PS5遊戲推薦2021｜PS5 11大必玩 Game 《刺客任務3》、《鬼線：東京》（持續更新）
撰文：odin | 圖片來源：網上圖片
PS5遊戲推薦2021
Sony早前搞咗個線上直播媒體發布會，喺發布會入面除咗有關於PS5嘅資料外，最受機迷關註嘅未來遊戲上市部份，有唔少大作將會喺今年推出，重有幾隻獨佔GAME添，到底有邊幾隻最值得期待？
《刺客任務3》(PS4/PS5/Xbox ONE/Xbox SX/Switch/PC)
推出日期：2021年1月20日
已落實今個月20號推出嘅《刺客任務3》主打靚畫質之餘重支援埋 PS VR ，玩家可以喺每一個章節全程使用VR虛擬實境玩法嚟進行，利用偽裝、潛入等方法完成任務，當然玩家亦可以採用屠殺方式過版，玩法自由度極大，除咗今集新內容關卡之外，玩家重可以喺 GAME 入面玩返前兩代關卡內容，利用匯入方式一次過體驗多達 20 個以上關卡。
【PS5遊戲推薦2021】《死亡回歸》(PS5)
推出日期：2021年3月19日
呢款由芬蘭Housemarque團隊開發嘅PS5原創第三身射擊新作《死亡回歸》將會緊隨其後推出，玩家將會扮演主角瑟莉妮( Selene )，因為事故被迫降落喺一個神秘星球度，要四出搜尋資源用嚟升級，並設法逃離呢塊充滿危機嘅荒蕪之地，解謎之餘重會有唔少隨機迷宮可以挑戰，所得道具重會每日更新，耐玩度極高。
《奇納：靈魂之橋》(PS4/PS5/PC)
推出日期：2021年3月
玩家喺《奇納：靈魂之橋》入面將會扮演靈魂嚮導奇納( Kena )，喺一片美麗世界入面探索之餘，重可以揮動魔杖幻化成弓箭使用嘅一款冒險動作系遊戲，透過DualSense控制器嘅觸覺回饋功能手感一流，擊敗腐靈之後，對方重會加入隊伍強化你嘅技能，最終目標係將恢復村莊返繁盛一面。
《烈日餘灰》(PS4/PS5/PC)
推出日期：2021年6月
由美國獨立開發團隊 Heart Machine 推出嘅第二款作品，喺呢款全新嘅動作遊戲《烈日餘灰》入面，將會帶玩家去到一個超現實世界，邊奔跑邊進行探索，正如宣傳片提及：「虛無正在呼萬著你…」，玩家需要解開各個謎團向前推進，家用主機平台將會限時獨佔。
《深處的小惡魔》(PS4/PS5/Xbox ONE/Switch/Wii U/PC)
推出日期：2021年7月
由團隊 Neostream《深處的小惡魔》推出嘅新作，同樣以超現實為背景進行探險，玩家面要橫跨沙漠及水底等唔同場景從中搜索物資，透過適應環境及尋找水源諗辦法生存落去，例如砍伐沙漠仙人掌從而獲得水源，從旅人口中獲得重要情報等，喺沙漠重會遇到敵人進行駁火交戰。
【PS5遊戲推薦2021】《鬼線：東京》(PS5/PC)
2021年10月
由三上真司和 Tango Gameworks 開發嘅動作冒險遊戲《Ghostwire: Tokyo》，故事背景將會落喺東京，因為出現超自然現象令99%人口失蹤，重出現大量日本民間故事鬼怪(例如天狗、白無垢等)，玩家將會扮演一位擁有超能力嘅角色，以無雙戰鬥方式將敵人一一剷除，務求解開失蹤人口呢個巨大謎團。
《STRAY》(PS4/PS5/PC)
2021年10月
《STRAY》以流浪貓視點嘅第三人稱冒險遊戲，玩家將會扮演貓貓穿越大街小巷前往目的地，當中地型高低起伏之餘重有好多無法預知嘅危機將會等住你，你面對嘅唔單止係貓眼中覺得陌生嘅人類，重包括有機械人及無人機等，面對機械人及無人機嘅幫助，你又會唔會選擇相信？
【PS5遊戲推薦2021】《拉捷特與克拉克：切割分裂》(PS5)
2021年
曾於2002年推出喺PS2嘅《拉捷特與克拉克》將會喺PS5推出新作《拉捷特與克拉克：切割分裂》，以隆巴斯星人拉捷特及機器人夥伴克拉克嘅星際冒險故事為題，敘述呢對搭檔同死對頭尼法利斯博士發生衝突嘅蝦碌故事，玩家要善用唔同功能，例如傳送門、各個唔同用途嘅屬性攻擊等。
《地平線：禁忌西域》(PS4/PS5)
2021年
由索尼互動娛樂(SIE)旗下團隊 Guerrilla Games 開發嘅新作品《地平線：禁忌西域》，作為上集喺2017年2月推出在PS4嘅《地平線：期待黎明》續篇作品，延續前作故事劇情，以末日浩劫後千年嘅美國為舞台，將繼續扮演諾拉部族嘅獵人少女亞蘿伊，前往舊世界美國猶他州到西岸太平洋嘅西方邊疆地帶，展開全新嘅冒險。
《雅西亞計畫》(PS5/PC)
2022年1月
Square Enix公布PS5新作《雅西亞計畫（Project Athia）》，遊戲背景將建立喺一片廣大嘅世界度，途中會遇到可怕嘅敵人，兇猛如著火的狼以及巨大的飛龍都會出現喺你面前，玩家需要面對重重困難，展開一場奇幻冒險。
《虛實萬象》(PS5/Xbox SX/PC)
2023年(延期)
由CAPCOM打造嘅全新科幻作品《虛實萬象（Pragmata）》將再度延期一年，將以深厚嘅劇情以及世界觀描繪出化作惡托邦的近未來月面世界，官方同時指出：「本作將充分活用次世代主機嘅強大機能，透過實時光線追蹤呈現出色嘅遊戲畫面，實現極致嘅物理運算及栩栩如生寫實方式，令玩家更加投入，並在惡劣環境下嘅動作要素，為玩家帶來前所未有嘅體驗。」
