《新Monday》獨家教學! Dim Cook Guide易整七彩米通

好多港男話,做運動嘅女仔加10分。相對地喺港女心目中,識煮嘢嘅男仔都會加好多分。尤其香港社會個個掛住搵食,邊有時間慢慢上堂學煮嘢?所以好多人會上YouTube睇教學片,邊學邊煮慳時間,咁樣亦造就咗一批靠煮嘢食上位嘅YouTubers。
好似上年2月喺YouTube開channel「Dim Cook Guide」嘅Martin,因為佢拍嘅片精緻簡單,所以開台年幾,就已經有超過12萬4千人訂閱。佢話自己能夠突圍,全因1個字——「懶」。

text – Jessie photo – Billy

初學者教初學者

睇Martin嘅煮嘢食片似模似樣,以為佢係經驗豐富嘅大廚,點估到原來係煮食初哥。「我冇正式學過廚,只係閒時會整啲好簡單嘅食物,擺到落肚就得。」Martin話佢本身嘅職業工作都需要拍片、影相,雖然煮嘢食唔叻,但就好鍾意研究,咁就萌生咗將兩樣夾埋一齊嘅念頭。
「每次拍新菜式,都係由零開始自己試出嚟,所以我整到嘅食物,基本上人人都可以成功做到。比起其他專業級整嘢食YouTubers,我嘅優勢係我煮啲嘢好易上手,過程十分簡單。我又會預先諗材料點樣可以易買啲、點樣易整啲,同埋點樣可以好睇啲嚟擺上網呃like,哈哈。」

 

獨家整七彩米通

Martin專登為我哋示範咗個好簡單嘅小食——七彩米通。

材料:
棉花糖 150g
早餐卜卜米 150g
冇鹽牛油 60g
朱古力粒 50g

先將牛油同棉花糖煮溶,再加入卜卜米撈勻。

趁重熱,將七彩朱古力粒鋪上面壓實佢,放入雪櫃雪半個鐘。

之後就可以攞出嚟切件同埋品嘗!

 
內容延讀:

都係唔想自己煮?睇下JAMIE ITALIAN尖咀新店啱唔啱心水

睇埋同樣喺尖咀開新分店嘅一蘭

盡量簡化

Martin拍嘅教學片最大特色係簡單,佢話只要你係正常人,就一定煮到。「我嘅觀眾都係後生仔女,好少會煮一家人嘅傳統餸菜,佢哋想整啲喺街邊可以買到嘅潮流食物,例如最流行嘅乜乜蛋糕或者小食。我嘅煮食示範都係呢個方向,會上網搵食譜,再自己改良到以最簡單、最少步驟嘅整法,就算材料都一定喺超市買到,唔會要你山長水遠去某某材料店買。
「例如木糠布甸,我簡化到只係用夾心餅『Oreo』同淡忌廉就做到,我諗喺YouTube教煮嘢食嘅人之中,目前只有我會懶到咁!我平時都係唔鍾意浪費時間嘅人,就好似我搭lift,我係入咗去撳閂門掣先會撳幾多樓,1秒都唔會浪費。」

 

以下呢款木糠布甸,被Martin簡化到只要兩種材料就整到。「因為平時整開嘅係唔會用埋Oreo中間啲餡,我就諗如果用埋佢哋,咁咪可以減少用雲呢拿油、糖、煉奶等材料,因為都係用呢啲材料整出嚟嘅啫,咁就慳番好多材料!」

最近風靡萬千港人嘅台式三文治,Martin即時試食同搵資料,並研究出製作方法,等大家可以自己喺屋企都整到嚟食。


以下呢條係channel中暫時最受歡迎嘅教學片,有超過30萬7千個views。「我知道cheesecake好多人跟住整,吸引到人睇同試整,其實我已經覺得係成功。而觀眾試完,成功整到,重可以攞出去同朋友分享,得到讚賞,我就好滿足。」

 
內容延讀:

都係唔想自己煮?睇下JAMIE ITALIAN尖咀新店啱唔啱心水

睇埋同樣喺尖咀開新分店嘅一蘭 率先解構

似《復仇者聯盟》

除咗簡單,Martin話拍整嘢食片,最緊要「穩中求變」。「例如整嘅嘢食可以次次唔同,不過觀眾就接受唔到啲片嘅style成日有大轉變,好似背景音樂佢哋聽慣咗,都唔鍾意你突然轉咗佢。我都要從中取得平衡,要有改變得嚟又唔好太多。就好似電影《復仇者聯盟》啲主角,都唔可以突然成批換過晒,只能慢慢加新角色入去,擦出新火花。」
就係為咗有新花火,Martin間中會轉下片中graphics,近期又加多咗位女拍檔Cherry。「多個人,做嘅嘢就可以多元化啲,我冇理由成日都自己同自己講嘢㗎嘛,多個人同我對答,生動啲。而且從女仔嘅角度去睇又會好唔同,譬如佢會知女仔鍾意配合唔同節日、季節,整啲乜嘢菜式送俾朋友或另一半,同觀眾更接近。」

 

早前Martin同Cherry一齊幫百福豆腐拍煮食教學宣傳片。「去到超級市場個貨架前,嘟QR code就可以睇到條片。自己一向就只係喺YouTube呢個平台玩,原來重可以有好多唔同嘅變化,感覺幾得意。」

賣廣告唔突兀

喺香港做YouTubers,就要面對網上嘅haters,佢哋好憎YouTubers置入式廣告hard sell,又或稍為唔啱聽、唔好笑就狂插。Martin話佢好彩好少遇到呢啲問題。「YouTubers俾人感覺同大眾接近啲,就好似生活中嘅普通人咁,觀眾永遠唔會當你係演員藝人,感覺較親近。咁樣賣廣告,觀眾會覺得好怪,反應就會好大,大家會好反感。我都有拍過1、2個廣告,但冇乜厭惡性批評,因為啲廣告賣嘅食品材料,喺市面上根本得嗰幾隻牌子,甚至有啲只有1個牌子,冇乜選擇。我先天性有呢個優勢,就算賣廣告都唔會好突兀。

「再加上我教煮嘢食,target群好窄,唔鍾意嘅根本就唔會睇我嘅片。當然啦,咁樣相對自由度會細啲,我會被定型。一啲拍開搞笑片嘅YouTubers,佢哋紅咗後,拍咩類型片都會被觀眾接受,但如果我突然拍啲九唔搭八嘅片放上網,就會有人唔鍾意,因為我嘅觀眾係為咗睇整嘢食而嚟嘅。」

 

Martin拍過兩條片係講佢平時點拍啲煮食片出嚟,睇落簡簡單單,但其實係經多次試做先成功,就好似整爆谷咁,好似圖中整咗咁多先試到稍為滿意嘅製成品。

收入換食材捐出去

Martin話只要有時間,會維持1星期出1條片。「我而家都算上咗手,以前要試成十幾廿次先可以拍片,而家3至5次就已經得,預備過程短好多。我有傾過出書,但因為種種原因,所以暫時唔會出住。而家只會專心繼續拍片同之前一向做開嘅嘢:廣告片捐食物計劃。即係如果俾錢我拍廣告嘅廠商係生產食物如罐頭、麵粉嘅,咁我就會將佢哋俾我嘅製作費扣除成本,剩番嘅錢換做廠商嘅食品捐去慈善機構,例如之前我都試過捐午餐肉俾樂餉社。
「但如果廣告商唔係生產食物,又或者佢哋唔肯轉做食物,只肯俾現金,我就唔會捐出去,因為捐現金要好小心,錢銀好容易引起麻煩。關乎收錢嘅嘢我一定唔會做,所以我亦唔會幫網友代購,唔會賣嘢俾佢哋,費事煩!」

 

Cherry都開始有自己擔正嘅影片,教專門啲嘅知識,例如呢條就講解下梳打粉、泡打粉、糯米粉、粘米粉嘅分別。

https://www.youtube.com/watch?v=_-r79jbk0VY

 
內容延讀:

都係唔想自己煮?睇下JAMIE ITALIAN尖咀新店啱唔啱心水

睇埋同樣喺尖咀開新分店嘅一蘭 率先解構

YOU MAY ALSO LIKE ...

There are 4 comments

Add yours
  1. 新Monday / 食得又砌得!教你整吞得落肚嘅LEGO - 新Monday

    […] >整開有條癮,睇埋 DIM COOK GUIDE獨家教學七彩米通 […]

  2. 新Monday / 搶先食﹗台灣秒殺蝦叔叔原隻蝦零食登陸香港 - 新Monday

    […] >再教你整脆卜卜七彩米通 […]

  3. 新Monday / 今週末限定 D.I.Y.獨一無二合味道杯麵 - 新Monday

    […] >懶人D.I.Y. 即學七彩米通 […]

  4. 新Monday / 【想成為最強YouTuber必睇! 】1億點擊YouTuber Jason親傳秘招 - 新Monday

    […] >《新Monday》教你整 Dim Cook Guide易整七彩米通 […]


Comments are closed.