Bonaqua動感亞洲越野跑步賽 山野絕唱

運動

廣告

享受大自然,享受挑戰山野嘅快感本為每個人嘅權利,不過由於漁農自然護理署公佈,基於安全問題,以後將不會再批准Action Sprint Race及類似比賽取得許可證,Bonaqua動感亞洲越野跑步賽今年過後將成絕唱,雖然跑手們自發於網絡上組織請願,依然阻止唔到呢個殘酷嘅決定。

呢個已經有十幾年歷史嘅經典越野跑系列賽,剛剛完成愉景灣最終站,勇奪本站男女冠軍嘅係法國Asia Trail Magazine選手Clement Dumont同英國Raidlight跑手Zein Williams,分別以1小時23分08秒及1小時43分23秒完成。而男女系列賽總冠軍分別係Zein Williams同尼泊爾HKNTRA跑手Santosh Tamang。就咁講你可能感受唔到現場氣氛同過程,於是今期搵嚟同樣有份出賽,本公司跑隊「Let’s Run」成員Fung及本地跑團「LightOness」主腦Miffy,同大家分享參加今次山野絕唱嘅第一身感受。

text – Lok(ig:loklokb1021) photo – Tung

 

Fung@Let’s Run
「一直有跑開步嘅我今次挑戰越野賽,賽前估計都係自己能力範圍內,應該難我唔到。當日一開跑先要直上一個好斜又高嘅山頂,之後落山再經過一段石澗,心諗應該都行咗一大半,撐埋佢!跟住原來重要落水塘遊200米左右,爬番上路面再繼續跑山路,四肢開始冇力。最後去到賽程尾段重要橫跨兩個海灘,可以㨂游過去或者從崖壁走過去。全程最後用咗三個半鐘完成賽事,總結成個比賽好有挑戰性,上山下海同埋每段路都係主辦單位精心設計,可惜今次可能係最後一次,我認為生活喺呢個城市嘅人好想有多啲唔同嘅選擇!你唔玩唔代表冇人玩!」

 

Miffy@LightOness
「開頭重講笑話「我又唔係要威,洗乜戴頭盔」,不過大會話唔戴會取消資格,但起步無幾就知頭盔真係必須要戴,一起步已經要上幾百級樓梯,再亡命跟住地心吸力向下衝,呢啲只係前菜,之後開始濕身,當中經過,大石、細石、碎石,簡直係手腳並用,每一步都要留意石既顏色,深色完全唔可以掂(好跣),真正感受到一個人喺大自然山澗中拼搏嘅感受!最後當我嘅極限就到,聽到大家嘅歡呼聲時,力量又出現!我同兩位戰友手拖手一齊大步衝過終點,好興奮!回家途中一直回味,雖然過程艱鉅、驚險,但真係一次好難得嘅挑戰自我經驗,最後一屆,好榮幸我可以參與其中。」