《新Monday》跑步影像企劃 Run2Connect「抗病篇」~延

波鞋

廣告

跑步好比人生,路段有長有短,有起有跌,前路永遠充滿未知之數,令人既期待又惶恐。
2011年12月,突如其來嘅高燒,為馮嘉慧(Cathy)帶來猶如電影情節般嘅經歷,將佢原本嘅生活、平凡不過嘅人生徹底改寫。
命運,將Cathy帶到去另1條跑道,1條荊棘滿途、諸多險阻嘅跑道與急性血癌進行殘酷嘅競賽,亦可能係人生中最後嘅路段。急性血癌令Cathy感受到前所未有嘅痛苦、無奈與不幸,但跑步竟然成為佢康復期間釋放自己嘅唯一出路,幫助佢走出幽暗心境及擔心復發嘅負面情緒,令佢更積極面對自己,善待自己身體。「延」,代表Cathy生命嘅延續,透過自己大難不死嘅生命去影響他人生命,從而將愛延伸到其他病友身上,令他人擁有更大得着。

她 終點線

一切都來得太突然,確診為急性血癌嘅當日正係聖誕前夕,沒有沮喪、沒有難過、沒有痛哭,因為所有感覺、反應就於確診一刻靜止住,隨即Cathy已被即時送院接受一連串未知嘅治療。「我覺得自己會好快走,好快離開呢個世界。」Cathy嘅認知當中,血癌確係種殺傷力驚人嘅病患,生存機率可謂微乎其微。但想到支持自己嘅家人、朋友、學生,Cathy冇原因去認輸,反而要更努力去對抗。治療期間,Cathy歷盡不同程度嘅痛楚,好唔容易走到最後1次嘅化療。「因為要洗淨含有癌細胞嘅血液,所以藥力好重,感受到身體內外好似被火燒,自己要含冰粒降溫及不停抽搐,係非筆墨能夠形容嘅感受。」Cathy嘅努力絕對冇白費,甚至受到上天嘅眷顧,靜靜地為佢安排另1條重生嘅路段。

她 起跑線

因為急性血癌,Cathy本以散布世界各地嘅家人再次重聚,為嘅係做骨髓化驗,幫助Cathy尋找適合嘅骨髓作移稙之用。慶幸地,Cathy家姐嘅骨髓與Cathy完全脗合,家姐毫不猶豫地答應捐贈,不但延續大家本已疏離嘅姊妹情,更成功接受移植,戰勝癌魔。
Cathy嘅生命得以延續,但康復期間卻疑似患上創傷後遺症。因為血癌康復者需要於高度衛生嘅地方靜養,Cathy就一直被「困」於隔離病房中,失去與外界接觸嘅機會,此時此刻,佢不斷回想治療期間所承受嘅一切,心頭湧起不甘心及無數嘅疑問,重有面對復發及新生活嘅擔憂。前路一片迷惘之際,Cathy望見房外山坡上有人緩緩跑過,為到逃離自己紊亂嘅思緒,於是萌生起出外走走嘅念頭,問准醫生後,就走到房間對出嘅小山坡。望住一個又一個擦身過嘅跑者,Cathy不自覺地一步步向前跑,同時,眼淚卻一滴滴徐徐流下。跑步讓Cathy再次有勇氣面對自己,踏出嘅每步,都為自己解答腦海中嘅問題。或者,未能即時解決,但跑步為Cathy釋放長久積累嘅壞情緒,減輕一路走來嘅包袱,重回人生嘅起跑線。

她 重新跑道

人生係場跑步競賽,我哋每位都係跑手,而對手係自己。
競賽一開始,就冇喘息嘅一刻,只有不斷向前,直到你將自己嘅人生跑完。長短都唔係重點,最重要係活得充實、活得豐盛、活得有意義。
「跑步係種信念,即係你跑步只會望住前面跑,你唔會跑回頭路,沿途跑過嘅已經過咗去,唔會回頭望,Cathy會繼續向前跑。」家姐,延續Cathy嘅生命;跑步,延伸Cathy嘅人生,到另1個新階段。「我嘅生命因為他人得到延續,我都想用自己嘅經歷去感染其他人,上年我完成咗第1次渣打馬拉松10K賽事,幫助癌症病人籌款。而家都會參與唔同嘅分享活動,希望用自己生命影響其他人,延伸其他人嘅生命。」
人生偶有高山低谷,但所有都只會經歷1次,只要放低糾纏過去嘅挫折或陰霾,先可以真正享受路途嘅風光,不斷延續人生跑道嘅路程。

YOU MAY ALSO LIKE ...

There are 2 comments

Add yours

Comments are closed.