過時·過節丨導演曾慶宏親解負評 袁澧林大爆毛姐似足「媽媽」（含劇透）
袁澧林：毛姐似足媽媽！大爆前輩趣事
Angela表示今次拍《過時·過節》時同眾前輩相處都有唔同的趣事，大爆毛姐sweet爆，對 Angela照顧有加，謝君豪就私底下fun爆勁專業，而最深刻就係同馮素波於老人院的一個場口，當時係同馮素波剖白爸爸的離開，笑指馮素波真人太生猛，所以被要求要「老啲」，馮素波一入戲後就令Angela都同時入戲，成為佢一份難忘的經歷。而再指毛舜筠的角色似足自己媽媽，令自己百感交集，自己睇返都喊爆，仲因為電影令自己反思同家人的相處之道，大爆早前同家人面對問題、爭執時，自己學識走出嚟解決問題、和解，成長不少。
影評兩極導演：「全局的重要性」
《過時·過節》上映後評論兩極，有觀眾就認為好好睇又有共嗚，有觀眾就認為電影中有許多不明不白的地方，例如電影唔係單線主角出發，而係講晒全家人的諗法，令到觀眾睇到有啲亂。曾慶宏導演就認為「全局的重要性」，講一家人的電影，就應該講晒一家人，而且希望令人唔好單角度去睇一件事，就好似電影中講到，一段關係唔止一個人，大家要互相理解對方。
Edan中學生離家出走不合邏輯？
另外，唔少人指電影某啲位邏輯性不足，例如Edan中學時期就獨自離家出走，點樣兼顧到租屋、讀大學等生活開支。曾導演就笑言如同電影一句對白咁講，想做就會做到，係人哋做唔到啫，原來呢個真係導演親身經歷嚟，所以真係無辦法解釋，只能講世界太多不同的人，所以電影先會有啲觀眾有共嗚，而有啲就不能理解。
家姐唔係可有可無 反思家庭與個人
談善言演家姐嗰條線好多網民狠批「可要可唔要」的一段，對電影「家庭」呢個主題的推進不大，導演就指呢個係從角色出發去思考，因為阿談的角色就似一個家庭中的「隱形人」，容易迷失，所以導演就認為要安排阿談要勾起「隱形人」的共嗚，以及就算睇落佢做的事同「家庭」呢個主題不大，但其實係環環相扣？強調每個人的行為其實總會受到原生家庭所影響，並唔係單向，大家可細想當中！
電影原來有「mirror」？
電影不少鏡頭的運用都被大讚，問到曾導演點解採用咁多「對鏡攝影」的手法時，就解釋係想豐富畫面，以及俾觀眾去了解更多。edan與anson lo的戲碼中都有出現鏡子的運用，曾導演就笑指「mirror呀嘛」！最後電影影晒成間屋的畫面被唔少人大讚，原來曾導演係想大家可以抽離、拉遠返去睇事物，暗示有時睇嘢要企遠啲睇，可能會更清晰。
袁澧林：
Hair：Cooney Lai @hairby_cooney @ilcolpo_onlan
Makeup：Jenny Shih @Jennyshih_
Stylist: Daniel Cheung @danitorial
Venue：紅棉
