調酒教學|5款冬天必備熱調酒推薦 聖誕派對必備又暖胃!

生活

廣告

調酒教學|前排香港氣溫跌到單位數字,無時無刻都想飲熱嘢暖胃,順便暖埋對手。講到暖胃飲品,其實除咗一碗暖湯、咖啡或者經典嘅樽裝熱維他奶,一杯熱調酒都係唔錯嘅選擇,仲可以促進家人/朋友之間嘅關係,尤其情侶之間嘅更可以當成一種情趣。以下介紹幾款熱調酒,全部都可以喺屋企整到,睇完即刻整返杯都得!

調酒教學1. 西班牙熱調水果酒Sangria

講到最經典嘅家庭式調酒,非Sangria莫屬。佢係西班牙同葡萄牙傳統餐飲,主要係以紅酒為基底,加入少量白蘭地及梳打水,再混合切片或切粒嘅生果(橙、青檸、檸檬同蘋果為主,但亦可以加蜜桃、哈密瓜、蔓越莓、提子等等)、橙汁以及蜂蜜/糖漿。

最特別係,Sangria有冷飲同熱飲兩個版本,冬天作為熱調酒會先將紅酒及生果,用鍋子煮熱釋出香味嘅同時,又可以揮發部份酒精,部份食譜更會加入肉桂和丁香。Sangria簡單啲講就係一杯加咗生果嘅熱紅酒,有果香之餘亦易入口,絕對係暖胃首選!

調酒教學
(圖片來源:Youtube@糖餃子Sweet Dumpling)

Sangria熱調酒詳細教學:

調酒教學2.熱紅茶+Baileys奶油利口酒

Sangria雖然經典,但又要切生果又要煮,可能會嫌麻煩。得!紅茶茶包你有冇?先沖一杯紅茶,再以個人喜好加入適量嘅Baileys奶油利口酒,一杯有奶茶版嘅熱調酒就大功告成,因為Baileys本身有一定甜度,所以連糖都可以慳返。基本上兩個步驟,沖茶再加酒就搞掂,但如果想味道更明顯,建議可以先用煲煮茶,茶味會更出!

調酒教學
(圖片來源:Youtube@FLAIR IRON香港調酒工作室)

Baileys「熱奶茶」詳細教學:

調酒教學3. 熱牛奶+Gin酒

除咗Baileys版嘅「熱奶茶」,仲有一款屬於奶類嘅熱調酒。首先要準備嘅係普通盒裝牛奶,配以有驅寒功效嘅辛香料八角、肉荳蔻喺煲內煮至溫熱(注意:牛奶加熱會好易滾瀉,建議畀啲耐性用細火加熱),並加入適量Gin酒,濃郁嘅奶香同Gin酒清爽嘅風味,估唔到會咁夾,尤其睡前一小杯,保證超好瞓!

調酒教學 呢種調酒其實本身叫Milk Punch,傳統會用白蘭地調製,但轉用Gin酒嘅「GinMilk Punch」口味會比較清爽,而Gin酒方面我會推介帶花香嘅日本Gin酒「ROKU」。
呢種調酒其實本身叫Milk Punch,傳統會用白蘭地調製,但轉用Gin酒嘅「GinMilk Punch」口味會比較清爽,而Gin酒方面我會推介帶花香嘅日本Gin酒「ROKU」。(圖片來源:ROKU Gin)

調酒教學4. 熱朱古力+威士忌

將熱朱古力飲品加入Whisky,其實即係另類版嘅酒心朱古力,冬天沖完杯「熱朱」不妨加入少量Whisky,絕對係另一個層次,一入口先會有Whisky香氣,再嚟就係濃濃嘅可可風味!至於用咩Whisky最夾?雖然冇乜限制,但建議選擇蘇格蘭以外產地嘅Whisky,因為大部份蘇格蘭Whisky都帶有「泥煤風味」(如有錯歡迎提出),用冇泥煤風味嘅Whisky,會更加順口。

網上較為推薦嘅Whisky分別有Fireball同Crown Royal,咁啱都係嚟自加拿大嘅Whisky,前者帶有桂皮風味,而後者則有雲呢拿口味。

威士忌「熱朱」詳細教學:

調酒教學5.熱蘋果酒

最後一款係喺英美地區頗為常見嘅熱調酒,尤其節日如感恩節、聖誕節嘅出場率甚高。做法方面亦唔難,首先係煲倒入便利店有售嘅Apple Cider,加入橙皮、青檸皮及生薑片,再嚟又係肉桂同丁香,一煲過用細火慢煮10分鐘左右,然後過篩後即可飲用!

調酒教學
(圖片來源:Youtube@酒肆煮夫94zufu)

熱蘋果酒詳細教學:

有甚麼暖胃飲品推介?

講到暖胃飲品,其實除咗一碗暖湯、咖啡或者經典嘅樽裝熱維他奶,一杯熱調酒都係唔錯嘅選擇!即睇:5款冬天必備熱調酒推薦

在家也可以自己調酒嗎?

以下介紹幾款熱調酒,全部都可以喺屋企整到,睇完即刻整返杯都得!詳情請看

撰文: K.P.|編輯:海月圖片來源:Youtube@糖餃子Sweet Dumpling、Youtube@FLAIR IRON香港調酒工作室、Youtube@ FLJ凌王、ROKU Gin、Youtube@酒肆煮夫94zufu