瑜伽女神 神經靜止論

女生

廣告

瑜伽喺香港嘅受歡迎程度,絕對拍得住長跑,尤其女士最愛用嚟keep fit塑身。

但大家可能唔知,原來香港出咗位瑜伽比賽世界冠軍魏秋琪(Stefanie)。呢位達女神級質素嘅靚女參加過世界賽總共5次,係唯一囊括冠亞季軍嘅港人!咁厲害,我哋當然第一時間求教佢,佢話瑜伽係內心修養同運動科學嘅追求。「要做到控制自己嘅神經系統,不斷追求屬於自己嘅stillness(靜止)。」到底點樣控制神經?乜嘢係stillness?瑜伽女神為你一一解答。

text – 專題組 photo – Pakco make up – Shuen Kong hair – Hin Wan@il Colpo wardrobe – adidas

控制腎上腺素

瑜伽係1種好古老嘅運動,向來宗教味濃郁。但Stefanie就認為瑜伽係集合科學同哲學嘅運動。「好多人誤解瑜伽要求練習時hold住1個動作,時間愈長愈好。其實瑜伽練嘅係身體同腦嘅同步率,即以通過控制呼吸去控制神經系統,再達到靜止境界。咁就先要練呼吸,當你憤怒或緊張時,呼吸會變得急速,所以控制深而長嘅呼吸,對心境平靜起到好重要作用。1個資深嘅瑜伽修練者,更可以憑控制呼吸嚟控制血壓同心跳。」
Stefanie話,坊間大家睇到嘅高難度動作,只要有毅力一定練到,瑜伽最難嘅,就係控制stillness。

「動態運動如體操依賴腎上腺素去令體能達到頂峰,嚟超越自身極限,瑜伽喺呢方面亦相同,但就要求更能控制到嗰份hyper。我哋做瑜伽,係要用腎上腺素go deeper,但唔可以俾佢take over你,即係用腎上腺素去更彈性咁控制自己身體,做到master your own body。」

 

WYSC瑜伽賽 3分鐘7動作
全球有多個世界級瑜伽比賽,而各個賽事嘅規例都有啲分別,就好似Stefanie所參加嘅World Yoga Sports Championship(簡稱WYSC)咁,比賽要求運動員3分鐘內做出7個動作,包括5個大會指定動作以及2個自選動作,評審會以動作難度、力量同柔韌度、穩定性等各方面評分。Stefanie話:「雖然有難度分,但評判更會睇運動員能否情緒平靜咁完成每個動作。」

貪靚係原動力
都係唔明?Stefanie再舉例話,好多人喺比賽中緊張,腎上腺素急升,會令身體震動。「瑜伽就係要控制唔好俾身體震動,緊張係冇可能做到stillness。」
Stefanie補充,愛美係每個人嘅原動力,只要最初肯堅持每星期做4至5日,大概1個月就有效果,只要見到效果,就會更堅持落去。
Stefanie話所有資深瑜伽運動員都好愛惜自己,因為每個愛美嘅人,都要先識得忠誠咁面對自己身體。「好多人覺得自己肥腫難分,又欠缺美態,冇膽開始,其實如果腳粗、肚腩大,或身體有缺陷有病,就更應該去玩瑜伽。只有先接受自己身體,先會願意花時間去改善,我一直鼓勵學員:如果你彎腰掂唔到腳趾,就更加要勤練瑜伽!」

原來Stefanie都係過來人,原本佢係室內設計師,每日喺office 10幾個鐘不停咁畫圖,壓力大到要辭職,之後飛返去加拿大讀心理學;加上體弱多病,呼吸系統特別差,所以經朋友介紹,10年前開始玩瑜伽。「開頭我只係想出身汗鬆一鬆,後來愈玩愈投入,06年考教練牌,07年重開始參加WYSC。」

 

冥想助登冠軍
Stefanie第2年參加就攞到第5名,但09年因為有咗BB而暫停比賽。佢話生BB不但冇令佢嘅瑜伽水準下跌,重有幫助添。「瑜伽講集中力,唔好話比賽壓力,平日練習都會被唔同事情纏擾思緒。有咗BB後,想話靜靜練習就更冇可能,因為佢會突然衝過嚟撩你玩,但因為佢係我最愛,所以咁樣反而令我練就更高EQ,集中力更強,更容易進入狀態。」之後Stefanie每年都有參加比賽,雖然都能躋身頭3名,但一直與冠軍無緣,直至13年,終能一嘗世界冠軍滋味。「以往一直只練習動作技巧,有位教練同我講,得獎者由第2至第10名,喺技巧上其實調亂排名都冇乜大分別,係爭少少,唯獨第1名嘅就一定能夠處理好內在情緒。所以喺13年我多咗冥想。」

奪得冠軍後,Stefanie暫時只會專注於瑜伽導師嘅工作,對於坊間唔同嘅瑜伽,佢就有咁嘅意見:「新手可以試下玩高溫瑜伽,因為喺高溫下,會加速軟筋,並促進血液循環,會有更好效果;而其他課程如空中瑜伽,就加入咗舞蹈元素,而且較難控制身體,屬資深玩家嘅課程。」

教你高中低難度動作

搵得冠軍級嘅Stefanie,當然要佢教下我哋嘅讀者,以下Stefanie會介紹幾個動作,每個動作都係保持5下呼吸後,就可以放鬆,但原則係要完成動作,並且控制好身體要穩定。特別一提,大家無須急於向難度挑戰,同所有運動一樣,都係由淺入深(以下動作以10★為最難,★為最易)。

 

Side Stretch

針對部位:腰側(★★)

盤膝而坐,腰挺直,右手平放喺墊上,左手舉高過頭並向右邊施壓,直至腰側有伸展感覺。

 

Spine Twist

針對部位:腰側(★★★)

先將雙腳伸直咁坐,右腳屈曲並放到左邊,左手手肘壓住右腳,同時身體向右扭並用右手撐地。

 

Eight-angle Pose

針對部位:手、腹(★★★★★★★)

先將雙腳伸直坐喺地,右腳舉起並屈曲,右手手肘微曲以撐住右腳(圖1),然後雙腳離地,用腹肌控制雙腳離地,左手轉成手肘支撐身體(圖2),手同腹部最為用力。

 

Cobra Pose

針對部位:後腰(★★★★)

先俯卧喺地,靠腰力挺直身體,雙手輕輕支撐身體。

 

Backward Stretch

針對部位:手、腰(★★★★★)

動作有啲似拱橋,但左手離地時,右腳伸直作平衡。

 

Lifted Lotus Pose

針對部位:手(★★★★★★★★)

睇落好似好易嘅動作,但雙腳盤膝離地,頸部挺直,更靠雙手支撐身體,維持1下呼吸嘅時間都唔易。

 

Forearm Variation

針對部位:全身(★★★★★★★★★)

先俯臥,雙手前臂預備作為支撐,雙腳向上踢起,其中左腳向前過頭,並屈曲至雙手可觸及腳趾,右腳則伸直作平衡。

There is 1 comment

Add yours

Comments are closed.