美國大頭男用手指按凹額頭!原因竟然係因為曬傷…

雖然偶爾曬下太陽對身體好,但曬得太耐就會曬傷。近日美國有位光頭男Cade Huckabay赫卡比話畀大家知,曬太陽曬得耐除咗會曬傷,仲會曬到個額頭腫大。而最有趣嘅係當佢拍片向朋友分享呢個奇怪現象時,手多按一按個額頭時,額頭竟然凹入去…

text- Ivan photo- Twitter、Maddy Drachler、Cade Huckabay 資料來源- dailymail

曬傷真係頭都大埋

呢位光頭男赫卡比表示,較早之前剪咗個光頭,之後去修剪草坪。修剪過後,赫卡比發覺自己額頭曬傷之餘,而且又紅又腫。

正當佢想拍低呢個咁奇怪嘅現象時,一路拍片一路摸住自己大大個光頭,最後仲要手多按了一下,點知個額頭就凹進去,留低一個手指洞。不過半個鐘之後,個凹陷位終於冇事,但係個額頭仲腫緊。

兩個月後佢將自己嘅可怕經歷喺Twitter度同網友分享,因而熱爆網絡。有網友笑言「這一定是德州的陽光所害,幸好我們倫敦的陽光不像這樣」,亦有網友嘲笑佢嘅額頭可唔可以收埋波子或者高爾夫球。呢則貼文已經被轉貼11萬,大家都蜂擁去研究呢個咁搞笑嘅現象。

 

按凹個頭原來唔罕有

另外亦有網友Maddy Drachler卓琪拉分享同樣嘅經歷,佢表示當時個額頭曬腫之後同樣出現兩處凹陷,手多畫多條弧線,令到個頭有個「笑哈哈」,相當抵死,並且拍照為證。

不過原來按凹額頭並唔係啲咩奇難雜症,紐約嘅皮膚科醫生Joshua Zeichner澤希納就話,按凹額頭是因為曬傷太嚴重,曬傷可能會引起炎症,從而引起身體免疫反應,輸送白血球去到受損嘅身體部分,去修復及對壓止症,所以搞到皮膚又紅又腫咁,而紅腫處入面充滿白血球的液體。患者如用手指輕按腫處,就會形成好似赫卡比嘅凹陷情況。

醫生又建議患者可以用牛奶或者蘆薈去敷曬傷嘅位置,咁樣就可以紓緩痛楚。當傷口唔係太痛太嚴重時,可以試下搽含有凡士林嘅保濕乳液,如果曬傷嚴重而導致出現水泡,或者令皮膚有傷口,佢建議患者立即到皮膚科或急診室求診。大家曬還曬,記得小心啲呀!

YOU MAY ALSO LIKE ...