iOS 8.4即升級即玩 Apple Music免費玩3個月
廣告
終於殺到嚟！去年5月Apple正式宣布以30億美金，收購音樂串流訂閱服務Beats Music同Beats耳機、喇叭同音訊軟件Beats Electronics，當時已經估Apple有意染指音樂串流媒體服務平台，但畢竟30億對Apple嚟講唔算係錢，加上佢哋做嘢向來估唔到，所以要等到上月WWDC先正式得到證實，真係有Apple Music。然後話咁快，隨住iOS 8.4突然喺6月30號正式更新，而此版本最重要嘅升級，就係加入Apple Music。香港好好彩，係首批玩到呢個服務嘅地區（台灣都未有）。換句說話，如果你用緊iPhone，已經可以即刻動手更新，睇完今期簡單介紹，轉頭玩得。
text – Nam photo – 網上圖片
有錢就是任性 免費任玩唔嬲
冇錯，其實市場已經有唔少音樂串流媒體服務平台，香港數得出嘅都有KKBOX、Spotify、JOOX、MOOV，未計外國如Pandora等，Apple而家先玩，實在已經係遲。不過Apple有錢就是任性，皆因首3個月服務豪俾你任玩，所有功能都齊，亦冇蠱惑嘢，等你有得自己比較下。所以iPhone用家，基本上唔使諗可以即刻申請咗先，反正免費。
內容延讀：
>ig秘技！10招呃like教你做ig達人
>【編輯部嚴選】9大最想出現香港動漫人物展
Beats 1電台成賣點
Apple Watch介面造得非常出色，近乎唔使多講，搵歌、播歌，甚至可以靠Siri幫手，例如同佢講句「播方大同〈聽〉」，iPhone就會即時播放（Apple Watch同樣支援此功能）。若然你冇歌想聽，佢亦有個Beats 1電台，24小時有專業DJ實況播歌，記者邊做嘢邊聽，認為非常高毒性。由於有DJ講嘢，就似平時聽電台節目一樣。
總結：贏在起跑線
品牌魅力、整合性高、操作簡單、全面嘅生態系統，向來都係Apple嘅成功之處。好多人覺得256kbps嘅AAC，音色點都唔及24-bit，絕對同意，但問題係手電連比較好少少嘅耳機都未夠力食得起，格式咁高又係咪真係有必要？定還是只係數字遊戲掩眼法？另一方面，同類Apps要做到咁高整合係非常之困難，Apple Music憑住先天優勢，唔止做到，重要做得好好，可以話真正贏在起跑線上。如記者本身用開其他同類服務，但早已齊晒Apple iDevice，已肯定會轉會。資料庫方面，暫時未做到iTune Store有乜歌佢就有乜歌，最少執筆時，仍未見英皇一眾歌手嘅歌。另外日本歌曲方面，選擇亦較少，不過相信只係時間問題，Apple早晚會拆掂版權，到時吸引力肯定會更加驚人。
[…] >週日冇出街 不如研究下Apple Music […]