【新年送禮】送俾長輩、上司夠得體！ 2000蚊樓下有找！4款推薦新年名酒禮盒
撰文: K.P.｜圖片來源：Johnnie Walker、Le Bon International、The Club、Tom Dixon｜編輯：海月
【新年送禮】送俾長輩、上司夠得體！ 2000蚊樓下有找！4款推薦新年名酒禮盒
1. Johnnie Walker Blue Label「牛年限量版」750ml（入手連結）
Johnnie Walker呢個經典蘇格蘭威士忌品牌雖然大路，亦都經常畀人誤解唔夠氣派（因酒吧「劈場」成日會用嚟溝酒），但其實真正識酒之人，都會知Johnnie Walker嘅「Blue Label」Blended Whisky係好嘢，尤其喺泥煤風味上面做到一個好好嘅Balance。
而為牛年所推出嘅限量版本，喺禮盒包裝上用上金色錫箔公牛吉祥物和金錠，象徵財富、繁榮同品味，而瓶身亦重新設計，加入大量代表農曆新年嘅元素，唔單止包裝夠得體，若果遇著個識酒嘅長輩或上司，Johnnie Walker嘅Blue Label一定有加分效果！
2.軒尼詩V.S.O.P及X.O. 2021新年限量版（入手連結）
另一個經常會聽到用嚟送禮嘅品牌軒尼詩（Hennessy），係時尚集團LVMH旗下嘅法國白蘭地公司，擁有2百幾年歷史嘅佢夠哂經典，用作送禮保證夠大方得體。而喺2021年，軒尼詩就攜手享譽國際嘅知名當代藝術家劉韡，以其藝術作品 《春天》為主題，推出「軒尼詩 V.S.O.P 2021新年限量版」與「軒尼詩 X.O 2021新年限量版」，引用咗代表象徵新春幸福嘅紅色、紫色，大紅大紫咁將濃濃嘅新年氣氛呈現。
3.馬爹利X.O 2021「鳳飛九天」禮盒裝（入手連結）
擁有三百年歷史嘅馬爹利（Martell）X.O.干邑白蘭地，以往聽到會覺得呢款酒好「大叔」，但品牌近年都幾積極年輕化，而且舊年更喺舊金山世界烈酒競賽及世界干邑白蘭地大賽中勇奪金牌，榮獲雙金嘅肯定。而今年所推出嘅2021禮盒裝版本，亦搵嚟80後雕塑藝術家任哲合作。曾於2003年獲得日本「平山鬱夫」三等獎嘅任哲，今次就以「鳳飛九天」作為主題，聽落個名雖然有啲老土，但其實係以武士為創作靈感，演繹出東方文化嘅重生及蛻變。
4.Mortlach x Tom Dixon香港區別注禮盒套裝
都係嫌Johnnie Walker、軒尼詩同馬爹利太大路？咁同樣嚟自蘇格蘭嘅Mortlach就係較小眾嘅推介。Mortlach嚟自蘇格蘭達夫鎮（Dufftown），品牌喺當地被稱為「達夫鎮野獸（The Beast of Dufftown）」，因Mortlach酒廠嘅特色就係如野獸般嘅濃厚質感。更有趣地，原來創辦人Dr. Alexander Cowie曾喺香港行醫長達五年時間，不過講緊係百幾年前嘅嘢，雖然年代久遠，但威士忌往往就係故事重要過本體！
所以佢作為送禮用途，就更加大方得體，皆因Mortlach近年同英國最具代表性嘅設計品牌Tom Dixon合作，並喺唔同地方推出當地獨家發售嘅禮盒套裝，而香港嘅版本包括一支Mortlach 16年以及Mortlach x Tom Dixon「Tank」威士忌低球杯，定價為港幣1,100元，獨家於Tom Dixon香港旗艦店發售，送禮自用亦可，相當值得收藏。
Tom Dixon香港旗艦店
地址：中環荷李活道52號
