《New 寶可夢隨樂拍》4月30日登陸Switch 「新壹號」變旅遊巴搭住去影相

《New 寶可夢隨樂拍》4月30日登陸Switch 「新壹號」變旅遊巴搭住去影相

寶可夢最新遊戲作品已落實,2021年4月30日登陸Switch平台度,玩家會坐住架「新壹號」沿住路線環島遊,激似去緊旅行咁,搭住旅遊巴邊行邊影相。今集將會以1999年同名遊戲《寶可夢隨樂拍》為基礎,所製作出嚟嘅全新遊戲,玩法相當簡單,接任然後尋找所需寶可夢,再達成相關拍攝條件即可,可以近距離觀察寶可夢世界嘅生態環境,對寶可夢訓練員玩家嚟講絕對係夢寐以求。

撰文:odin | 圖片來源:New寶可夢隨樂拍

「藍蒂爾地區」展開旅程

今集場景主要圍繞住「藍蒂爾地區」,並以多個島嶼所構成,島嶼由沙漠或森林組成,大部份地方都未被調查過,需要玩家隨著故事推進去開闢新地段。故事圍繞住主角受到阿鏡博士委託,接完任務後前往各大島嶼上面,為每隻野生寶可夢們進行生態調查,除咗完成任務條件之外,重可以觀察返每一隻寶可夢嘅可愛表情及動作,以及佢哋平常嘅生活到底係點過?從而更了解佢哋。除咗寶可夢之外,生態環境都係重點之一,「藍蒂爾地區」植物出現「霓光」情況,亦都係阿鏡博士委任畀玩家嘅任務之一,捕捉寶可夢之餘唔好睇漏呢種奇觀。

 

捕捉到野生比卡超。
捕捉到野生比卡超。
坐住「新壹號」遊山玩水。
坐住「新壹號」遊山玩水。

 

捕捉寶可夢完美瞬間!

要拍到令阿鏡博士滿意嘅相絕對唔係一件易事,無論目標拍攝時嘅動作、所擺出嘅姿勢、形狀大小、所拍攝嘅角度以及目標位置等都會歸納去成績入面,各方面都表現出色嘅話,將寶可夢呈現最可愛一面,就可以獲得更高分數,呢啲都係需要慢慢累積經驗,將每一隻寶可夢最好嘅部份放入自己嘅圖鑑入面,隨時隨地回顧返佢哋可愛嘅一面,以及當初相遇時嘅樂趣。

完成任務阿鏡博士就會出嚟評分。
完成任務阿鏡博士就會出嚟評分。
動作得分星數可以參考返。
動作得分星數可以參考返。

關鍵詞
pokemonSwitch

YOU MAY ALSO LIKE ...