飯戲攻心|網民列出7大必睇原因 網民:唔似《闔家辣》啲尷尬笑位!

電影

廣告

黃子華套笑片《飯戲攻心》由農曆新年拖到中秋節先有得播,上映一日已經引來網上熱討,網民更列出7大必睇原因,大家一齊睇睇!

飯戲攻心|黃子華拍《逆流大叔》導演陳詠燊

自從戲院重開,大家都好支持港產片,繼小品作岑珈其《情路山旮旯》、古天樂科幻大製作《明日戰記》跑出後!本月7日上映的《 飯戲攻心》,網上討論度極高!網民指要支持港產片首推《飯戲攻心》,指這套才是真正的港產片,難得不是合拍片又非內地投資,「導演陳詠燊擺明係拍畀香港人睇」。

飯戲攻心
(圖片來源:FB@飯戲攻心)

飯戲攻心7大必睇原因

《飯戲攻心》由黃子華、鄧麗欣、張繼聰、陳湛文、王菀之和林明禎演出,網民列出7大必睇原因:

1.好笑到笑出聲

網民大讚套戲好笑,對白搞笑又貼地,更精心安排首尾呼應,「睇咗兩個鐘都唔覺,無悶場!」,更用吳君如、呂爵安Edan套《闔家辣》比較指「唔似《闔家辣》嗰啲尷尬笑話,《飯戲攻心》啲笑點到位又大眾化,會睇到笑出聲!」、「睇早場八成滿,大家一齊笑到哈哈聲」,又指電影連配樂與鏡頭都出色,是近十年難得的笑片!

飯戲攻心 黃子華、張繼聰和陳湛文演三兄弟。
黃子華、張繼聰和陳湛文演三兄弟。(圖片來源:相關機構)

2.重拍有誠意 有訊息袋走

網民大讚《飯戲攻心》好笑有溫情又放甜,成套戲簡單一個場景五餐飯,睇完仲有訊息袋走,返到屋企仲會回味!「本來係賀歲片,但完全無賀歲片嗰種胡鬧」、「將本身老土講一家故事,講得唔老土又完整」、「以為佢係賀歲片好多做節氣氛,點知唔係,得一場街景講中秋!」據導演所講,原本新年上映因疫情關係延至中秋,但由於電影提及新年的內容好少,最後重拍了一場街景戲!

飯戲攻心 導演陳詠燊同林明禎謝票!
導演陳詠燊同林明禎謝票!(圖片來源:相關機構)
飯戲攻心 林明禎
林明禎(圖片來源:IG@minchen333)

3.黃子華唔似黃子華

有網民指黃子華令人最有驚喜,因為「黃子華喺套戲入面唔似黃子華!」、「黃子華做棟篤笑係好,但搞套戲出嚟就唔得囉,次次都伏,難得今次唔係做自己」、「終於唔係見到平日嘅子華神,佢係演緊另一個人」、「套戲唔係子華一個擔晒大旗,有幾他人幫手好好多」等。

飯戲攻心 網民指黃子華還是專心做棟篤笑同舞台劇,電影交番畀導演、編劇,唔好自己攬上身!
網民指黃子華還是專心做棟篤笑同舞台劇,電影交番畀導演、編劇,唔好自己攬上身!(圖片來源:相關機構)

4.演員好有火花

網民大讚六位演員有默契,好有火花,令人相信六人的戲中關係,「佢哋應該第一次合作,但可以咁有化學作用?」、「子華神配鄧麗欣、林明禎,以為勉強,之前仲笑佢玩爺孫戀,但出嚟效果好正」、「睇到好投入,當咗佢哋成家人嘅關係係真」、「佢哋好似《真情》拍咗幾百集咁!真係好似一家人」。

飯戲攻心 六位演員仲唱埋電影主題曲。
六位演員仲唱埋電影主題曲。(圖片來源:相關機構)

5.Stephy竟然識搞笑

Stephy近年演技備受讚賞,但都是內心戲,對於第一次拍笑片,網民指無諗過Stephy拍笑片都得,「竟然可以搞笑」、「唔知係咪拍住張繼聰,Stephy拍笑片節奏做得好準」、「套戲入面個MV,鄧麗欣做到嗰陣膠味,笑到痲!」

飯戲攻心 Stephy卻在IG留言指好緊張又預告謝票日期。
Stephy卻在IG留言指好緊張又預告謝票日期。(圖片來源:IG@stboo)
飯戲攻心 Stephy在戲中演黃子華前度,張繼聰現任女友!
Stephy在戲中演黃子華前度,張繼聰現任女友!(圖片來源:相關機構)

有片!睇吓有幾膠!

6.估你唔到林明禎唔係花瓶

大馬女神林明禎飾演子華的後生索女友,大家都諗住睇靚女,網民指原來唔係花瓶作用咁簡單,角色好重要,「林明禎拍住子華令劇情大推進,係成套戲關鍵,係化解全家人嘅工具人」、「唔知係咪比子華神調教過,竟然林明禎啲戲又唔差喎」。

飯戲攻心 林明禎在戲中飾演黃子華女友﹗
林明禎在戲中飾演黃子華女友﹗(圖片來源:相關機構)
飯戲攻心
(圖片來源:相關機構)

7.客串好驚喜

除了六位主要演員,網民又指客串演員安排好有心機,在《梅艷芳》中演姊妹的廖子妤,竟然同黃子華關係變母子,網民指出場時好有驚喜,估唔到電影尾聲仲有得笑﹗

飯戲攻心 廖子妤與子華神《毒舌大狀》再合作
廖子妤與子華神《毒舌大狀》再合作(圖片來源:ig@fish331)
飯戲攻心
(圖片來源:相關機構)

《飯戲攻心》故事大網

一個家,最緊要齊人開餐。深信此道的大佬(黃子華 飾)廚藝麻麻,唯有長期用心靈雞湯式金句「餵大」兩個細佬,但異父異母的二佬(張繼聰 飾)及同父異母的三弟(陳湛文 飾)其實覺得大佬有點老土。幸好大佬請來三弟的廚神級女友(王菀之 飾)為三兄弟包伙食,一家人終於有啖好食,每晚8時的飯局亦令兄弟更添和睦。但隨著二佬女友(鄧麗欣 飾)的加入,飯桌氣氛即時變得燶味十足,皆因二佬女友竟是大佬最念念不忘的前度﹔為免以後餐餐背脊骨落,大佬唯有臨時揾個哎吔女友(林明禎 飾)一齊撐枱腳。從此,每晚6人同枱,味蕾滿足,閒話家常,卻舌尖有伏,總之嗒落就知味道…《逆流大叔》導演陳詠燊笑聲主理,今個中秋約定你齊人開飯啦!

《飯戲攻心》有什麼必睇原因?

網民指要支持港產片首推《飯戲攻心》,有7大必睇原因,首先網民大讚套戲好笑,對白搞笑又貼地,更精心安排…詳情請看

《飯戲攻心》故事大網是?

一個家,最緊要齊人開餐。深信此道的大佬(黃子華飾)廚藝麻麻,唯有長期用…詳情請看

圖片來源:IG@stboo資料或影片來源:YouTube@安樂電影