沖繩宮古島 三項鐵人旅遊訓練團
廣告
如果10年前，同大家提起三項鐵人嘅話，大家除咗嘩一聲外，大概會想到自己同三鐵係絕緣體，完全唔關事。不過，香港以至全球嘅體動風潮愈吹愈勁，由早幾年全城踩車到家陣馬拉松熱，睇一睇標準三項鐵人嘅範疇，就發現自己原來合格有餘。不過有興趣還有興趣，最緊要係有「由零開始」，踏出第1步嘅推動力。
今次由香港前三項鐵人代表隊嘅Kenneth（葉俊傑）及前單車港隊Kenji（梁志賢）帶隊，同大家前往日本沖繩宮古島嘅日本三項鐵人國家隊基地集訓，以2日訓練+1日旅遊形式去體驗三項鐵人究竟係乜嘢一回事。
text – England photo – Jacy
第1操：游水篇
沖繩出名水清沙幼就梗，而屬於外島嘅宮古島更加係有過之而無不及。好似大家經大橋跑入伊良部島後，就有你面前呢個水清沙幼嘅砂山海灘可供練水，訓練內容包括落水及上水轉項目時嘅技術，點到點游泳訓練等。而之後附近一帶就有唔少海灘可以玩埋浮潛，好似其中Kayafa Beach就有超過70種珊瑚礁及100種熱帶魚有得你睇，有得練習又有得玩，爽！
第2操：踩車篇
宮古島面積約大香港1.5倍，如踩車環島約155公里。而大家操車其中1個必到地標名為東平安名岬，當大家踩到海角時，就會有座高43米嘅名勝「東平安名崎燈塔」。而有趣嘅係燈塔嘅北面就係東海，而南邊就係太平洋，身處兩片海洋嘅分間線，感覺零舍唔同！
第3操：跑步篇
關於練跑嘅其中1個地點，係呢條2015年頭先建成嘅伊良部大橋，全長3,450米，由宮古島通往伊良部島嘅大橋，比香港青馬大橋長多1/3，而由於島上汽車唔多，大家喺接近零污染嘅情況下練跑再歎景，你話人生有幾可先？
後記：都市人做運動好講求一鼓作氣，大家睇完沖繩呢個人間仙境後，家陣重俾機會你一嘗三鐵訓練滋味。而根據Kenneth所言，今次訓練營實屬leisure入門性質，志在吸引到更多人去參加同埋了解三鐵運動，兼且趁住日圓低水，去一轉沖繩，有得訓練兼旅遊，包你過足癮。
沖繩觀光及三鐵基礎訓練營
對象：初次接觸三鐵之青少年
時間：8月3日至8月10日
地點：沖繩、宮古島及其附屬外島如伊良部島及池間島等等。
內容：每2日於島上設有游水、跑步、踩單車等不同三鐵式基礎集訓及技術改良，另外1日就作休息，及於當地觀光為主。
查詢：3107 0907（ZERO1 競毅運動教學）
E-mail：[email protected]
