3:00am起跑！ 關馬身心之試煉
##embed-label-19##
講起關島，總會令人聯想到「度假天堂」4個字，不過對參加喺4月12日「第3屆關島國際馬拉松」嘅跑手嚟講，就絕對唔會有度假嘅mood，事關賽事喺凌晨3點起跑，加上天氣悶熱，絕對係跑者體能同鬥志嘅最大考驗。最難得係，超過3,000名參賽者中嘅50幾名香港跑手，面對挑戰性咁高嘅賽道，部分都重可以攞到好成績！
今期「Sports」除咗直擊關島馬拉松實況外，重會介紹下關島有乜刺激玩意，就算miss咗今屆關馬，一樣可以跟住嚟玩餐飽！
text – Oscar photo – Billy special thanks – 關島觀光局
「波馬」入場券
喺2013年首辦嘅關島國際馬拉松，賽事分為全馬、半馬、10K同5K賽，雖然只係舉辦到第3屆，但已經吸引到超過3,000名跑手參加，近半數重要係海外跑手，香港亦有超過50人參加。
關馬點解吸引到咁多外國跑手？除咗因跑完可順手度假外，原來關馬嘅賽道獲得國際田徑總會同國際馬拉松及道路賽協會認可，以作為有「最耐歷史馬拉松賽」之稱嘅美國波士頓馬拉松嘅資格賽。
一般有操開嘅跑手，要喺4小時內完成42.195公里嘅馬拉松唔算太難，但要參加波士頓馬拉松就要更加緊練習，以去年嘅資格標準嚟講，18至34歲跑手要跑出3小時5分以內嘅時間先可以參賽，所以有目標去跑「波士頓」嘅跑手，都唔敢喺關島賽中怠慢。
凌晨起步免曬燶
關馬好考跑手嘅毅力同意志，因為全馬喺當地時間凌晨3點起步，比渣打馬拉松「頭槍」5點30分重要早，對唔少跑手嚟講，真係一大挑戰（但記者問過唔少香港跑手，佢哋都話慣咗早起步喎）！
據大會所講，咁早起跑，係因為要避免跑手被平均30幾度嘅日照曬燶。但就算天未光起步，凌晨時分嘅關島一樣非常悶熱潮濕，加上一滴風都無，令跑手頭段吃盡苦頭。不過後段突然清風送爽，令跑手們醒一醒神！
雖然天氣炎酷，但大會非常貼心，賽道由關島旅遊區出發，途經市中心大街同海岸邊，可以邊跑邊欣賞靚靚景色，兼了解關島文化。最估唔到嘅地方，係凌晨時分重有好多市民為跑手載歌載舞咁打氣，而且賽道每公里都設有水站，所以跑手都鬥志十足。
Sandy（左、美籍挪威人） 64歲、Wim（右、荷蘭） 60歲
Sandy：「我係退休美軍，平時都會跑步操fit自己，當知道關島有得跑，咪叫埋Wim嚟一齊跑！」
Wim：「我第1次到熱帶地方跑步，而家感覺都唔錯，氣氛好熱烈。」
第4屆關島國際馬拉松
日期：2016年4月（實際日期有待公布）
查詢：www.guaminternationalmarathon.com
https://www.youtube.com/watch?v=YGW7VotggA4
&feature=youtu.be
再玩動感關島
跑完馬拉松，冇理由返酒店hea呀嘛？關島出晒名水上活動多，但山林活動一樣精采，以下介紹嘅活動，包你對關島嘅旅遊活動加深認識！
揸大膽車 Jungle Rules Adventure Tour
無論你有冇車牌，都可以開住呢架越野四驅車喺山野間飛馳。所謂「jungle rules（森林嘅規則）」就係「冇規則」，只要你夠膽就可以駛過任何斜坡。
記者試玩之後得出1個總結：駕駛技術都係次要，膽大先最重要。唔少肉眼以為上唔到嘅斜坡，對四驅車嚟講，真係輕而易舉。不過因試玩當日落過雨，山路變晒泥濘，四驅車陷入泥氹事小，反車嘅話受傷事大！所以指導員會提醒你每個斜坡要點做，但基本原則就係「切勿瘋狂駕駛」，最緊要都係安全至上。
Jungle Rules Adventure Tour
費用：US$120（$929）（2小時，駕駛者及乘客同價）
查詢：www.junglerulesguam.com
山洞游水 Pagat Cave
山洞見得多，洞入面有個泳池你見過未？
由Route 15公路行約30分鐘山路，就會嚟到Pagat Cave，洞入面嘅水係天然礦泉水，但絕對唔飲得！因為泉水含有珊瑚粉，會對人體腎臟有害，所以游下水算喇。Pagat Cave同附近其他洞穴嘅泉水相通，形成1個地下水循環系統，唔會一池死水。另外呢個洞雖然同海水相連，但泉水唔會因而變鹹，不過仍會受海水潮汐漲退影響，水漲時會令泉水上漲至約1.6米高，即約下巴位置；水退就大約腳眼位咁高。
出咗Pagat Cave，再行多15分鐘，就會去到岸邊，伴隨住天然海蝕洞嘅，係一望無際翠藍色嘅太平洋，美景實在令人忘返。
