【2018世界盃 英雄人物】加比爾捷西斯-油漆工到世界盃正選前鋒

運動

廣告

近日網上瘋傳一張現役巴西年輕前鋒加比爾捷西斯(Gabriel Jesus),「耶穌」,喺2014年巴西世界盃舉行前為市內進行美化工作,赤腳喺馬路邊為石壆油上一層新顏色,引起大家關注。4年之間,這名巴西小子就由街頭的油漆工升格成世界盃巴西隊的正選前鋒。

撰文:理性足球分析| 圖片來源:Gabriel Jesus Instagram| 編輯:隆仔
內容由博客提供及授權轉載,不代表本刊立場。

加比爾捷西斯-4年間由油漆工到世界盃正選前鋒

數數手指只係4年前,堂堂巴西大國腳4年前仍然做緊低下階層工作,今年已經成為曼城及巴西進攻核心,喺世界盃呢個足球界最大舞台表演。原來嚟到呢個年代,大部分球員均出自完善嘅青訓系統下,仲有呢種由低下階層努上拾級而上嘅勵志故事。

呢張相其實由耶穌2017年親自喺其個人Twitter發放。現齡21歲嘅耶穌當時17歲,效力位於聖保羅Palmeiras嘅U17梯隊。

耶穌出生於巴西聖保羅北部Jardim Pero一個小社區。當年耶穌仲喺媽媽肚入面時,佢嘅爸爸突然離家出走,從此再無任何消息,耶穌媽媽Vera Lucia自此需要獨自養大四個小朋友。或者因為耶穌成長自單親家庭,佢對媽媽、屋企、成長地方嘅感情特別深厚,為人熟悉嘅打電話慶祝動作就係代表佢同母親嘅聯繫;耶穌手上亦刺咗一個戴住Cap帽嘅小朋友抱住個足球,望住其成長地方Jardim Pero嘅刺青,足以證明佢對屋企對家鄉嘅歸屬感。

上文都講過,耶穌同現今好多球員嚟自正規嘅訓練系統唔同,佢唔係嚟自甚麼大球會,無接受過正規既訓練,只係為巴西地區球隊打拼。但反而呢種「非主流」嘅成長路線,令佢可以喺巴西街頭訓練出與別不同嘅「森巴」技術,亦解釋咗點解以往巴西經常出產個人技術出眾嘅球員,發展出令大家陶醉嘅「森巴足球」。可惜喺近年巴西已經漸漸失去呢種「味道」。

耶穌8歲開始為佢第一任教練Mamede,所負責嘅慈善機構足球隊效力,佢曾經形容過喺巴西貧民窟內踢波進攻時會被剷斷雙腳,有時候每日打三至四場比賽,即使雙腳肌肉接近抽筋,但仍然覺得「唔夠皮」。佢無辦法將注意力集中喺其他事上,只會集中於訓練,球場同比賽,番到屋企個腦都只係掛住足球。

耶穌生活完全離不開足球。

經過一段時間,耶穌效力業餘球隊 Associação Atlética Anhanguera,48場比賽攻入54球,引起唔少注意。終於喺2013年加入Palmeiras青年軍,自此發展一嗚驚人。

消息傳開得好快,Palmeiras嘅球迷甚至為咗耶穌特登去睇青年軍嘅比賽,當地黎講並唔係常見現像,代表Palmeiras球迷熱切期待球會未來希望。耶穌接落嚟喺2014年球季,巴西聖保羅州U17足球聯賽以27場攻入37球打破咗球會紀錄,眾球迷要求提昇耶穌上職業嘅呼聲愈來愈高。

最終耶穌喺2015年3月7日,對CA Bragantino比賽當中代表Palmeiras,73分鐘後備上陣,正式踏上職業之路。而好快同年7月15日佢攻入首個職業入球。

然後喺2015年耶穌代表巴西參加u20世界盃,第一場比賽巴西對尼日利亞就成功入波,同場仲有現時效力李斯特城嘅舊隊友Iheanacho。自呢場比賽之後番到球會Palmeiras就成為球隊嘅常任正選。Palmeiras其後贏得巴西盃,亦係耶穌第一個獎盃,季後亦奪得金童獎。首季嚟講表現絕對合格有餘,但之後嘅發展更加令人估唔到。

哥迪奧拿主動電話聯絡遊說耶穌加盟曼城。

喺2016年奧運,巴西U23代表奪得金牌,耶蘇攻入三球,自此番到Palmeiras被安排打正前鋒,承擔更多責任。同年夏天,耶穌正式同意與曼城簽約,但耶穌要求留喺Palmeiras直至幫佢地攞到22年首個聯賽冠軍嘅目標。當然之後以佢嘅優秀表現成功為Palmeiras贏得聯賽冠軍,個人攻入12球及5個助攻。

無幾耐巴西教練泰迪果斷徵召耶穌,並賜予神聖嘅9號波衫,要求佢為巴西帶來源源不絕嘅入球。自此之後巴西係世界盃外圍賽六戰六勝以小組首名,耶穌與Coutinho同樣攻入5個入球,帶領巴西出戰俄羅斯世界盃。雖然今屆決賽周還未找到入球,但已經連續2場以正選姿態上陣。

就係呢段經歷,從Jardim Pero到曼城,造就大家見到依家嘅巴西9號,加比爾捷西斯Gabriel Jesus,「耶穌」