【理性足球分析】歐聯四強利物浦對羅馬 沙拿係晏菲路之神

歐聯四強利物浦對羅馬 沙拿係晏菲路之神

講番出場陣容，利物浦排出最強433：Karius繼續把守最後一關，Lovren拍v.Dijk中堅，左右閘Robertson與Arnold，Henderson防守中場，Milner同Chamberlain左右輔助，最強三箭頭當然係Firmino、Mane同Salah，除咗Henderson外其餘同上輪淘汰曼城陣容一樣。

令人驚喜嘅係羅馬亦都用番上場淘汰巴塞嘅352，中堅Fazio、Manolas、Jesus，左翼衛Kolarov，右翼衛Florenzi，中場D.Rossi拍Strootman，Nainggolan稍微壓上一格，前鋒Dzeko加Ünder。

但今次羅馬排352係主攻定主守？首先講下點解迪法蘭斯高點解會排352，因為三中堅可以對上三箭頭，兩隻翼衛對上利物浦兩閘，中場呈正三角，D.Rossi同Strootman剛好對上Milner同Chamberlain，Nainggolan對上防中Henderson，而一對前鋒就對利物浦一對中堅。無錯，352對433剛好做到全場一個mark一個。

利物浦從後場組織時，Dzeko同Ünder防守Lovren同v.Dijk，重點係中場可以三對三完全防守，令利物浦唔可以用短傳組織，一開波其實幾奏效，利物浦打唔出咩有效攻勢，反而羅馬面對利物浦迫搶仲可以好順咁運個波上前場。

利物浦發覺中場被封死，當然玩番最擅長嘅放長傳畀Salah等人走，咁羅馬三中堅會點應對？答案就係裝越位陷阱，將防線壓到上中場，始終三中堅速度一定唔夠利物浦跑，用越位減少三箭頭嘅威脅都算合理。Work唔Work？相信有睇波嘅球迷已經知道答案。上半場中段利物浦已經有幾球過頭波係成功突破越位，雖然有幾球只係突出個膊頭或者腳尾，但已經畀羅馬一個警號，話畀迪法蘭斯高知，裝越位唔係咁易架主席！你估利物浦無練過反越位咩？突破到一球已經玩死你。

隨著Mane成功突破越位後但炒飛機，已經正式宣布，裝越位戰術失敗。不過，羅馬無改變戰術，仍然以全場人盯人加防線壓上方式防守；另一個角度睇，縱使防線墮後，三中堅有信心完封三箭頭嗎？

羅馬進攻方面相對更簡單，就係利用兩邊傳中。從後組織時利用中場D.Rossi嘅傳送避開利物浦嘅迫搶，再分兩邊畀兩翼衛壓上傳中。但Dzeko面對Lovren同v.Dijk優勢並唔明顯，整個上半場只有3腳射門，而且都唔係嚟自Dezko。

羅馬攻唔入自然有機會被利物浦反擊

喺上半場34分鐘，Dzeko喺中場想擺脫Henderson迫搶，再轉到左邊嘅Kolarov，但唔成功被迫甩。利物浦立即反擊傳畀位於禁區K角位嘅Salah，但羅馬中堅Manolas竟然只係企喺度唔迫Salah，Salah喺右邊K角位見無壓力仲要順晒左腳，睇到定一腳彎向遠處死角，利物浦領先1比0。

奉承利物浦嘅傳統，入波後整隊熱血up，迫搶速度都有加快，乘勝追擊。亦因為羅馬戰術係全場一對一，速度偏慢嘅羅馬更加容易被利物浦壓制，一有波就被利物浦迫搶失控球，無限loop。

去到45分鐘，羅馬急於入番一球，又係由左翼衛Kolarov傳中，但完全畀唔到Dzeko被v.Dijk頂走，Salah殺出接應第一時間彈畀Firmino之後自己再跑。呢度講緊嘅位置係利物浦中場嘅中圈附近，代表羅馬中堅壓過自己半場，再要回身同Salah及Firmino鬥走，點可能唔輸？Salah今季嘅單刀把握力真係好強，佢入咗幾多球呢類嘅「唧」射？

上半場利物浦兩球領先

下半場開始迪法蘭斯高換走Ünder，換入更高大嘅Schick，試圖加強兩邊中嘅威脅。不過整套戰術換湯不換藥，防線仍然壓到上中場線，同利物浦對攻，希望搵番球作客入球。

同利物浦對攻邊個最開心？就係利物浦。利物浦面對羅馬急攻，羅馬後場空位完全暴露，壓得愈上，輸得愈快。喺53分鐘好記得羅馬攻唔入回後再組織，三中堅面對利物浦三箭頭迫搶騰晒雞，差d又輸，好彩最後越位。

去到55分鐘，Arnold右邊一個長傳傳畀Salah，呢個位正正就喺Kolarov同中堅Jesus間嘅空位，當翼衛Kolarov上前迫Arnold時，身後嘅空位就被Salah利用，同上場曼聯輸嗰球有d似，畀敵人去到禁區呢個位，睇定嚟食已經無得守。

60分鐘，一樣係Arnold，一樣係Kolarov走上去迫，一樣係Arnold傳畀Kolarov身後嘅Salah，一樣從右邊壓入禁區傳去尾柱，Firmino射入，同上球一模一樣。

輸到四球迪法蘭斯高終於發覺352唔work(會唔會太遲?)，轉陣打442。但一轉就輸多球角球，Firmino完全無壓力下頂入，5比0。

呢個時候我都已經無心機睇，但見到羅馬轉咗442後係有好轉，可惜我已經分唔到係因為戰術成功定係利物浦已放鬆。不過正常人去到領先5球，放鬆，減少迫搶專心防守實在係人之常情。

去到80分鐘，Lovren突然自爆，羅馬長傳畀Dzeko終於迎嚟第一個入球。利物浦失波時同入波時一樣，都會有SideEffect，整隊會變得過急，又會開始加強壓力反而令位置感全無。

83分鐘又係一次傳中，利物浦解圍不遠畀禁區頂嘅Nainggolan起腳，Nainggolan起腳一刻利物浦禁區頂完全無人，利物浦防守時完全跟波走，所有人入晒小禁區防傳中無人理禁區外。最後Nainggolan射門射中Milner隻手，羅馬得到十二碼。Perotti順利射入追成2比5。

非常典型嘅利物浦比賽，入波時得勢不饒人，可以短時間內攻入幾球；失波時突然整隊自亂陣腳，一失又會失幾球。最經典莫過於英超對曼城一場，明明領先4比1最後被曼城連入兩球，製造驚險場面。

最後畀羅馬攞番兩個作客入球令利物浦呢場勝仗未能盡情慶祝，次回合羅馬同八強一樣只要贏3比0就可以晉級。不過上次巴塞輕敵，利物浦知道你真係做到時，應該會有所防範。

https://www.facebook.com/ChampionsLeague/videos/2012409228805529/