運動女生TELL YOU WHY:跑得多,是為了吃得更多?

【女生專屬byT.LUM】(IG: Teresa_Lum)

本人並非專業教練及運動員,抱歉未能寫下專業嘅運動知識。亦由於我最常做嘅運動係跑步同NTC(Nike Training Club) ,寫得多,你唔悶我都悶。而最近,有鑑於運動圈、跑步圈和朋友圈之間對運動女生的某些現象時常感到不解,例如:點解女仔做運動要化妝?點解女仔一定要買最新裝備、着最靚嘅衫先做運動?點解女仔做運動一定要影相?決定集合我聽到、睇到同感受到,寫個「運動女生TELL YOU WHY」系列,解究種種運動女生令人不解現象嘅真相。

 

而今次,首先講食!
食物同運動有住千絲萬縷嘅關係,因為唔係專業,所以我想講嘅,當然唔係從營養學角度出發。運動女生可能有時會聽到身邊有人咁講:「點解你做咁多運動,但都唔係thin as a stick,重有少少……baby fat。」首先thin as a stick已經係過時嘅標準,而更重要嘅係好多運動人都時常本住:跑個10公里,要食夠半馬嘅配額;跑完半馬,就要食夠全馬;所以時常都跑得多,是為了吃得更多。我十分贊同呢句座右銘,只要跑得開心,食得開心,why not?不過運動女生食唔同種類食物時,佢地嘅心情、心境同原因其實都唔同,唔知你有無咁諗過呢?

明明係晚飯時候,做完運動後女生會話:「我唔係好餓,只係食沙律或者飲果汁就可以啦。」
真相係:
過完個冬天我真係肥咗好多,最近個肚嘅肥肉已經現形。我現在有極大嘅決心去做運動同瘦身,冇任何東西可以阻止我!雖然我做完運動,隔籬飄過嘅雞蛋仔味真係好香,但為了瘦,只可以食少少。我有無比嘅堅持同意志力,拼了!

一大班朋友一齊做完運動,唔係唔食大牌檔啩?
真相係:
大牌檔代表中國悠久餐飲文化嘅歷史,充滿中國人團結、分享嘅民族個性。一大班朋友做運動,戲肉在於之後嘅食飯聚會,而食大牌檔除咗可以放縱熱烈地高談闊論,更重要係大家可以點唔同嘅小菜,繼而一齊分享美食,sharing is caring。

今晚一於食盡佢!去食韓燒/串燒/燒肉!
真相係:
我哋今晚放棄計算任何卡路里,唔理肥唔肥,總之食咗先算。
發生情況可能係大家剛剛練咗LSD 21公里又或者做咗NTC 1小時,代表食更多都唔會內疚。又或者,運動圈子中有人生日,女生之間對彼此之間嘅友誼嘅重視,暫時將卡路里放低,絕對要大吃大喝,盡興1晚!

要跑得快,當然要食碳水化合物!
真相係:
練咗咁耐,我對呢個比賽非常認真,對飲食、訓練、身體狀況都好有要求。喺比賽前1個星期已經嚴格執行carbo loading,為儲備能量作最後預備。又或者,另1個情況係我天生鍾意食飯同意粉,佢哋令到我更有力量去做運動。

做完運動,無論有冇食正餐,主菜其實係甜品。
真相係:
女生對甜品永遠有第2個胃,當我哋做完運動都堅持食甜品,係代表我哋心情好愉悅,甜品正正代表我哋心情,亦代表運動流汗其實好快樂,運動過程可能係辛苦,但最終汗水都象徵我哋蛻變嘅快樂。

其實講咁多,寫咁多,最終係想帶出時下可能重有女生認為要瘦身就等於狂做運動加上節食。呢個方法可能係短期內可以為你減去一些體重數字,但節食對身體機能上嘅影響係好長遠,體重數字亦好大機會反彈。「為食」無罪,只要保持均衡飲食、常規運動,無論身體機能同線條都會慢慢變好。當然,唔太健康嘅零食同糖分較高嘅食物,就偶一為之。始終,女生對於食物有時係好難抗拒,我都明嘅。

T.LUM

1個鍾意做運動嘅女生。做運動好簡單,只要鍾意嘅、喜歡嘅、想試想做嘅,就可以行動。

內容延讀:

瑜伽女神 神經靜止論

運動女生「娶得過」的6大原因

女生瘦得有型3部曲

YOU MAY ALSO LIKE ...