MIRROR演唱會個個輪住喊 姜濤高呼:香港加油!香港樂壇加油!
撰文:宅宅子|圖片來源:新Monday
MIRROR演唱會 兩位Jeremy、Anson Lo先變喊包
MIRROR演唱會後半段,大會在場內播放由梁祖堯同MIRROR到梅窩拍攝節目《調教你MIRROR》的片段,片中可看到12子在梅窩拍攝期間的點點滴滴,當中更看到他們相擁而哭的場面。
姜濤任壓軸講感受大呼「香港加油!香港樂壇加油!」
在Encore環節中,MIRROR輪流感謝家人同鏡粉們的愛戴同支持,還講出對今次開個唱的感受:
向來較少發聲的Tiger 竟奮勇率先開聲:「自己唔係是有天份的人,感謝爸爸媽媽栽培,讓他有機會踏上舞台。」
AK(Anson Kong):「好想多謝《全民造星》,多謝呢個節目,香港人仲可以發夢,追夢總有一日會夢想成真。」
Stanley:「只要你哋唔放棄,大家一齊繼續努力下去,你哋想做嘅嘢一定會成功。我哋都會努力,做我哋要做嘅嘢,做多啲好作品答謝大家。」
Edan:「如冇拍《調教你MIRROR》嘅話,可能真係會好似一十一兄咁講,但而家我好肯定未來有好多個三年。」
Ian:「我哋12個好簡單,就係做好每一個表演。呢個世界好複雜,希望在場每一個人都可以保持簡單、保持純真。」
Lokman:「一開始收到要做6場的指令,有種「死人喎」嘅感覺,直到排練後期,開始對自己的兄弟有信心,呢個 show 一定好睇。」
Jeremy :「好多謝呢6場個唱,好多謝大家,多謝VIUTV,多謝兄弟,令我可以完成夢想。」
Alton 發言時代成員多謝家人支持他們行這條路,「這不是一條平坦的路」。
Frankie 鼓勵在場歌迷,「大家堅定自己信念,努力做好自己想做的東西,是會有人見到。」
姜濤壓軸發言前,有隊友笑說,「今次係咩第一?」姜一開聲即高呼「香港加油!」全場觀眾歡呼,十秒後他續道:「香港樂壇加油!」
Jer 同 Anson Lo 則未有發言;而台下的一眾鏡粉就回應大叫:「紅館見」。
隨後眾人再合唱《One And All》為個唱劃上完美句號,姜濤最後亦忍不住流下男兒淚,搭著AK肩膀上,演唱會終在晚上11點半完場,儘管現場已開了大燈,但鏡粉們依然在場內呼叫「Encore」近15分鐘,會場亦播出「離場廣播」籲大家離開。