【識揀女朋友，一定係揀個肯陪你跑步嘅女人】 復活節一於「跑住去Dating」

有鍾意行山嘅網友話「一定揀個肯陪你行山嘅女人」，但對一眾鍾意跑步嘅讀者嚟講，「識揀，一定係揀個肯陪你跑步既女人」。

同肯行山嘅女人一樣，肯陪你一齊跑步嘅女人，體力好，身體好，即係捱得苦，比起淨係識得行街睇戲「HIGH TEA」嘅港女，真係冇得輸！而且佢哋對自己身體嘅健康同身型都有要求，絕對唔會令你攬到排骨或者豬腩肉。

如果你好彩，有一個肯陪你跑步嘅Perfect池女友，復活節一於同佢去以下嘅浪漫Dating跑步路線；如果唔好彩，女友對跑步無咩興趣，呢條路線嘅靚景一定可以感化佢，令佢踏出第一步，成為「肯陪男友跑步嘅女人」。

由香港仔運動場跑去淺水灣泳灘，全程只係4km，沿路都係靚景，無做開運動嘅女女都輕易跑到！

Check Point 1：
香島道

香港仔運動場換好衫，做好熱身出發。沿黃竹坑道跑入香島道，海景已經盡收眼簾。

Check Point 2：
深水灣泳灘

香島道沿海跑到苗鍾徑，就到深水灣泳灘。

Check Point 3：
麗海堤岸路、海灘道

深水灣經麗海堤岸路、海灘道，就到淺水灣，沿路都係醉人靚景。

Check Point 4：
淺水灣泳灘

跑到淺水灣泳灘，都係時候Cool down一下，再去一去泳灘更衣室沖身。換件衫出嚟可以二人世界，喺沙灘散下步，去餐廳飲返杯凍飲順便醫肚，望住個日落靚景傾下計，真係浪漫到暈!

最後去「期間限定」嘅「情人牆」前面互講一聲「I Love You」，復活節假期就夠晒浪漫難忘！

跑步路線：
香港仔運動場→黃竹坑道→香島道→苗鍾徑→深水灣泳灘→麗海堤岸路→海灘道→淺水灣泳灘(4km，乘巴士可返回中環)→原路折返香港仔運動場(8km)