爛面、手戴五指刀手套嘅夢魔Freddy Krueger絕對係恐怖片史上最powerful嘅icons之一,更有一班忠實嘅Freddy Krueger cosplayers,就連我哋黃秋生都扮過佢0架!

 

即睇Freddy凶殘殺人片段:

4.《Scream,1997》(港譯﹕《奪命狂呼》) 玩估兇手

鬼王第2個事業高峰,《奪》嘅成功係因為電影內除咗賣血腥靚女外,再加上希治閣式「誰是兇手」偵探元素,成班觀眾一齊做偵探搵兇手,大家都睇得更投入。

《奪》片嘅成功,引發咗之後嘅千禧校園驚慄片潮,《舊年暑假搞乜鬼》、《奪命高校》、《Urban Legend》等利用相同「搵兇手」模式嘅校園片幾乎同一時間開拍,票房亦有番咁上下。鬼王之後重拍咗3套《奪》續集,當然第1集最好睇,尤其係初段Drew Berrymore被掏乾內臟,真係睇到想嘔。

There are 4 comments

Add yours

Comments are closed.