日元低水女生必入Lapin

杜如風都撐 最cute霸新車 日元低水女生必入Lapin

運動裝備

廣告

有冇睇最新一輯《東京攻略》?我老總剛同我講連佢媽媽都鍾意睇,咦?好入屋喎!第一集杜如風真係入屋,事關佢話呢期日元持續低水,所以今輯除咗繼續推介大家吃喝玩樂同買衫褲鞋外,重會推介大家買啲貴價嘢,第一集就叫大家去代官山買屋(樓),又有叫大家買成百萬港紙嘅二手「撈」,我諗,車佢都有機會叫大家買埋,不如我推先!

又其實,香港都有極多日本車款嘅行貨入口,有行貨我一定建議你買行貨,又有保養盛盛,有乜事唔使煩,「搏」得就緊係揀啲香港冇嘅款,呢期我推介Suzuki Lapin 日元低水女生必入Lapin 。

「好打耳呀~~巧令令呀~~」,我一路cap緊相嘅時候,側邊啲女同事已經喺度尖叫,咁又難怪嘅,呢款今年最新出嘅Lapin(第一代Lapin於2002年出產,已經以玩多色cute型為主,冧盡㗎妹喇!),淨係車身色已經有12隻揀,咩粉紅呀、粉黃呀,「Tiffany綠」呀全部有齊,加埋內飾配搭各樣,玩色都有排你玩。遲下出埋更多改裝配件,包你揸到佢「湯」都未厭!

講咁耐,你實會問咩價口先?剛上網check咗,入門齋版車價約1,070,000日元(約$68,400),齊料最頂級版都係約1,490,000日元(約$95,360),呢個價喺日本已連稅,出得車咁滯,所以話,來生不做香港人呀!咁,嚟到香港呢?上政府網睇過首次登記稅大約車價40%(以車價15萬以下計),即係如果買架7萬車價,加40%即2萬8稅,當然重有運費呀,手續費呀,代賣日本車公司賺呀,燈油火臘呢呢路路咁,15萬港紙咁上下埋到單都唔貴吖,起碼唔會通街都係,品味嘅嘢就係咁嚟,660cc又慳油,力係嘛嘛,咁冇人叫你去「飛」㗎!OK!錢計掂,問題係,你首先要有個車牌!

最後,你亦嫌麻煩嘅咪揸架人地當「腳車」(即返公放工代步王咁解)嘅Jazz囉,一街都係因住上錯車喎!

text-singh photo-網上圖片

 

精選最靚7色兔仔 巧打耳啊

YOU MAY ALSO LIKE ...

There are 4 comments

Add yours

Comments are closed.