【Gift Idea】銅鑼灣希慎廣場9大精選心思 聖誕禮物推介

大家應該排好晒大大小小嘅聖誕Party喇，至於重點環節：交換禮物，你哋又預備好未？過往每逢到呢個環節，一定有人收到：水杯、頸巾、毛公仔，呢3大最唔想收到嘅 聖誕禮物 （又或者你都曾經係收到嗰個）！如果唔想令收禮人嬲豬，兼影響自己潮人形象，就要預備一份有心思嘅禮物喇。

唔好以為希慎廣場淨係有大品牌，其實裡面進駐咗好多只此一家嘅小店。身為有生活態度嘅潮人，買聖誕禮物梗係唔可以求求其其，以下分咗文青系、日韓風女生組別，同埋手作雜貨嘅聖誕禮物推介，睇睇你有冇心水？

文青系 聖誕禮物推介

有冇發現眼鏡經常係文青一族嘅潮流icon之一？無論有冇近視都好，一幅有型別致嘅眼鏡已經可以將率性個性寫晒出嚟。潮人未必鍾意追捧大牌子，反而襯一兩件古著，更能突顯佢哋mix & match嘅配搭功力。

1. Reddot Optic

一副時尚眼鏡係好多文青嘅must-have item，呢度嘅鏡框多數來自歐洲、日本嘅流行品牌，啲款又多又特別，輕易就可以揀到一副突出個人品味嘅款式，作為送禮之選夠晒特別，分分鐘你會忍唔住揀多副送畀自己！
店舖：Shop 418-419

2. WORKWARE—Heritage Clothing Company

古著風多年來都係不死嘅潮流風格，簡簡單單一件tee加件古著牛仔褸，已經好有vintage味道！韓國男女生都好鍾意一件大褸裡面加件牛仔褸！呢間美式古著店專賣軍服、工裝、美式復古男女裝，而且仲創立復刻品牌3 Days Union，聖誕絕對可以考慮送件古著牛仔褸畀朋友！
店舖：Shop 420-421

日韓風女生組別、Party Look之選

日韓風持續大熱，身邊閨密總有幾個熱愛呢種隨性不經意嘅打扮，以日韓服飾或單品作為閨密嘅 聖誕禮物 ，都係唔錯嘅gift idea。買物嘅時候，仲可以為自己物色party look添！

3. Solitude

呢間集日韓品牌嘅時裝店走輕熟女路線，服飾設計靈活多變，顏色唔單調又有層次感，好多年輕OL都鍾意嚟呢度shopping入貨。呢排凍咗咁多，又有血拼嘅藉口喇！
店舖：Shop 315

4. Tunique

頸鏈、手鏈、耳環等飾物主打法國率性路線，設計簡約得嚟，喺細節上有心思，好容易就襯到任何服飾，最重要係價錢唔算貴，買嚟送畀姊妹最啱，聖誕期間買滿$1,200，仲送法國設計師品牌Mamette嘅純銀心心手鏈！
店舖：301A

5. Pinkicon

想打造party look，喺彩妝、髮型入手之餘，仲可以戴埋color con！大熱彩色隱形眼鏡網店已有實體店，仲登陸咗希慎廣場。店內有多款又新而舒適度高嘅color con，以後可以慢慢行睇心水產品，唔使網購喇！
店舖：Shop 518

手作雜貨

香港有好多充滿本土特色嘅手作小店，佢哋嘅手作小物精品、雜貨、擺設、家品都好精緻，有啲仲係獨一無二添，送畀戀家一族啱晒！

6. 美樂士多

小店以香港懷舊實景作為主題，賣嘅都係本地同唔同地方嘅特色零食。今個聖誕佢哋再推出「懷舊聖誕老人襪」，裡面有眼鏡朱古力、印水紙吹波膠、煙仔朱古力等，收到肯定兒時回憶返晒嚟！
店舖：Shop 519

7. DEMK

聖誕、冬日喺屋企點住香薰蠟燭，特別有節日氣氛，又令人感覺溫暖。呢間小店除咗有多件本地同來自世界各地嘅手工精品之外，店主更推介Luka Candles，喜歡宅在家或開home party的朋友收到應該好鍾意。
店舖：401A

8. HKMO

如果你嘅朋友鍾意比較偏鋒、鬼馬刁鑽嘅禮物嘅話，呢間雲集多個本地個性手作同設計師品牌嘅design shop，可能會搵到唔少心水精品，佢哋一啲別致家居擺設、金屬飾品都係限量製造㗎！
店舖：Shop 715-716

9. HKID Gallery

集多個設計師嘅手作，所以路線同產品種類都比較闊，由文青風手作飾品、手繪創意插畫卡片，到得意實用生活小物，好似皮製眼鏡套、散紙包都有，為唔同個性嘅朋友挑選禮物應該唔難！
店舖：Shop 520

希慎廣場

網址：https://hp.leegardens.com.hk
Facebook：Lee Gardens
Instagram：leegardenshk