熱血再高校 《熱血行進曲:全明星特別版》

電子產品

廣告

所謂古老當時興,舊嘢永遠都係不死,好似今期介紹嘅《熱血行進曲:全明星特別版》,唔止係私心推薦,更係近期大熱作。呢隻1990年紅白機名作,近日以復刻姿態登陸PS3平台,引起唔少game友搶買,回憶下自己細個打機嘅歲月。而新機迷亦值得買嚟體驗當年嘅遊戲有幾咁過癮,一齊來忘掉錯對、來懷念過去……

text-Nam photo-網上圖片

平台:PS3
售價:$304(PS Store)
查詢:2341 2356(SCEH)

重製keep住元祖味
唔少remake遊戲都會改頭換面,吸引新世代玩家注意,但《熱血行進曲》則聰明地保留咗當年起晒格嘅角色(當然係重畫過),結合3D製作嘅背景同必殺技效果,令新舊玩家更容易投入。除此之外,今次remake重有4個重點新元素:1.新增單人模式,要玩家自創角色再體驗《熱血高校》嘅故事;2.加入以往冇可能實現嘅網上對戰功能;3.新增兩間高校恐山商業高校同百合丘女子校,角色總數去到100個以上;4.更多更黐線好玩嘅角色必殺技。同而家唔少剩係得畫面嘅所謂大作相比,保證遊戲性贏成條街。

4大亂鬥測試友情
《熱血行進曲》主要分4個比賽項目,分別係夢見町越野賽、障害部屋競爭、圓球突破競爭同勝利格鬥大會,重點係無論乜嘢比賽都好,你都可以隨時出拳、飛腿、攞武器,務求令對手贏唔到先係勝出關鍵,可以話係《炸彈人》之外,另1隻考驗友情嘅遊戲。

夢見町越野賽
最基本嘅《熱血行進曲》項目,玩家要不斷向前跑,通過每個版圖並達到終點。玩法睇落非常簡單,最先通過每個版圖嘅人,就會最先出現喺下個版圖嘅起點,但最終都只會計邊個第一個衝線,所以攻略係去到最後版圖之前,都盡量唔好跑第一,以免成為玩家圍攻目標。

障害部屋競爭
同夢見町越野賽非常相似,最大分別係版圖嘅陷阱多到爆,就算玩家唔出手,你都有機會被陷阱殺死,而且每個版圖都好細,未到最後一刻唔會知邊個可以跑第一。同越野賽相反,障害部屋競爭唯一攻略,係盡量有咁快跑咁快,預早布局,攞定武器,揀啱時間出招。

圓球突破競爭
日文非常難翻譯,唯有叫做圓球突破。呢個遊戲嘅目的係要爬上畫面中間嘅鐵柱,去到最高點再出拳打爆個波。但冇人知個波到底打幾耐先爆,而且每次上到頂嘅人只有2個,柱上面亦無法防禦,被人攻擊就會跌落地,令呢個比賽項目難度大增。

勝利格鬥大會
睇名就知,為求勝利,所有嘢都唔會有限制,場地會不斷有武器彈出,四個玩家亂鬥一餐。學朝偉話齋,功夫?兩個字,一橫一直,錯嘅瞓低囉,企得番喺度嗰個先啱晒,係咪咁話?

話你知:熱血高校有段古
Game友肯定聽過《熱血高校》大名,但第一款元祖「熱血」系列,其實叫做《熱血硬派》,係橫向動作遊戲,至於以躲避球包裝嘅格鬥game《熱血高校》,已屬系列第2款作品。由於兩隻遊戲都取得巨大成功,帶動「熱血」系列不斷發展,後期更有足球、進行曲等,相信老一輩game友必定有印象。另外,著名動作遊戲《雙截龍》其實都係由Technos Japan開發,可惜成也風雲、敗也風雲,太依賴兩隻名作嘅結果係失去創意,最終Technos Japan喺96年破產,幸好版權仍喺開發團隊手上,今日先得見「熱血」新作。

關鍵詞
gamePS3