「真理褲」被港男狠批有損市容衰過瑜伽褲 意見兩極：清朝出嚟？
廣告
早前有網民大搞一個真理褲vs瑜珈褲的討論，真理褲大熱成為網民世一。點知近日就有港男喺Facebook群組「好fashion呀你」貼出一張女生穿「真理褲」出街的照片，並指「其實真係想知點解有人會著呢條咁既褲出街….好肉酸」，結果惹來激烈討論。
港女穿真理褲出街被指好肉酸：完全唔明點解著出街
女生穿瑜伽褲出街常被指肉酸，而現今又有第二款女生熱愛的短褲被封為「衰過著瑜伽褲」，正正是「真理褲」。近日在Facebook群組「好fashion呀你」，有人上載了2張港女搭港鐵的圖片，相中女生穿著真理褲（即大腿旁微側開的一種運動短褲」，結果被人偷拍放網，更道：「其實真係想知點解有人會著呢條咁既褲出街….好肉酸」。而事實上，真理褲相當受港女歡迎，嘉瑩、米露迪等女神級都曾有這種衣著打扮。
網民：真係著完＝無著
言論一出，網上惹來熱烈討論，指「成日喺街見到女仔咁著都覺得好怪，點解好地地要著運動褲出街，同瑜伽褲一樣道理」、「條褲又短又開條邊，一陣又易走光，人哋望又話畀人偷望」、「真係唔知邊忽靚，好地地著條短褲唔得？」、「瑜伽褲就馬蹄現形，真理褲就蜜桃現形」、「著完好似咩都無著咁，不如唔好著，都無分別」、「好地地著條短褲唔得嘅，又要露呢樣，又要露嗰樣」、「仲衰過瑜伽褲，成條睡褲咁」、「著出街根本係影響市容」。
女生：運動褲又有咩問題呀？
不過有更多人反斥「講呢樣嘢嘅人更有問題」，指「咪又係運動褲一條，有咩問題呀」、「關你X事咩，學校短運動褲上PE堂都係咁㗎啦，我覺得你講呢句嘢仲肉酸囉」、「著得舒服咪得，人哋著出街都要比你批鬥？你無著過運動褲出街？」、「真係睇唔出有咩奇怪，你可以表達意見但唔可以偷影人哋囉」、「你著咩褲咁巴閉？一條好地地運動褲都要畀人話？」、「著呢樣又唔得，著嗰樣又唔得，著乜使理你？」、「去跳舞都大把女仔咁著，自己見識少就收聲啦」、「關你咩事，個個都要T恤牛仔褲」？
關鍵詞
真理褲
圖片來源：ig＠emiliawyk.backup、Facebook@好Fashion呀你、Instagram＠melomelojai、Instagram@kaaying219、YouTube＠美麗妄娜資料或影片來源：原文刊於新假期
