《In Silence》成近期必玩遊戲 萬聖節大熱驚悚之作
《In Silence》是由 Ravenhood Games 研發嘅多人驚悚遊戲，早前已喺 steam 搶先提供試玩，呢款玩法激似《黎明死線》加入電影《無聲絕境》嘅電腦遊戲，玩家將會喺渺無人煙嘅地方遇到利用感應能力嘅怪物追殺，你要如何利用地圖資源及急智嚟逃出生天？
撰文：Odin ｜圖片來源：官方網頁｜編輯：Easy
人類生存之道逃走有妙法
唔少玩家試玩完《In Silence》都有唔同心得見解，由於怪物係靠聽聲嚟狩獵人類，所以有唔少方法都可以輕鬆屈佢，例如掟石頭可以吸引鬼注意嚟個聲東擊西，用夾怪唔夾人嘅捕獸夾去拖延怪物嘅行動，稻草人放燈底混淆佢視(?)線，再屈機啲嘅玩家甚至諗到將收音機掟入櫃，因為怪物唔識開櫃，收音機嘅聲音會嚴重影響佢判斷，咁多種唔同玩法係咪聽到都好心動。
唔係齋避同匿你亦有更激選擇
《In Silence》過關方法同《黎明死線》極之相似，就係搵到足夠資源修理好部車就可以閃人，玩家需要3個車軑、汽車電池、汽油同埋車匙，地圖入面重會有唔好資源俾你反擊，唔係一味靠避同匿，如果你想玩得激啲甚至可以用第二種過關方法，喺版圖入面搵到4位數字密碼打開武器庫嚟個驚天大反擊，基本彈藥有3粒，隨住技能提昇會有所增加，冇子彈就要執過把新。
總結：其實《In Silence》重有一個超正玩法，就係當玩家被擊殺之後會變成老鼠，老鼠可以喺地圖度移動並發出聲音，人同怪都會聽到，但打字同講嘢就只有老鼠方先會聽到，你遇到心腸好嘅玩家當然幫你引走隻怪，但如果遇到相反嘅話，隨時會將你嘅位置曝露出嚟，呢類遊戲絕對適合嚟緊萬聖節搵埋成班 FD 一齊癲返晚，重點可以變老鼠搞下氣氛，但講到氣氛呢隻遊戲真係幾恐怖，膽細啲都隨時畀行雷聲嚇到心都離一離。
關鍵詞
買了球鞋再買玩具
