Twins演唱會︳狂唱經典作回憶返晒嚟勁感動 8大必看重點有紫蘭、紫薇仙子

Jan 22 2024

由蔡卓妍（阿Sa）和鍾欣潼（阿嬌）組成的Twins踏入出道22週年，1月21日紅館舉行一連14場的《TWINS SPIRIT SINCE 2001 LIVE IN HONG KONG》演唱會，首場2人在唱經典飲歌，跳足全場仲要表演埋側手翻超有心思，一齊睇吓8大重點！

1）Twins狂唱經典作回憶返晒嚟

阿Sa和阿嬌一開場即帶來15分鐘的Opening Medley，唱出一系列經典代表作，包括《明愛暗戀補習社》、《二人世界盃》、《愛情當入樽》、《ICHIBAN興奮》和《跅跅步哈姆太郎》等等，搞到全埸high爆！跟住Twins都搞笑表示今次演唱會無「廁所位」，一直狂唱熱爆經典例如《亂世佳人》、《下一站天后》、《我們的紀念冊》等，唱咗37首歌，超有誠意！

2）Twins重演招牌側手翻

阿Sa和阿嬌於2001年以《明愛暗戀補習社》一曲正式出道，當年只有18歲的阿Sa和20歲的阿嬌在MV中於沙灘上打側手翻的一幕，成為了她們的招牌動作。如今2人雖然已經40有加，但依然能夠在舞台上輕鬆打到側手翻，在《跅跅步哈姆太郎》期間，連續2次做出經典側手翻，回憶返晒嚟！

3）跳唱落足力探戈又Chair dance！

Twins在演唱會中換上多套性感戰衣之外，跳唱落足力，除咗開場熱跳Opening Medley之外，唱《千金》時大跳探戈，去到唱《女人味》時跳Chair dance，勁多驚喜！

4）過場換衫都唔會悶星光熠熠有睇頭

演唱會總有換衫時間，但今次Twins演唱會換衫時間都唔會悶，事關佢哋預備咗幾條小短片比粉絲觀賞，有容祖兒、泳兒、Kenny關智斌、張敬軒、Gin Lee李幸倪、陳家樂落力表演！Kenny關智斌仲扮早前大熱電影《Barbie》的阿Ken，張敬軒就會扮電影《明日戰記》，而Twins仲會重演返經典紫蘭仙子同埋紫薇仙子，大家記得留意啦！

Twins演唱會 Twins同張敬軒扮電影《明日戰記》 — Twins同張敬軒扮電影《明日戰記》（圖片來源：大會提供）

Twins演唱會 Kenny關智斌扮早前大熱電影《Barbie》的阿Ken — Kenny關智斌扮早前大熱電影《Barbie》的阿Ken（圖片來源：大會提供）

5）竟然安排握手時間！

今次演唱會仲咗跳舞過場有心思之外，仲特意安排咗Twins分別環繞全埸同粉絲握手，阿Sa仲表示自己握到手都整損埋，勁落力！

Twins演唱會阿sa真係盡握每個fans — 阿sa真係盡握每個fans（圖片來源：新monday編輯部）

Twins演唱會阿嬌同kenny握手 — 阿嬌同kenny握手（圖片來源：新monday編輯部）

6）全場為阿嬌慶祝43歲生日

1月21日剛好是阿嬌的43歲正日生日，阿Sa為了幫好姊妹慶生落足心機，呼籲全場歌迷在凳底舉起入場時分發好的紙牌向阿嬌講生日快樂兼唱生日歌，可惜有歌迷把海報的顏色互相調亂而沒有辦法統一生日快樂字句畫面，搞到阿Sa扁晒嘴：「變咗印象派，原本好好睇㗎！唯有之後畀番相你睇啦！」

7）Twins淚灑舞台

阿嬌和阿Sa分別在台上說出感謝對方的話，2人講講下都講到眼濕濕喊晒口：「廿年前冇諗過走到呢一步，我知道喺人生高處定低潮，我哋終於由一個階段走到另一個階段，我哋都喺埋一齊，多謝你鍾欣潼！」阿嬌則向阿Sa說：「由細到大我都唔係自信嘅人，但我遇到困難，你哋會走出嚟支持我，有你喺我身邊，你嘅自信、開朗，都係我學習對象。我以前成日都半途而廢，但唯一同你嘅友誼係最長，我好榮幸可以同你組成Twins！」之後2人唱《相愛22年》時都忍不住淚灑現場，歌迷見到都超感動，大呼：「唔好喊！」

8）Twins透露可能係最後一次演唱會

唱完《下一站天后》後，阿Sa和阿嬌透露Twins今後的去向，阿Sa慨歎能夠出道22年都可以開演唱會簡直是奇蹟：「出道400幾日開到紅館演唱會，當時已經覺得係奇蹟嚟，到出道22年仲開到，都係一個奇蹟。」阿嬌稱確實非常難得，但對於未來似乎不確定因素：「作為組合仲可以一齊好難得，未知幾時係最後一次演唱會。」阿Sa回應道可能是最後一次：「我哋唔係𡃁妹仔，會唔會係最後一次演唱會……」