全力靠嚇 《Resident Evil:Revelations 2》

呢頭講完舊嘢冇得輸,嗰頭又嚟舊嘢。《BIOHAZARD》,英文版叫《Resident Evil》,中文叫《生化危機》,無論點叫我哋都一概俗稱「BIO」。BIO喺1996年推出第1集,去到2012年先出到第6集,而12年至15年呢段期間,亦出過唔少衍生作,加埋大大小小唔同版本、重製、移植,幾十隻都冇走雞。不過就算係咁,新作《Resident Evil:Revelations 2》同樣引嚟game友力撐,繁中字幕加上大量恐怖劇情同怪物,同時有齊「脫逃」與「救出」兩種遊戲元素,有番BIO遺忘已久嘅絕望恐怖感。溫提,今集堅驚,夜媽媽玩小心嚇親。

text-Nam photo-網上圖片

平台:PS4、PS3、Xbox One、Xbox 360、PC
售價:$278
查詢:2366 1001(Capcom Asia)

交錯故事 雙時間軸
《Revelations 2》其實冇話特別有故事,但時間線就喺BIO 5同6之間,以章節形式進行,兼且會用兩個時間軸,交叉敍述故事。一邊係喺1次派對途中遇上恐怖分子入侵,最後被恐怖分子丟到荒島嘅兩個無辜少女Claire同Moira,另一邊係Moira老竇Barry為救出愛女而去到荒島嘅故事,佢重會遇上擁有超能力嘅神秘少女Natalia一齊冒險。今集特別之處正正係有4個主角,每個章節都必需用2個角色進行,如Barry篇入面,超能力妹妹Natalia可以感知危機同察覺到隱形怪物,玩家要先操作Natalia搵出怪物,再轉成Barry作出攻擊,呢個換人系統更可2P雙打,不過唔支援online play,要面對面用兩個手掣各自操作角色,要驚就一齊驚。

難玩恐怖 BIO味濃
同一個故事講咗10年都未講完,重有人肯聽,已經得人驚,更得人驚嘅係,每次BIO嘅新系列,都總有新元素引到你想玩。今次呢隻《Revelations》系列最早喺3DS平台出現,3D加上超恐怖氣氛成為近年BIO佳作,個人都對其印象極為深刻,如今《Revelations 2》就依舊用番元祖嘅密室恐怖風格,唔止主角易死,子彈、藥物亦唔係隨地有得執,難度高亦有逃生感覺。怪物設計則愈嚟愈嘔心核突(肯定出唔到書),唔再係喪屍咁正常,而過程中要不斷換角色解決問題甚至打大佬,手忙腳亂之餘,亦唔易玩。當正傳愈變愈似射擊game,又有QTE又有大量動作,好易理解一味靠嚇嘅《Revelations 2》點解咁受BIO死忠支持。

YOU MAY ALSO LIKE ...