【內含強烈洋蔥！】法國神人自製3D動畫向宮崎駿致敬

Jul 31 2015

每個人對自己尊敬嘅人都有其致敬方法，例如對籃球之神，粉絲會模仿佢嘅球場上每一個動作；對女神，可能會__ __致敬。不過呢位嚟自法國嘅動畫師Dono、身為宮崎駿嘅粉絲就最威，因為佢製作咗3分幾鐘嘅動畫向日本動畫大師宮崎駿致敬！

text-專題組

嚟自法國嘅Dono本身都係動畫師，佢用3D畫風製作多個宮崎駿動畫名場景，包括《千與千尋》嘅澡堂；《飛天紅豬俠》嘅酒吧；《風起了》嘅古塔等，再將宮崎駿嘅動畫去背景後再key上Dono製作嘅3D場景。雖然話短片得4分幾鐘，但所有作品嘅主角都有登場，就好似睇緊「超濃縮」宮崎駿作品展，再加上熟悉嘅久石讓音樂墊底，筆者睇完真係有份莫名嘅感動，睇到眼濕濕！

唔好以為Dono用到好專業嘅動畫軟件，實際上都係啲幾乎免費嘅平民軟件：3D效果用Blender做，去背景軟件係GIMP，處理合成效果就用NATRON。其實大家都可以學Dono一樣制作高水準短片，問題係你要有Dono對大師同樣程度嘅熱愛：煲晒所有動畫 + 記低每個有用嘅場面 + 花上以日計製作時間，你又做唔做到先？