炭治郎、禰豆子等5名角色登場《鬼滅之刃火之神血風譚》實機片優先睇【內文有試玩片】

Feb 16 2021 - 12:21

Aniplex早前宣布預定喺2021年推出嘅人氣動漫畫《鬼滅之刃》改編遊戲《鬼滅之刃火之神血風譚（鬼滅の刃ヒノカミ血風譚）》將會喺PS5、PS4、Xbox Series、Xbox One及PC合共五個平台上面發售，對好多玩家嚟講絕對係天大嘅喜訊，一來可以喺次世代嘅新主機上面遊玩，二來可以利用強大的主機機能去享受遊戲更高嘅畫質，遊戲除了收錄可重溫動畫版故事嘅單人遊玩模式之外，重宣布加入可操作動畫登場角色嘅對戰模式，選出你喜歡嘅角色同對方鬥個你死我活，早前官方公布咗實機試玩片，一齊嚟搶先睇睇。

撰文：odin | 圖片來源：遊戲截圖

【鬼滅之刃火之神血風譚】實機片優先睇

今次《鬼滅之刃火之神血風譚》玩家最期待嘅當然係戰鬥部份，CyberConnect2亦都冇令機迷失望，從圖片中大家可以見識到CyberConnect2為人稱道嘅動畫風3D繪圖呈現手法，行雲流水嘅招式令遊戲各角色都可以完美展現出來，《鬼滅之刃火之神血風譚》角色更會有新增自創招式，唔使再擔心得一招嘅角色要點駁招啦！暫時《鬼滅之刃火之神血風譚》試玩片段只提供5名角色作選擇，相信日後會有更多角色可以選擇。而今集《鬼滅之刃火之神血風譚》類型將會以「鬼殺對戰動作遊戲」進行，除咗收錄可以重溫返動畫版故事嘅單人遊玩模式之外，重收錄埋可以操控動畫登場嘅各角色，並進行戰鬥嘅對戰模式，最多可以畀兩名玩家，各自挑選兩位角色組隊展開二對二嘅連線或離線對戰，戰鬥結束時，唔同組合會有特別嘅小劇場情節，單睇畫面就已經相當期待。

【鬼滅之刃火之神血風譚】炭治郎、禰豆子等5名角色登場

今集《鬼滅之刃火之神血風譚》試玩片剛推出時，有唔少機迷反映覺得遊戲整體風格同《火影忍者：終極風暴》系列太過相似，畢竟兩隻作品都係出自CyberConnect2，但《鬼滅之刃火之神血風譚》整體遊戲性並無因此受到影響，駁招爽快度依然存在，更易令機迷投入。暫時《鬼滅之刃火之神血風譚》實機試玩炭治郎、禰豆子率先登場，炭治郎會利用水之呼吸嘅戰鬥機巧對敵，整體駁招相當快速。而禰豆子因為受到鬼嘅攻擊而獲得咗鬼嘅力量，亦都係佢喺遊戲裡面同敵人戰鬥時嘅力量來源。