睇落好似好危險 但隱隱約約又覺得好有型 Red Bull X-Fighters Jams

運動

廣告

Red Bull X-Fighters Jams花式越野電單車表演剛啱喺4月4日完結,入場人數3萬8千幾,重多過日本站,估唔到香港有咁多電單車迷。而4位國際級車手Nick Franklin(新西蘭)、Gilles Dejong(比利時)、Marcin Lukaszczyk(波蘭)、Marcus Dubois(瑞典)亦以最fit狀態出場,講到明睇觀眾反應,我哋愈high,佢哋先會玩得愈癲。

FMX(Freestyle Motocross)係高危X-games,會死人,失手嘅話更多數被抬離場。就係因為咁刺激,先引到班喪友去玩,飛到幾層樓咁高去玩花式。香港首次有得睇,好危險,但又覺得好有型。

text-makim photo-Tung、Pakco、Red Bull Content Pool

要玩維港地標
選址都好重要,首次有電單車手飛到咁高,最完美就係360度背景都係香港地標,於是Red Bull就揀咗中環新海濱,國金、摩天輪、維港尖咀嗰邊都可以影到,位置贏晒。而起跳台同降落台距離21米,車手衝上去嗰刻要好清醒,因為花式唔容許有太大失誤,所以我哋先睇得咁緊張刺激。

FMX表演有個特色,車手每次扭空油就代表要觀眾支持,引擎愈響,觀眾就嗌得愈勁。至於花式動作就有過百招,重未計星級車手嘅自創花式,所以點睇都唔會悶。

成功需苦幹
Nick Franklin
Nick Franklin係Red Bull旗下最頂級嘅FMX車手,撞正復活節假期嚟香港表演,你睇佢個look,真係以為耶穌復活轉玩電單車。Nick已經嚟過3次香港,頭2次都係過客,今次終於可以走轉行下,重去咗天后廟拜神,祈求X-Fighters Jams當日好天。
FMX係非常艱苦嘅X-games,Nick話冇捷徑走,需要長時間訓練,而佢自己就係當初喺新西蘭家園外嘅農地開始接觸電單車,然後參與幾年越野電單車比賽,先慢慢發現花式電單車嘅刺激。Nick曾3次贏得新西蘭X air冠軍同Red Bull X-Fighters季軍,絕招係「Back Flip」,佢話估唔到香港人對FMX咁熱情,重話全年有一半時間參與表演,認為香港站係今年其中1個最難忘嘅添,真係Jesus呀!

場邊助興派對
Red Bull X-Fighters Jams重邀請咗本地越野電單車會MX Club同美國帽牌NEW ERA一齊玩,2個幾鐘頭喎,車手點會玩得晒,梗要搞多啲攤位玩下。