台最索名模渣馬首跑 「最愛奶油豬！」
話雖如此，但麗雅由2012年尾至今短短兩年幾間，已參加過超過20場馬拉松、3項鐵人賽；2014年內參加咗11場比賽，差唔多1個月1場，可謂異常「勤力」。今次訪問，佢會同我哋分享首次參加渣馬嘅感受，重會提供雙腿愈跑愈靚嘅秘技。
text – Jessie photo – Billy、由伊林娛樂提供
跑完即食奶油豬
麗雅嚟過香港好多次，但參加渣馬就係第1次。佢話可以用唔同嘅角度感受香港，重破到PB（personal best），覺得好開心。「平時只可以坐喺車入面，但今次直情可以喺行車嘅路上跑，感覺好唔同，其實有啲似喺台北街頭跑緊咁樣，只係身邊嘅人講嘅唔係國語而係廣東話。最難忘係跑過海底隧道，好多人一入去就歡呼，我都有跟住叫，氣氛好好。」
麗雅話比賽當日天氣好涼快，跑得好舒服。「但我冇諗過賽道會經過咁多橋，但都唔難應付，最難受反而係尾段去到市區，經過1間茶餐廳，聞到啲食物嘅香味。我平時好鍾意去香港嘅茶餐廳食嘢，但嗰刻可能身體極度疲累，竟然覺得一啲都唔香，反而覺得好油膩。不過跑完後都係第一時間同朋友衝去茶餐廳，哈哈！」麗雅話每次來港都一定會去茶餐廳，佢同好多台灣人一樣，最鍾意食奶油豬，重話諗起都興奮！
同自己競賽
麗雅以2小時4分鐘完成半馬，比之前嘅PB快咗4分鐘，佢話唔算係好大嘅躍進，但已達到自己預期目標。「跑步只要不斷進步，哪怕只係少少，我都好滿足，我覺得跑步做運動唔係工作，更唔似讀書，唔係用嚟同人哋比較，我係為咗我自己而跑，唔係為咗要贏邊個而跑，所以我永遠都係同自己競爭，咁樣先係最正確嘅概念。」
雖然麗雅話只需要同自己競爭，但佢教練就唔係咁睇。「佢睇到我今次嘅成績都一定會話：『咩話？重係2字頭？』哈哈！佢希望我做得更好。我一直都做緊好多訓練，不過就從來冇好認真咁做可以令自己速度變快嘅間歇訓練（Interval Training）。我平常會練好多關於核心肌群或者LSD（Long Slowly Distance），如果想將速度拉得更快嘅話，就一定要做間歇訓練，呢個亦係我今年嘅訓練重心。我嘅目標唔需要進步好多，反而係希望每次跑時，身體會更適應跑步嘅呼吸方式，成為習慣，享受過程。」
提醒新手：「最緊要有目標。」
麗雅跑咗步兩年幾，唔算資深，但佢由唔鍾意跑步到瘋狂愛上運動，已累積唔少比賽經驗，絕對有資格教大家點入門。
1. 工欲善其事，初跑者必須有整套適合運動嘅服裝，好睇之外，亦係對自己嘅保護。好似女仔一定要着運動內衣，佢係最貼近肌膚嘅衣物，吸濕排汗唔會令皮膚過敏之餘，所用嘅布料亦要特別有彈性，跑步時可以穩定同埋保護胸部；鞋要揀適合對應運動嘅，好似跑步同埋做室內NTC運動已經係兩個唔同嘅選擇。
2. 跑完步要謹記補充水分、蛋白質同埋糖分。例如有啲人會覺得天氣好凍，冇乜點出汗，做完運動就唔使補充水分。其實身體有達到一定運動量之後都要補充水分，促進身體代謝。
3. 尋找運動同伴，可以互相影響、鼓勵，亦可以令運動變得更有趣。
4. 報名參加比賽，令自己有目標，就會更有心機做運動同埋訓練。
5. 除咗要注意跑步姿勢，訓練亦要循序漸進，一開始先試試輕鬆跑300米，之後就1K、3K慢慢加上去，之後發現跑完返屋企對腳唔再震嘅時候，再增加到5K，如此類推。
6. 如果女仔生理期唔舒服，唔使迫自己，訓練時間表係死嘅，人係生嘅，好好咁休息，因為休息都係訓練嘅一部分，之後表現甚至會更好。
難忘3項鐵人賽
回望2014年，麗雅話最難忘嘅係佢嘅處女鐵人賽「台東普悠瑪鐵人賽」。「我冇諗過自己有朝一日會參加鐵人賽。嗰陣同一日要操游水、跑步、單車當中至少兩項運動，例如朝早游水，夜晚跑步，中間時間繼續工作。每日都大包細包咁樣出門，然後好攰咁樣返屋企。鐵人賽一開始，感動到鼻酸酸有想喊嘅感覺，但我忍住唔俾自己喊，我想眼淚要留到完賽先流。我預期自己跨越終點線時會大喊一場，點知衝過終點第1個感受係：『天呀！我已經係個鐵人喇！』我即刻跑去同教練講，我係鐵人喇！我係鐵人喇！佢恭喜返我，我當時先醒覺，咦！我唔記得咗要喊！因為真係太開心。」
生活變得不一樣
接觸跑步之前，麗雅話心情唔好，只識亂買嘢同大吃大喝發洩，而家唔開心就會跑步或者打場拳，平伏心情之餘，重可以開心咁食自己鍾意食嘅嘢，發洩到又唔驚肥，有雙重好處。「我身邊有朋友原本唔跑步，睇到我成日都去跑，就跟埋我一齊跑，以前同我夜蒲嘅朋友都漸漸變晒一齊去晨跑，再去食早餐，友誼反而更牢固。」
而家有唔少人會喺麗雅facebook留言，話睇到佢每日做運動，都好想變成佢咁樣。「前幾日喺街度撞到個女大學生，佢過嚟同我講好鍾意我，重拎佢部手電俾我睇，原來佢用咗我張相嚟做wallpaper。我覺得好開心，因為以前一般較多係男仔鍾意我，但自從我愛上運動之後，女仔都會因為我嘅精神同性格而鍾意我，甚至會因為我而開始跑步，生活變得唔一樣。」
視「肯雅徐」為目標
貴為台灣名模鐵人，麗雅原來都有欣賞嘅名人跑者，佢都好鍾意我哋香港嘅「肯雅徐」。「我覺得徐濠縈跑得好出色，一般嚟講1個貴婦，可以選擇喺屋企歎下、平時去飲下午茶，但佢就身體力行話俾大家知，佢出色嘅唔止係外表，重有運動嘅毅力。我覺得咁樣可以鼓勵到好多女仔，除咗識打扮自己，重要有其他嘢，先會令人覺得你厲害同吸引。我有follow佢個《Instagram》，會留意佢最近又跑咗咩比賽、佢平時點樣襯啲跑步服裝，甚至佢平常嘅服裝配搭。之前經常喺NIKE嘅活動遇到佢，我覺得佢講嘢好有型，佢試過講笑：『你對腳咁長，跑得唔快都唔緊要啦！俾大家睇下你嘅長腿已經好正啦！』我覺得佢係好輕鬆看待跑步呢件事嘅人，佢唔會刻意咁同人講佢完成咗幾長距離，要進步幾多，但佢就一直做自己，好有個性，好識面對自己，好多女藝人都未必做到。」
男友一定要愛運動
麗雅嘅朋友都戲稱佢係兼職運動員，佢自己都以考到運動指導員證為目標。「我唔係想做教練，只係好鍾意運動，我想將來有朋友或記者問起時，我都可以好正確咁指導大家最標準嘅運動動作，而家已開始準備，大概暑假時就會去考試。」
幾年前因婚姻失敗而走入人生低潮，跑步將佢嘅生活調回正軌，佢話而家感情方面一啲都唔急。「以前未做運動，就會覺得好悶冇嘢做，不如拍下拖啦！但因為而家已經將自己嘅時間安排得好充實，所以都冇乜時間諗呢樣嘢。如果遇到適合嘅都會試下，但對方一定要鍾意運動、識得健康生活，因為咁樣嘅人先會同我有話題。佢本身唔使好厲害，但一定唔可以排斥運動，會同我一齊練習、參加馬拉松，慢慢進步就OK。我最討厭就係有男仔會話：『你係咪傻咗，去跑咩馬拉松？』呢類人我就絕對唔會同佢講第2句說話。」各位男士，聽到未？
公開練長腿秘技
麗雅話好多女仔，甚至乎models都會有錯誤觀念，覺得跑步會令腳變粗。「佢哋每次見到我，都會好奇問我點解跑馬拉松，對腳都重咁修長？以下就係我嘅心得。」
1. 跑姿要正確，運用到啱嘅肌肉部分，就唔會令某部分肌肉特別發達。
2. 要做TRX（Total Resistance Exercise，利用彈力繩進行嘅全身抗阻力鍛煉）等嘅LSD運動，針對性練腿、臀、腹部呢啲肌肉，先有力量應付長跑。練得好，平時行路都唔會彎腰陀背，行都行得好睇過人。如果本身肚同屁股完全冇力量，每次行路啲力量會落晒小腿，唔好話跑步，行得多，對腳都會愈嚟愈粗㗎！
3. 跑完後一定要拉筋，腿嘅肌肉線條就會愈拉愈長，變得更好睇。紓緩嘅動作同運動本身同樣重要，我就算只係行街，返到屋企一樣會拉筋，令肌肉放鬆、拉長，唔會結成一大舊。我跑半馬後即刻會做番20分鐘拉筋動作嚟紓緩。返到屋企或酒店就會敷冰，跟住再拉筋，即係跑完嗰日，我每隔1、2個小時就會拉1次筋。如果有浴缸，我直情會放凍水再倒兩桶冰，成個人浸落去。可令擴張或破裂嘅血管冷卻，同埋減緩身體嘅不適。
4. 定期做運動式按摩，以常用嘅推、拿、揉等手法刺激肌肉，可減低運動後嘅肌肉酸痛感，同埋可將深層僵硬嘅肌肉推鬆。
