$300 Budget深圳一日遊!必去文青小店打卡+呃like下午茶+麻辣火鍋!

生活

廣告

深圳近年愈開愈多文青小店、靚Cafe,唔少香港人都會趁住周末,約班好朋友一齊上去影相打卡!唔想每次來來去去,都係飲喜茶、食個海底撈就返香港咁齋,不妨參考一下以下的特色小店,就趁住今個周末,約閨密一齊上去玩啦!

撰文:Cynthia@新假期周刊|攝影:Fion

$300內深圳勁食行程推介

比起香港,深圳消費真係平啲,以下面4間cafe 為例,每間人均大約RMB 50-80就可以捧住個肚走。甜品的價錢大概在RMB20-40左右,比起香港真係平好多!而麻辣火鍋兩個人食會貴少少,多人share 湯底的話,叫好多都係每人百幾蚊!

深圳2人同遊 一日消費
午餐 逸塔花園 大蝦牛油果米紙 RMB32/HK$40
薯條 RMB22/HK$27
雙人特調水果茶 RMB45/HK$56
下午茶 鄰間 雙人銀針茶 RMB52/HK$65
半熟蛋糕2件 RMB38/HK$47
晚餐 大龍燚火鍋 湯底+6樣食物+飲品 RMB257/HK$319
車費 約RMB20/HK$24
總數:HK$295/人

 

深圳美食遊 必去南山區

深圳除咗幾個港人最熟悉的大商場:萬象天地、歡樂海岸、華僑城外,想搵文青特色小店,一定要去南山區!最近的口岸是深圳灣,出發到南山區的小店一般車程在30分鐘左右,可以一日內玩完成個區域!

1. 熊大迷必去 可愛Line Cafe

香港有不少熊大迷,但可惜等極都等唔到Cafe開業,但Line Cafe 早就開在深圳,fans 點都要去朝聖一下!Line Cafe 位於海岸城2樓,最近的地鐵后海站D1出口,一出去就見到,非常易搵!

Line Cafe 的打卡影相位超多,門口大大個熊大任影唔嬲,店內仲有巨型Choco 歡迎你!特別的粉紅色區域設計成熊大、Choco 的家,可以慢慢影相。

餐飲方面選擇都唔少,首推下午茶時段的2人tea set,RMB138包兩杯飲品,鹹點、甜點加埋有6款,煙肉卷最好食,而迷你漢堡上面仲印咗熊大個樣,細節加分!

甜品同樣好吸引,瑞士卷、布甸、奶酪杯等統統都係熊大、Cony的造型,可愛到唔捨得食!

除了Cafe 輕食外,另一邊還有酒吧區,晚上會提供手工啤酒,可以配Burger、薯條,同熊大飲番杯!

飲飽食醉之後,又係時候掃貨幫助消化!有過千件貨品的Line Store可以慢慢掃,產品比香港更加齊全,仲有超巨型的軟綿綿公仔賣!

Line Friends Cafe & Store
地址:深圳南山區文心五路33號海岸城購物中心二層203-205舖

2. 抹茶控必去 初代抹茶

去完Line Cafe 覺得未夠飽,不妨行多5分鐘,去附近的初代抹茶食甜品!喺全中國有一百間以上分店的初代抹茶,採用來自京都宇治「丸久小山園」的抹茶粉,有品質保證!

初代抹茶雖然細細間,2層的位置唔算多,但勝在坐得都幾舒服,仲有一個和室小間!加上設計非常日式,櫻花、各種日式小擺設,都非常適合影相!

主打的原味抹茶千層好受歡迎,足足有40層的千層蛋糕,20層抹茶cream 加20 層班戟皮,食落非常creamy 軟滑,而且一件只需RMB28,比香港好多甜品店平一半!

另一款必食的抹茶大福,RMB22 有兩大粒,店員表示係剛剛整好,所以糯米皮會較腍。用叉一壓就可以感受到大福的軟綿,入面是抹茶忌廉加粒粒紅豆,一啲都唔會滯!

飲料方面的選擇亦多,喜歡芝士奶蓋的話大推抹茶芝芝,怕太滯的話可選抹茶拿鐵,一開蓋就可以聞到抹茶的香味!

初代抹茶
地址:深圳南山區文心六路海岸城東座二層216號

3. 花海夢幻Cafe 逸塔花園

想在深圳搵一間有質感的文青Cafe,絕對不是難事!南山區的逸塔花園,距離最近的桃園站大概行8分鐘,不算難找!

逸塔花園非常大間,一入到去就會見到闊落的用餐區,左邊的區域是圖書館,可以休閒地閱讀,而右邊有大量的植物做裝飾,有種在大自然野餐的感覺!

想要影靚相的話,一定要去右邊的用餐區,一大片的落地玻璃,在陽光的照射下影相超靚!其中一面牆被設計成一格格,放滿細細個盆栽,好適合影相!

食物方面的選擇很多,唔好以為cafe 就只有甜食,逸塔花園主打泰國菜,網友食過大推辣烤雞翼、菠蘿炒飯、冬蔭功湯,而記者實試牛油果蝦卷,用料實在又清新!

除了泰式小食外,最好食的絕對是薯條,熱辣辣又夠脆!士多啤梨鬆餅相對來說比較一般,食落較飽滯,士多啤梨連葉都無剪走,食嘅時候都好唔方便!

逸塔花園
地址:深圳南山區金雞路田廈翡翠明珠七巧國2樓

4. 休閒文青書店 鄰間

深圳的書店好多都唔係就咁買完書就走的地方,而係會連住cafe,讓客人買完之後,可以即時坐低慢慢睇!位於南山區的鄰間(Lingers),就係其中一間有風格的書店。

鄰間唔算大間,餐飲區大概只有10張枱,平日下午去到人唔算多,可以安安靜靜地食個cake,睇睇書,放鬆一下。

店內只有小蛋糕供應,記者試了朱古力、士多啤梨芝士蛋糕,味道統統不錯!食落唔會過甜,亦無奇怪化學味,好值得一試。

怕食太多甜食會滯,推薦叫一壺茶同閨密慢慢飲,白色的茶壺好有質感,淡淡的茶香好舒服。店家仲準備了果乾,酸酸甜甜配茶一流!

現場的書可以借完即睇,而樓上都有個小區域,係有免費翻閱的藏書,拎住壺茶上去,邊飲邊睇書,非常放鬆!

鄰間
地址:深圳南山區科苑大道阿里巴巴大廈T4座1層27號

5. 南山大道 火鍋一條街

去深圳次次都係食海底撈,覺得好無新意的話,其實各大商場都有好多人氣火鍋店,而位於南山大道的火鍋一條街,有多間出名的火鍋店,其中有好多間已經開到香港,今次就試試香港未有,又好受歡迎的火鍋店大龍燚啦!

正宗麻辣火鍋 大龍燚

來自成都的大龍燚喺深圳非常出名,記者平日6點左右到達,門口已經排晒長龍,好彩仲有細枱可以坐!一入到去,就聞到超濃烈的辣椒味,平時無食開辣的話,可能會頂唔順!

店內採微信落單,可以自己用電話揀湯底、食物,落單要鴛鴦鍋微微辣,中間白湯,外圍是布滿辣椒的紅湯,聞到都已經流晒口水!

食材的選擇比海底撈少,主要是少了海鮮,而且無得揀半份,人少的話唔可以試太多。不過每次都會食的肉類、丸類、菜、菇等都有齊!

牛肉肉味濃,一碟RMB38唔算貴,而牛黃喉、水魷等打邊爐必食,落紅湯吸辣汁夠過癮!雖然只係微微辣,但已經比海底撈辣好多,重口味者必試!

怕辣的話,可以開一罐罐的芝麻油,倒入碗再加蒜、葱,更加惹味!唔好以為油淋淋好可怕,呢個係四川人的正宗食法,去食的話不妨一試!

食完太多辣嘢,可以試試店內最出名的炸麻糬,炸好的麻糬點一點黃豆粉同醬,入口煙韌好香口,打完邊爐必試!

大龍燚
地址:深圳南山大道2009號一樓D區

 

内容延讀:
【全部$100有找】紙番梘你用過未?14款淘寶旅行裝備推介
>>>Like我們FB<<<
https://www.facebook.com/newmonday.com.hk/

 

 

 

香港有甚麼地方適合與閨密、情侶,一大班朋友去?

與閨密、情侶約會的話,當然要選擇氣氛好的地方啦!全港12間必去天台酒吧 都超有feel,傾得興起難免會飲多幾杯,如果出現這些醉酒特徵 時就要適可而止了!返工返到攰,不如一齊去按摩店鬆一鬆,油尖旺按摩店 非常多,實有一間啱你。一大班朋想熱熱鬧鬧,燒嘢食最好不過了,即刻熟讀BBQ技巧7式 ,包你喺燒烤場上戰無不勝!

家居清潔有甚麼好方法?

家居清潔非常重要,做不好隨時影響健康!很多人因為床褥體積大不容易洗滌,而忽略了床褥清潔,即睇5招床褥清潔方法;冷氣機內外都容易累積大量灰塵,洗冷氣機方法好簡單,輕鬆洗走灰塵黴菌。當然做足家居清潔都不能避免曱甴入屋,10種有效消滅曱甴攻略幫到你!