中西大師合壁 香港人情味
呢個現象，旅居香港20年嘅宗師攝影家Michael Wolf都感受到，於是佢聯同另1位資深藝術大師何藩，喺柴灣舉行「Hong Kong Narratives」，展出佢哋幾十年嚟拍攝嘅香港相片。
透過呢兩位一中一西大師眼中嘅老香港，你可以感受到香港久違嘅地道人情味。
text – Oscar photo – Hin、Blue Lotus Gallery, Hong Kong提供
全能藝術大師
唔講唔知，原來兩位大師唔算熟，只因佢兩位都識今次嘅展覽搞手Sarah Greene，Sarah話：「我識咗佢哋好多年，知道佢哋兩個都好鍾意走遍香港每個角落影相，但風格就好大分別。呢幾年香港變得咁快，我就靈機一觸，撮合呢個展覽。」
雖然參展嘅其中1位攝影大師何藩唔喺香港，冇機會做訪問，不過佢十分猛料，今年已經77歲嘅佢一生傳奇，喺上海出生後，隨家人移居香港，1958年已經獲得攝影十傑冠軍，又曾經加入邵氏，做過演員，亦拍過實驗電影，作品獲選入不少國際電影節。佢目前已經退休，現定居美國，被喻為香港最多才多藝嘅藝術大師。今次展覽嘅相片，都係佢攝於5、60年代嘅香港，從其黑白作品中，可以感受到當年香港純樸嘅生活。
60年代生活艱苦，細路都要幫手做嘢，呢幅小童掃街圖，太陽光就好似spotlight咁照射喺主角身上，盡顯大師功架。
愛香港後巷
另1位大師Michael亦十分猛料，佢曾跟隨德國攝影大師Otto Steinert學影相，畢業後喺歐洲同美國做自由記者，94年40歲時，佢覺得事業去到樽頸位，於是來港發展。「嗰時嘅中國，對於歐美人士係個好神秘嘅地方，再者我聽聞香港係美食天堂，剩係呢兩樣都一定要嚟啦。」Michael就咁嚟咗香港生活，一留20幾年。
Michael話香港最吸引佢影嘅係建築物。「香港嘅建築風格同其他城市好唔同，首先樓宇間密度非常高，世界上冇地方可以好似香港咁，舉頭可以望唔到個天；另外香港啲後巷亦好獨特，喺入面可以見到人生百態，有人蛇王、有人開工、有人食煙、有人晾手套、地拖，喺歐美一定搵唔到。因為香港後巷治安好得多，美國嘅後巷好危險，正常人唔會行入去，否則死咗都唔知咩事。」
對現今香港失望
今次Michael攞晒佢歷年嘅精選作品出嚟，港人對於相中嘅風景，一定好有親切感。不過Michael對香港近年嘅發展，坦言非常失望。「我曾經諗過喺香港終老，不過近年香港發展得太『怪』，例如社區重建令社區冇晒風格，灣仔、深水埗等地方都變成設計清一色、完全冇活力嘅摩天大廈；加上近年政制發展都趨向只對內地人同商家獻媚，香港大眾反而冇乜得益，令我非常心痛。我近排走去油麻地同尖沙咀同啲街坊傾偈，發現佢哋好多都唔開心，冇咗我初嚟香港時見到佢哋嗰種活力。不過去年嘅雨傘運動，見到好多年輕人有勇氣同膽量抗爭2個幾月，我非常欣賞同佩服，令我覺得香港都重值得留低。」
「Hong Kong Narratives」展覽
日期：即日起至3月28日
時間：11:00am-7:00pm
地點：柴灣豐業街12號啟力工業中心A座5樓A04室
費用：免費
查詢：www.bluelotus-gallery.com.hk
延伸內容：
香港有甚麼地方適合與閨密、情侶，一大班朋友去？
與閨密、情侶約會的話，當然要選擇氣氛好的地方啦！全港12間必去天台酒吧 都超有feel，傾得興起難免會飲多幾杯，如果出現這些醉酒特徵 時就要適可而止了！返工返到攰，不如一齊去按摩店鬆一鬆，油尖旺按摩店 非常多，實有一間啱你。一大班朋想熱熱鬧鬧，燒嘢食最好不過了，即刻熟讀BBQ技巧7式 ，包你喺燒烤場上戰無不勝！
家居清潔有甚麼好方法？
家居清潔非常重要，做不好隨時影響健康！很多人因為床褥體積大不容易洗滌，而忽略了床褥清潔，即睇5招床褥清潔方法；冷氣機內外都容易累積大量灰塵，洗冷氣機方法好簡單，輕鬆洗走灰塵黴菌。當然做足家居清潔都不能避免曱甴入屋，10種有效消滅曱甴攻略幫到你！
