深圳周末遊懶人包!唔使$1,500去觀瀾湖2日1夜 + 6大必試活動推介

星期六、日想同另一半、家人或者閨密來個短線遊,2日1夜放鬆一下的話,唔少人都會揀去澳門。但玩多幾次覺得厭?不妨考慮一下近少少的深圳啦!唔好以為深圳只有喜茶海底撈一日就玩完,其實有唔少度假區又平又抵玩,今次率先為大家介紹位於龍華新區的觀瀾湖,點樣玩足兩日一夜!

撰文:[email protected]新假期周刊|攝影:Fion

深圳觀瀾湖親子、情侶遊

深圳觀瀾湖位於龍華新區,地點來說其實不算方便,好在皇崗口岸有專車接送,搭30分鐘左右就會到達園區。園區裡面也有免費的Shuttle bus,接駁往來不同景點,包括高爾夫球場外、手作工藝坊、靚cafe、度假酒店、生態體育園等等,可能兩日一夜都唔夠玩,一齊睇睇以下食、玩、住的行程推介!

推介1 手作工藝體驗

在玩方面,觀瀾湖毫不輸蝕,有各種文青最愛的傳統手作工藝,包括有皮藝、布藝、紙藝、木藝、陶藝、金工及玻璃,可以在專人的指導下,親自落手落腳試玩試做,完成之後還可以把成品帶回家,好有紀念意義。

記者參觀的時候,剛好遇到一大班小朋友在上藍染課,由於工藝區不時都有免費的體驗課程,歡迎大人及小朋友參加,因此經常都會十分熱鬧!而老師會先教授染布的相關知識,再讓小朋友親手去做,還有拼貼布、做衫等課程。

好多情侶都喜歡送皮革製品畀另一半,親手製作更有意義!皮藝課程讓大家可供即場製作passport 套、銀包、手環、卡片套等都無問題。另外金工堂還可自製耳環及戒指,好有心思!

記者當日最期待的就係燒玻璃,但好可惜燒爐壞咗,所以無法體驗,如果想試的話,安全起見都要提早幾日book定!

如果唔想花太多時間做體驗,又想行行文青產品的話,藝工場的底層就是逛逛的好地方,裡面的產品全部都是由著名工藝大師製作而成,當然價格都相對較貴,不過亦不妨Window Shopping,欣賞一下。

推介2 大量打卡Cafe、酒吧

對於各位女生來說,其中一個不能沒有的行程,就是打卡。觀瀾湖新城藝工場設有一連3間風格各異的Cafe,想打卡或者hea番一個下午的話,就記得去了!

近期花花cafe成為大勢,鮮花加上書店的搭配,自然係最佳的影相地點。蔓花園設計十分用心,無論是吊燈、木書架還是藤椅,都營造了一種非常放鬆的感覺,加上人流不多不算嘈吵,可以慢活一下。

不喜歡太少女,走型格路線的Gee Coffee Roasters 肯定更合意,由香港咖啡達人Felix Wong(黃劍斐)所管理,走的是精品咖啡路線,喜歡細細品味咖啡的話,可以同閨密或男友一齊去歎番杯。

想去Live House聽音樂,就可以揀酒吧紅糖罐,入面環境好Chill, 聚集了好多玩獨立音樂的人,就連王力宏的MV都在此拍攝,可惜記者中午前往無咩睇頭,相信夜晚一定會好玩得多!

推介3 Hard Rock 平價自助餐

作為中國唯一一間Hard Rock,深圳依然保持了酒店原有的搖滾音樂精神,四處掛滿的結他、巨星舞台裝、黑膠唱片,都可以感染到遊客!

Hard Rock 自助晚餐一位只需RMB288/HK$357,老實說一點都不貴,因為選擇夠多!重點回本區的凍海鮮有蟹、青口、蝦、蜆、螺及瀨尿蝦等,選擇不少!

不過最值得欣賞的,是有很多即製的食物,包括牛扒、羊架、帶子、魚等全部任你揀,廚師再即場在開放廚房燒,即燒即食仲正!

熱盤有不少都是海鮮類,唔想食太多生冷嘢可以一戰!而最特別還是有即煮的四川冒菜,加入麻辣的湯汁,重口味者必試!

甜品同樣都不輸蝕,除了一般的蛋糕外,還有即製pancake、炒雪糕、朱古力及士多啤梨噴泉,不過朱古力漿感覺太稀,有點失色!

推介4 高質西餐廳

不想花太多錢食自助餐,觀瀾湖園內的餐廳質素也不錯,當中以THE PATIO CAFE 最值得推薦,餐廳內行英倫風,一家大細或者成班朋友一齊聚餐都可。

餐廳內的食物都水準不俗,當中以燒雞最令人驚喜,雞皮燒得十分香脆,而肉質依然可以保持嫩滑,一點都唔會覺得嚡!

店內還有新鮮的果汁,以及每天出爐的麵包!賣相吸引之餘,更加是香氣撲鼻,每晚6點過後,麵包更有買一送一的優惠,唔少客人都會買個做早餐。

推介5 閨密齊歎亞洲最大Spa

玩足全日飲飽食醉,自然想做番個Spa歎一歎,園區內擁有亞洲最大的Spa水療中心,體驗服務很多,包括有驅寒全身按摩、水療面部護理、淋巴排毒等,甚至還有親子及男士專享的水療套餐。

推介6 舒適酒店環境

坐落於高爾夫球場內的酒店,酒店房間配套設施都十分齊全。一共有188間房,6個房型,由於四周被植物包圍著,因此露台對著的景色一般都是植物或高爾夫球場,令人十分放鬆。不過可能春天的關係,記者覺得濕氣較重,床褥、家具都有少少笠。

房間的空間感十足,樓底較高壓迫感沒那麼重,加上巧妙地運用了玻璃、鏡等的設計,令整體感覺更加開揚。以55平方米的高級豪華客房為例,兩個人入住非常闊落,還可以在陽台看看美景。

每間房內都有一套的茶具以及茶葉,想要飲用就要另外畀錢,不過就有種中國風的味道。而酒店在客人入住之前,都會先在房內點上香茅味的香薰,記者就覺得有點似蚊香,不過都唔會難聞。

睡醒可以再去山景閣食個早餐再check out,選擇應有盡有,還會即場製作奄列及湯麵,相當有心思!

套票推薦:

想去觀瀾湖玩,最平最抵最方便一定係訂套票,有齊酒店、交通接送、各種玩樂設施,比自己訂房抵好多,即看以下兩大精選套票!

觀瀾湖雙人蜜運套餐

二人價錢HK$1,480,包觀瀾湖度假酒店山景高級豪華客房一晚;自助早餐;自助晚餐一次或$500餐飲現金券;高爾夫球體驗;6選1手工藝體驗一次;穿梭巴士;羽毛球、壁球等球類活動,以及生態體育園內的機動遊戲,超級抵玩!唔想玩體驗想做Spa ,可揀「觀瀾湖雙人蜜運套餐 B」,但就不包晚餐及遊樂場套票,總有一款啱心水!

觀瀾湖2天1晚親子主題度假套餐

如果想一家大細齊齊玩,可以揀「觀瀾湖2天1晚親子主題度假套餐」,基本內容同雙人套餐一樣,不過就多了親子烹飪課體驗及溜冰/保齡球畀你揀,2個大人1個小朋友都只係HK$2,118!

YOU MAY ALSO LIKE ...