衛蘭概念大碟 《DAUGHTER》鬆開束縛 極罕黑絲真空上陣
大講「女性自主」搵嚟全女班作歌
Janice全新概念大碟 《DAUGHTER》由構思到完成製作，耗時超過一年，以女性視角去解構「女性自主」呢個主題，希望大家放下成見，同時女性聽眾亦可以透過呢張專輯嘅歌掘到自己嘅唔同嘅女性面向。Janice今次全程參與，由開始到完成、概念同編曲都有佢嘅想法喺入面，仲搵嚟全女班一作歌包括：Serrini、Robynn Yip、SOPHY 王嘉儀、馮穎琪、Kiri T、林二汶、岑寧兒、Cehryl 等，Janice表示「裡面亦都講及女性面對嘅不同問題，例如與兩性關係、女性遇到問題等等，唔單只係關於愛情。」
大碟造型大突破 疑真空上陣
專輯封面花咗唔少心思，首先因為Janice想講表現最真的自己，所以專登揀牛仔褲背心做封面，帶出唔需要好多包裝，要著啲好靚嘅衫先令自己有價值，做最單純做自己就係最靚，所以要擁抱自己同埋愛自己！其次最大突破就係大碟中的其他造型，都係因為今次主題係「女性自主」，鬆開束縛，欣賞自己最赤裸的身體，感應自己最真摯的內心，所以Janice疑真空上陣，瞓喺地上淨係著上一條性感的半透絲襪同埋一件中開白色上衣。Janice仲揀咗於一間爛屋中拍攝，因為設計師同Janice想以此表達女性係非常堅強，所以無論喺任何環境下都能適應，同時展現最美麗的姿態。Janice直言，「所有照片都想表示，女性做任何事最緊要是隨心而發、做到真正自己喜歡才最重要。女性咩年紀結婚？都係由自己決定，唔一定要好傳統咁去做一件事囉。」至於問到性感部份，Janice反映唔係刻意性感，真係第一次去影呢個類型嘅相「想俾世界知道女性可以欣賞自己，喺自己身體裡面可以好舒服咁愛自己。 」希望可以踏出自己舒適區去俾到一種親密嘅一面俾大家睇！
《DAUGHTER》概念大碟歌曲簡介:
Janice表示，每一寸敏感的神經，每一顆感性的心靈，也是上天賜予每一位女性最珍貴的禮物。可是，成長的殘酷、社會的冷漠，輕易使神經受損、把心靈摧毀，女性為了保護自己，迫不得已裹上一層又一層厚厚的衣裳。假使種種束縛使你疲累，請你容許自己至少擁有一張專輯的時間，去鬆開束縛，欣賞自己最赤裸的身體，感應自己最真摯的內心。
- 呼吸之間
曲：Robynn Yip｜詞：甄敏延｜編：賴映彤｜監：賴映彤
假如你活於不安之間，而感到心力交瘁，不如垂下雙手、停下腳步，讓一切be still，專注於自己的呼吸之間。
- 風靡
曲：SOPHY 王嘉儀｜詞：王樂儀｜編：@tombeats.bass｜監：SOPHY 王嘉儀
某天你將化成風，捲走前塵、刮起禁忌、換掉常理，輕盈而自若地風靡整個世界。
- 我的視角
曲：馮穎琪｜詞：馮穎琪｜編：Joyce Cheung / Anna Fan / Anna Lo / XTIE｜監：馮穎琪
當你迷失時，不妨合上雙眼，用一個闡新的角度去凝望，在那盲點的黑暗裡、屬於你的視角裡，找回迷失了的自己。
- Little Miss Janice
曲：Kiri T｜詞：鍾說｜編：Kiri T｜監：Kiri T
你話……女人要高貴大方，女人要出得廳堂入得廚房，女人要斯文有禮，女人要blah blah blah……
你愛嗰個係表面嘅Janice，但你見過真正嘅我未？Ladies and Gentlemen，Little Miss Janice登場。
- 現代戀愛安全手冊
曲：梁嘉茵｜詞：梁嘉茵｜編：許崇謙｜監：許崇謙 / 梁嘉茵
如果愛人之前，不懂得擁抱不安、擁抱寂寞、擁抱自己，如何保護自己脆弱敏感的心臟，如何愛得更「安全」？
- 溫柔暗號
曲：林二汶｜詞：Tim Lui｜編：Soni Cheng｜監：林二汶 / 衛蘭
當你在恍神間突然察覺，房間的燈光化開了，周遭的空氣溫暖了，心跳、呼吸的迴響更加實在了，請你更仔細地、赤裸地感受這份戀愛的感覺。
- Ribbon
曲：衛蘭 / SHIMICA｜詞：衛蘭 / SHIMICA｜編：SHIMICA｜監：SHIMICA
面對你，我願意解開心頭的結，卸下一切，將最真實的自己以優美的姿態呈現你眼前。
- Ghost
曲：衛蘭 / cehryl｜詞：衛蘭 / cehryl｜編：cehryl｜監：cehryl
傷痛所留下的殘影，烙印在你最敏感的神經上，時間洗不走、努力擦不掉，更使你疲累不堪，無力前行。
- sshhh…
曲：岑寧兒｜詞：岑寧兒｜編：Joyce Cheung｜監：岑寧兒
既然你窮盡力氣，傷痛也揮之不去，不如讓它成為你當下的一部份，允許自己擁有片刻的軟弱無力，讓自己在寂靜的空氣中了解它、消化它、感受它。
