直擊台北LINE RUN 志在攞精品

運動

廣告

台灣呢幾年「全民瘋路跑」,各式主題路跑愈來愈多,就連喺台灣最hit嘅即時通訊軟件《LINE》(係呀,hit過《WhatsApp》同《WeChat》好多)都搞埋一份:台灣《聯合報》系得到《LINE》授權,上星期日(3月29日)喺台北舉行世界首站「LINE GAME RUN」,吸引1萬人參加,好多人重話報唔到名!你都報唔到?咁惟有睇我哋嘅報道止住渴先。話俾你知,剩係攞個超正選手包已經抵番晒!

text-Jessie photo-Jacy special thanks-香港航空

https://www.youtube.com/watch?v=yJqLEwHbpHk

即拆選手包

LINE跑咁吸引,最大原因係佢嘅獨家限定紀念品,所有products上面都印有超級可愛嘅《LINE》 friends,而且比賽時已經即時可用。重有喎,活動報名費只係新台幣$1,280(約港幣$337),但根據大會喺官網所標示嘅產品價格,全部產品加埋大約要港幣$480,計起上嚟,起碼心理已抵番先啦!(以下產品價錢只係官網上嘅參考價,都係冇得賣嘅。)

LINE GAME RUN限定水壺 物料用咗Tritan™ Copolyester,耐熱100度,實用。(新台幣$450,約港幣$118)

影!影!影!部長與熊大

老老實實,參加得呢啲比賽嘅,又點會追求速度呢?所以賽事雖然分4公里節奏組同8公里特攻組,但係,係冇名次之分嘅,參賽者其實都係「掛羊頭賣狗肉」,最終目的都係活動前攞嗰套極之精美嘅選手包,兼可以同成班《LINE》人物selfie。大會都深明參賽者嘅心意,比賽當日晨早就放咗好多《LINE》角色嘅大型標板俾大家selfie,跟住有打扮成舞王嘅部長帶領跳熱身操,去到起點,又有首次着住睡衣示人嘅熊大主持開跑禮,搞到成班粉絲都唔捨得跑,剩係喺度影影影!順利完賽嘅參加者,重會收到以莎莉造型打造嘅獎牌,粉絲真係冧到成個溶化。

「LINE GAME RUN」緊接今個月會去埋高雄同台中搞,不過已截止報名。錯過嘅香港粉絲最關心梗係大會會唔會嚟香港搞?不過有關方面就話暫時冇呢個打算,各位香港忠粉只有要等啦!

 

Line埋港台fans

《LINE》旗下一班人物嘅受歡迎程度,絕對唔會低於Sanrio又或者Disney嘅卡通人物,所以一搞主題路跑,即時吸引一班港台粉絲參與。而且當中有好多都係第1次參加路跑活動,都係因為《LINE》夠吸引。

去《LINE》展補數

講咗咁耐,大家都係得個恨字,唔好葡萄,而家就介紹番兩個《LINE》粉嘅新店同展覽點俾大家:

 

台北《LINE》 Store

上年10月台北就開咗韓國以外第1間《LINE》 store,佔地約1,500呎,有過百款《LINE》嘅精品,粉絲們可以近近哋飛去台北shopping。店內重有多個影相位,去到唔買,都可以影番夠本,重有台灣限定商品,做手信一流!

LINE FRIENDS STORE微風松高店
地址:台北市信義區松高路16號3/F
營業時間:11:00am-9:30pm(星期日至星期三)、11:00am-10:00pm(星期四至星期六)

 

曼谷《LINE》展覽

即日起至6月21日,曼谷Central World嘅The Space就舉行以《LINE》多個手電遊戲為主題嘅「LINE Game Fest」展覽,會展出25隻1:1立體公仔,極多影相位,忠粉一定唔可以錯過。

LINE Game Fest@Central World
展覽日期:即日至6月21日
展出時間:10:00am-8:00pm
門票:平日250銖(約港幣$59)、假日300銖(約港幣$71)
網址:www.bectero.com/concerts-events/gamefest/

 

香港航空 全新貴賓室

睇完報道,係咪想即飛轉台灣或泰國呢?想舒舒服服嘅,可以考慮下香港航空商務艙!佢哋啱啱新開咗個5,000幾平方呎嘅機場貴賓室「紫荊堂」,入面有包括雞蛋仔、絲襪奶茶、現煮車仔麵等香港特色美食。重設有商務中心、淋浴間、休息區同私人會議室,等你好似返咗屋企咁舒服等登機,大吉利是就算班機delay都冇有怕。

地點:香港國際機場1號客運大樓6樓離港層5Z522(毗鄰23號登機閘口)
查詢電話:3151 1888
網址:www.hongkongairlines.com