極地馬拉松 追逐夢想之女生

每個人開始跑步都有自己嘅原因,而每個跑步嘅人都會有自己喺跑途上嘅目標,甚至係一啲看似遙不可及嘅夢想。
其實,通向夢想嘅跑道,只需要你踏出第一步。

兩位來自唔同界別嘅香港女性,今年因為唔同原因,分別去咗撒哈拉沙漠、北極,各自完成生命中首個極地旅程。「不可能」只係夢想嘅起點,用雙腳走到終點係每個跑手身體內嘅「本能」,天南地北,夢想如一,就由兩位女主角話俾大家知,佢哋點樣踏出夢想嘅第一步。

text – Lok(ig:loklokb1021

 


北極馬拉松 鬥志不冷
任職社工嘅Jennifer(張思縈),啱啱完成北極馬拉松,並且勇奪女子組第三名。作為一個業餘跑手,成績算係相當唔錯,原來佢當初參賽係背負住一個重要使命。
N:《新Monday》 J:Jennifer

N:點解會參加北極馬拉松?
J:「其實背後有好多原因,我係一個社工,我嘅工作係推動吸毒群體戒除吸毒習慣,協助佢哋重新恢復健康生活。然而康復從來都唔係一件易事,中途佢哋會遇到唔同困難,打擊佢哋嘅鬥志,最後會選擇放棄。今次參加北極馬拉松,就係希望透過身體力行,以一個克服嚴峻環境嘅經驗,鼓勵佢哋面對康復路上所經歷嘅障礙。」

N:你本身已經跑開步?
J:「我自細已經好鍾意運動,不過喺運動方面嘅際遇唔太順利,最後有十幾年時間淡出冇再比賽、冇練習,但我喺一班康復者身上搵返嗰份衝勁,一次偶然比賽重得到季軍,當時佢哋好雀躍咁同我慶祝,令我覺得自己可以做多一啲嘢去影響同推動佢哋。」

N:點樣搵到參加方法?
J:「咁啱之前睇到一個電視特輯,正正係介紹北極馬拉松呢個比賽,當時參選賽手因傷退出,未能完成整個賽事。我就覺得好似有啲「unfinished business」想去做。結果就將件事串連埋一齊,成就咗今次北極馬拉松,一方面鼓勵康復群體,另一方面亦幫自己圓夢。」

N:呢個比賽過程點樣影響其他人?
J:「其實參加北極馬拉松,辛苦程度相信唔洗我點多講,喺極度寒冷下比賽,身體機能反應都變差,每一步都係靠意志支撐。我一個人長途跋涉去到異地,所有嘢要自行安排,為咗慳錢要自己煮食、要喺斜路雪地上拖著40kg行李搵住宿,我就係想一班康復者明白,唔好受自己嘅過去所綑綁,要走出陰霾,識得向前展望,要對自己嘅生命抱有信念,我自己已經40歲,都能夠重返賽場,甚至得獎,足以證明凡事都有可能,最緊要係行出第一步,遇到挫折唔動搖,就可以好似我一樣到達終點。」

撒哈拉沙漠馬拉松 由0至250公里
另一位主角係出生於澳門嘅Rosetta(馮雪心),大學畢業冇耐就同校友一同創業,17年嚟將所有心力放於自己創立嘅公司,並於2010年上市。兩年前開始接觸跑步,僅用7個月就完成人生首個全馬拉松,上年首次參加毅行者更以26小時多啲完成,到今次有「地獄馬拉松」之稱嘅撒哈拉沙漠250公里賽,到底背後有咩強大嘅意志同信念支持?
N:《新Monday》 R:Rosetta

N:點解會參加撒哈拉沙漠馬拉松?
R:「我係一個好鍾意不斷挑戰更高目標嘅人,兩年幾前多得毅行教父KK Sir(陳國強先生)開啟咗我嘅跑步人生,訓練咗7個月就完成人生第一個全馬,之後亦完成毅行者,諗起幾年前聽過撒哈拉沙漠馬拉松,好自然地我就踏上呢個250公里賽事嘅旅程!」

N:事前有咩要特別準備?
R:「由於賽事需要自備7日嘅裝備同食物去完成,裝備重量同食物卡路里都要精打細算,同時賽前亦加強負磅訓練,因為開賽時淨係我背囊就已經重7公斤。」

N:沙漠作賽難處喺邊?有冇諗過放棄?
R:「沙漠嘅温差好大,由晚上嘅攝氏十度到中午嘅四十幾度,我第3日就已經中暑同嘔,需要極大意志去繼續前進。當時我問自己點解要喺度受苦?但呢個旅程係我自己選擇,我嘅身體並唔係我嘅全部,我重有堅定嘅意志,加上同行友人鼓勵,於是就一步一步咁完成當日嘅38公里!」

N:比賽期間有咩令你最難忘?
R:「第6、7日我開始以享受嘅心境去參與賽事,一切都唔再辛苦,當日嘅地平線日落係我見過最靚嘅景色,好難忘。」

N:完成整項賽事後你得到咩啟發?
R:「當我可以轉用享受嘅心情去完成賽事,唔再覺得辛苦嘅時候,我就明白出發點同意志係可以改變一個人嘅體驗同感受!所以面對任何挑戰,心境係最重要。我亦都鼓勵身邊其他朋友參加極地馬拉松,呢個係Once in a life experience,要學習離開自己嘅comfort zone!」

YOU MAY ALSO LIKE ...

There is 1 comment

Add yours
  1. 新Monday / 專訪世界第一Cue后吳安儀:「要嬴人,先enjoy。」 - 新Monday

    […] >睇埋另一位追逐夢想之女生,極地馬拉松女跑手  […]


Comments are closed.