Ben Sir_feature

Ben Sir 8大語錄 教你撐廣東話

熱話

廣告

近幾年,香港的中文教育制度在「普通話教學」爭議一直不斷,而最近在《男人食堂》及《學是學非》大力撐廣東話的中大高級講師歐陽偉豪(Ben Sir),亦因此一炮而紅成為網絡紅人。這兩星期《男人食堂》停播,作為fans的你是否很想再聽Ben「講課」?我們與他做了個專訪,一起看看Ben Sir字字珠璣的語錄,以及重溫他在幕前的精彩演出教學!

text-Jessie photo-Tung、網上圖片

Ben Sir語錄1:「大學生不妨重考DSE,用作文挑戰教育局評分制度!」

Ben Sir教大家,保衛廣東話就要從行動做起,例如:「我成日都建議大學生可以去重考DSE中文科,既然都考咗上大學,就唔怕高定低分。用廣東話嚟考作文,做個實驗,就算最終唔合格,都有新聞價值!可以叫考評局解釋返點解會唔合格?點解粵語唔可以入文?或者大家都可以從其他地方慢慢試下用粵語嚟書寫,譬如我之前就用咗粵語嚟立租約,只要雙方同意、律師同意,就有法律效力。大學生都可以嘗試用粵語寫會章,一起用行動撐粵語!」

 

Ben Sir語錄2:「性教育夠必要,你唔擺佢上大枱?」

有關編簡體字入課程,Ben sir話冇必要,佢舉咗好多例子:「簡體字之前都冇擺喺課堂度學,我哋都識,咁點解要擺佢喺課堂度呢?除非你想佢正規化嘅啫!你話必要喎,性教育夠必要啦,你唔擺佢上大枱、擺上課程大綱?而家都冇人高呼簡體字難學,要你教。即使教育局話2002年已提出以『學生應掌握認讀簡化字的能力』為課程發展基本理念,只係而家啲人搵返嚟講,咁點解唔可以作出修改呢?如果講到咁咪刪咗佢囉,你又唔夠膽寫『使用繁體字為長遠目標』,既然唔夠膽,不如就索性全部刪除佢。」

 

Ben Sir語錄3:「見好唔應該收,好就再做好啲、去到盡!」

Ben sir話幕前演出多咗,雖然唔知會對中文、社會乜乜物物幫助有幾多,但以唔同方法推廣中文,總係好事。「有個人喺度噏下,有條友可以將本應好離地嘅學術嘢帶到幕前,又扮鬼扮馬,應該會係個衝擊。我哋嚟自文學院嘅學者,唔應該遠距離了解人文世界,要滲入人群。我都係用自己做實驗,試用唔同方法推廣中文,市場接受咪繼續囉!我覺得見好唔應該收,好就再做好啲、去到盡!直到大家睇厭咗我,我咪匿返去象牙塔。」

 

Ben Sir語錄4:「粗口人人都識,唔使教。」

「坦白講,有邊個唔識講粗口?你估佢哋(觀眾)真係期望Ben Sir會教到佢哋講粗口咩?就係想睇下我點用好幽默嘅手法演繹。如果過晒界咁將所有粗口字讀出嚟冇意思㗎,冇咗個深度。唔少人都覺得成件事好入屋,可以入到人心,容易被接受同受歡迎。」

內容延讀:
唔好蝕底!港鐵慳錢4大秘招
7點絕世好女朋友的條件 唐詩詠都唔夠揮?

Ben Sir語錄5:「普教中對學生中文程度冇顯著幫助,點解重要擴大個制度?」

「用普通話教中文,即使你(教育局)冇想取代粵語嘅心思,但的確實實在在令學生用粵語嘅時間少咗喎!學普通話唔係唔好,但要分返主次,可能有9間學校粵教中,先至有1間普教中,咁樣嘅比例先算合理,就好似英文中學嘅比例咁。而且最近嘅研究數據指出普教中對學生中文程度冇顯著幫助,咁點解重要擴大呢個制度?」

 

Ben Sir語錄6:講住先,唔使識寫㗎!

廣東話巴閉之處在於係由古字流傳落嚟嘅語言,保留咗入聲字p、t、k尾嘅字,而且更係香港人嘅母語,冇理由放棄。Ben Sir又話:「唔識寫粵語唔緊要,好多字都要查,但咪照講住先囉。要編製字典、統一寫法需時好長,唔應該停喺寫唔寫到嗰度。」

 

Ben Sir語錄6:棟篤笑係目前最能傳承粵語嘅口語技藝

「要引人笑好困難,如果可引到人笑即係代表運用嗰種語言用到好精要、深入、純熟。粵語可幫到棟篤笑具娛樂性、賺到錢,同時棟篤笑又可以好有力咁撐到粵語。除非你同我講你唔鍾意笑,或者聽慣英文普通話笑話啫。否則喺口語技藝之中,棟篤笑能產性又高,可以一直發展落去。」

 

Ben Sir語錄7:「粵語先至係可以進入睡房嘅朋友。」

「年輕人要保持競爭力,當然就係乜都要學。不過學外語都係為咗搵飯食,或者為咗睇多本書、打機、識下女仔咁解嘅啫。譬如你邀請朋友去屋企玩,唔熟溝通唔到嗰啲,留喺花園或廳就夠喇!熟嘅好朋友可能你先會招呼佢哋入到去睡房度參觀同玩。正如學外語當識多個朋友,對自己工作學業上又有幫助,冇乜所謂,不過就唔會好似粵語咁深交囉,始終我哋係香港人嘛,自己友係唔同啲!」

 

Ben Sir語錄8:廣東話玩味濃

「廣東話嘅玩味或者韻味好強,例如只係形容圓形,就可以講圓沽碌、圓『dum dum』、圓『dum the』,唔好理點寫,但總之有咁多個講法,普通話就冇。」

內容延讀:
唔好蝕底!港鐵慳錢4大秘招
7點絕世好女朋友的條件 唐詩詠都唔夠揮?

Ben Sir在2013年開始加入《學是學非》,作為其中一個中文教學單元《正字正確》的嘉賓主持。第一輯都還是《最緊要正字》的風格,到之後第2輯《學是學非》就開始大暴走,主要由Ben Sir自己構思決定每集主題,扮演《神雕俠侶》、《衝上雲霄》、《IQ博士》等不同的角色來教中文,超搞笑,絕對可引起大家的學習興趣。連創作都兼顧,你以為酬勞一定可觀!?Ben Sir直言,原來只有1隻 TVBuddy,但可能正因如此,反而自由度很大。大家一定要撐啦!

《神雕俠侶》楊過Ben Sir教「銷魂」

連楊過Ben Sir都演過!原來一開始節目組是要求Ben Sir做小龍女的,而且他都答應,不過後來反而是節目方面覺得要保護Ben Sir的學者形象,不要玩得太盡,而改為做楊過。演住《神雕俠侶》來教你「銷魂」、「低調」等字詞,真係冇得輸!

 

Ben Sir扮Juno「羅生門」

在眾多扮鬼扮馬的小短劇中,Ben Sir說通常都會先預想觀眾的反應。但這一集扮演Juno教「念念不忘」、「羅生門」等字,播出後大受歡迎是預料之外。重溫請去:www.facebook.com/tvbcom/videos/10153571970508449/

日式雜貨店 VILLAGE VANGUARD 暫別香港!! 3大抵買清貨品

Ben Sir笑場的粗口學堂

重溫Ben Sir《粗口學堂》中教你講粗口學中文!連他自己都講到忍不住講到笑場「口震震」,更何況觀眾。

 

Ben Sir笑談鹹片名

學中文不一定只是看書,原來從鹹片名都可以學到?真是長知識了!!!

早前於《新Monday》facebook都為大家介紹過一些特別的經典鹹片名>>>bit.ly/28ePFDo

https://www.youtube.com/watch?v=l3pIineaqGo

YOU MAY ALSO LIKE ...