《大時代》金句

《大時代》金句! 3位金句王丁蟹+方展博+陳萬賢你識幾多?

熱話

廣告

《大時代》金句|神劇《大時代》第N次重播,啲人仍一窩蜂咁追住睇,開場五蟹跳樓嗰幕更是令人印象深刻,今時今日睇仍覺非常震撼。當中劇集入面有大量金句,《大時代》金句你又識幾多?

《大時代》金句你識幾多?

《大》之可以成為神劇,內容精采兼有超強班底當然係主要因素,再加上劇中每集都有超爆金句,真係想唔贏都難。

我知我知,你對《大》嘅金句已經熟到爛吖嘛!但我死唔信你識得晒下面嘅金句囉。

丁蟹(鄭少秋飾)

今次金句大全以人物做分類。《大時代》最強金句王,丁蟹認第2,絕對冇人敢認第1(唔驚俾佢打傻咩)。呢條友狂躁、暴力、神經質,係個活喺自己世界,揸住自己成日搬龍門嗰套道德觀嘅黐線佬,由於咁破格,佢絕對係電視史上最經典嘅人物之一!

《大時代》金句
(圖片來源:TVB《大時代》截圖)
《大時代》金句
(圖片來源:TVB《大時代》截圖)

《大時代》金句1. 「人善人欺天不欺,人惡人怕天不怕。」

呢句嘢本來出自明代兒童讀本《增廣賢文》,意思大家都明啦,簡單講係行得正企得正就冇有怕。諷刺嘅係被完全零道德嘅丁蟹攞嚟做人生「座右銘」,成日用呢句說話話劉松仁飾演嘅方進新蝦佢,其實佢唔蝦人都算偷笑啦!

《大時代》金句
(圖片來源:TVB《大時代》截圖)

《大時代》金句2. 「14年喇阿玲,我哋足足嘥咗14年喇!唔好再玩啦!」

丁蟹認為藍潔瑛飾演嘅阿玲一直都鍾意佢,於是扮晒情聖講出上述肉麻嘅說話,事實阿玲最初係短暫對丁蟹有好感,但後來當然情傾有錢有型又好心地嘅方進新啦,從此對丁蟹又憎又怕,最後重想殺咗佢。

喂,俾我都想殺咗呢條扮情聖嘅癲佬啦!

《大時代》金句
(圖片來源:TVB《大時代》截圖)

《大時代》金句3. 「你搶我女朋友,炒我阿媽,搵人打我。我哋30年朋友,你咁對我?」

同樣地,蟹哥將處處幫佢甚至對佢有恩嘅方進新當仇人看待,第1次尋仇將方進新打成白癡,第2次搵上門叫方進新徹銷對佢嘅控罪,重錯手打瓜埋佢,如果你認咗30年嘅朋友將你打到變白癡,你覺得佢係點對你呢?

《大時代》金句4. 「一於打感動。舊就舊咗啲,不過中國人好受㗎!」

丁蟹被控謀殺,佢打從心底覺得自己冇做錯,於是同辯護律師商量,重教人哋要打感動喎!律師聽到O晒嘴,最後由得丁蟹自辯。

《大時代》金句5. 「我打死人,但冇做錯。」「呢件案嘅重點唔係我有冇殺人,而係浪子回頭金不換。」

呢兩句就係丁蟹喺法庭自辯嘅說話,好鬼理直氣壯,可惜之後法官反駁:「我提醒陪審團,呢件案嘅重點絕對係被告有冇殺人。」

結果丁蟹係被判謀殺罪名成立。

《大時代》金句6. 「個個塊面都黑掹掹!得我塊面紅卜卜咋!」

呢句係丁蟹誤會陳萬賢(江毅飾)咒佢嗰句:「咁多人死唔見你死/趁地冧啦。」係股市貼士,神推鬼恐預測到股災,從而躋身富豪行列。

《大時代》金句
(圖片來源:TVB《大時代》截圖)

《大時代》金句7. 「唔好驚,係技術性調整,唔好驚。」

大奇跡日,丁蟹5父子輸凸全副身家,一向冇嘢驚嘅蟹哥終於崩潰,自己安慰自己咁講。

《大時代》金句8. 「道義放兩旁,利字排中間。」

呢,都話佢嘅道德標準成日搬龍門㗎啦!又一例子。

《大時代》金句9. 「你係咪神經失常呀?」

劇中最黐線嘅丁蟹鬧人黐線,唔怪得啲人話黐線佬係唔會認自己黐線啦!

金句王2:陳萬賢(江毅飾)

都話幾時都係壞人角色搶戲過好人㗎啦!金句王第2位係由江毅叔飾演嘅華人會第1屆主席陳萬賢奪得,戲中佢為人貪心,不擇手段,為富不仁,同丁蟹一樣咁賤到一個點。佢把口勁臭,鬧人勁惡毒,由江毅叔咬牙切齒演出,真係淋漓濜致。

《大時代》金句
(圖片來源:TVB《大時代》截圖)
《大時代》金句
(圖片來源:TVB《大時代》截圖)

《大時代》金句10.「總之記住,股票之道在於人棄我取。」

「總之記住,股票之道在於人棄我取。人哋買跌你一定要買升,咁就可以同其他人背道而馳,先可以大發。你幾時見過成村人買股票會發?來來去去咪就係幾個人。咁就證明大多數人嘅意見,未必係啱嘅。」

其實呢幾句由韋家輝寫出嚟嘅神級對白,套喺現實股壇都好啱用,喺劇中陳萬賢因為成日被丁蟹打擾求教炒股心得,陳迫不得已就衍敷佢兩句。

《大時代》金句
(圖片來源:TVB《大時代》截圖)

《大時代》金句11.「咁多人死唔見你死!」

呢句陳萬賢鬧丁蟹嘅說話絕對係扭轉套劇下半部分劇情嘅關鍵。

背景係陳萬賢對於丁蟹已經好唔耐煩,於是臭口賢又出口術鬧爆丁蟹,點知丁蟹就當正呢句係股壇黃金tips,喺股市大好形勢下,人哋買升佢買跌,最後擊敗陳滔滔為方婷所做嘅收購戰。

《大時代》金句
(圖片來源:TVB《大時代》截圖)

《大時代》金句12.「趁地腍!」

同樣係陳萬賢鬧丁蟹嘅說話,呢度要解釋一下,「趁地腍」解作土地鬆軟,土地鬆軟可以做乜呀?就係易啲掘坑埋屍囉!所以呢句說話係非常惡毒嘅,叫人哋趁土地鬆軟時去死:「要死就『趁地腍』啦!」

金句王3:方展博(劉青雲飾)

呢位唔使多介紹啦,方進新(劉松仁飾)個仔方展博,炒股天才,同丁蟹鬥足兩代,最後同富豪借運win咗丁蟹,重win埋佢一家條命。

《大時代》金句
(圖片來源:TVB《大時代》截圖)
《大時代》金句
(圖片來源:TVB《大時代》截圖)

《大時代》金句14.「我方展博要發達,我方展博要做億萬富豪。」

用念力無限loop催眠自己要發達報仇,重好似小學生咁罰炒添。

《大時代》金句
(圖片來源:TVB《大時代》截圖)

《大時代》金句15.「升!升!升!升!升!」

丁蟹同方展博嘅最後對決,恒生指數經歷大跌後,由9,000幾點升至13,000幾點,呢個日子被稱為「大奇跡日」,呢日佢同陳滔滔(林保怡飾)一齊叫股市升,記得筆者當年都喺電視機前嗌埋一份。

《大時代》嘅金句當然唔止咁少,好似方進新嘅股壇朋友葉天(羅樂林飾),臨死前傳授方展博1首稀奇古怪的詩,叫「股票必勝法」:

《大時代》金句
(圖片來源:TVB《大時代》截圖)

「貪心輸錢贏 輸血不輸錢 人人去輸血 殺人不打風

落雨去離島 離家飲煉奶 見人分遺產 出獄嫌錢腥

快樂冇人格 出家冇人工 攻而無不克 戰無不勝矣」

《大時代》金句
(圖片來源:TVB《大時代》截圖)

最終方展博透過電腦分析「股票必勝法」,而家睇番都好有警世作用。意思如下:

「股市原意,乃讓集資搜資有其地,社會向榮,人皆有賺,惜人性貪婪,耗盡心思,巧取豪奪,樂土成煉獄,血雨腥風,殺戮不息,無數人蕩產傾家輸性命,勝者則喪良知人格,余於股壇數十載,未嘗見一真正贏者,智者應知此乃一處永無贏家之戰場,取勝唯一法…『及早離去』4字而矣!」

《大時代》金句
(圖片來源:TVB《大時代》截圖)

另外方進新被丁蟹打到手腳唔協調,要做疊報紙搵食,但老細嫌佢慢,佢就講咗以下呢番令人心酸嘅求情說話:「我被人打壞個腦,做得唔好。今日做唔好,唔要錢,聽日做唔好,唔要錢。」松哥精湛演技加上呢句心噏對白,令當時唔少師奶喊濕幾卷廁紙。

常見問題

有沒有關於香港的有趣盤點?

香港地從來不乏心靈熱點,香港不少地方均設立行刑場,正正是大部分屋邨興建時的前身,盤點香港猛鬼屋邨 ,信不信由你!不少朋友都喜歡想當年,香港懷舊小食 及這10款最愛夾糖是不少人的共同回憶,沒有高檔的食材,卻塑造出最難忘的味道。提到昔日蒲點,旺角絕對係大家留低最多腳毛嘅地方,千禧年代必去蒲點 ,你又去過幾多個呢?

有甚麼必學生活小智慧?

天氣時熱時凍,容易令人患上小感冒,唔想次次依靠藥物?可以試試這8招必學鼻塞穴位方法7大喉嚨痛舒緩方法。除了感冒外,生痱滋亦非常影響日常生活,坊間有各式各樣的解決痱滋方法,助你解決痛楚!

圖片來源:TVB《大時代》截圖

YOU MAY ALSO LIKE ...