任天堂社長 岩田聰一路好走 編輯部嚴選10隻撐起任天堂遊戲

任天堂社長 岩田聰一路好走 編輯部嚴選10隻撐起任天堂遊戲

任天堂今日正式宣佈, 任天堂社長 岩田聰 因為膽管癌於2015年7月11日去世,享年55歲,任天堂流淚…

講任天堂,有5個人,一定要識。

將任天堂由紙牌公司轉型為遊戲公司,並改變全世界遊戲市場嘅巨人山內溥;
開發設計出Game & Watch、紅白機、Game Boy等嘅天才橫井軍平;
創作出眾多無法超越嘅遊戲作品,包括《瑪莉歐兄弟(孖寶兄弟)》,無人不識嘅「遊戲之神」宮本茂;
前美國 任天堂社長 ,打開美國市場同時將任天堂推上國際嘅商業奇才荒川實;
重有就係,為咗打破舊時代觀念,強行開發針對新市場嘅主機Wii及掌機NDS,而令任天堂成為真正龍頭嘅岩田聰……

任天堂能夠長年累月都企穩遊戲界(甚至日本企業)頂端位置,功不可沒嘅,自然係一個個有如傳說一樣嘅人物角色。如今,橫井軍平、山內溥後,在位時創造出一個又一個奇跡嘅社長岩田聰亦都去世,唔止任天堂股價即時下跌,全球fans心情都勁為沉重。不過社長唔喺度,唔等於任天堂玩完,事實上任天堂重有大把本錢玩落去,我哋即刻嚴選10隻任天堂最經典遊戲,睇怕好多隻你都單手又好雙手又好都打過晒!最後重有岩田聰社長威水史,記得睇埋!

text – Nam photo – 網絡圖片

10隻遊戲系列玩晒
雖然岩田聰都走埋,但任天堂仍然有唔少奇人,例如宮本茂一日喺度,一日都能靠自家產品左右大局,何況任天堂重有一大堆屈機game撐住。全部數就肯定數唔晒架啦,以下求其揀10隻系列,長出長有就算玩多10年都冇問題,要打低任天堂?難過抽AJ呀!

超級瑪利歐兄弟(Super Mario Bros.)
話係有電子遊戲以嚟最受歡迎嘅遊戲都絕不誇張,80年代紅白機開始玩到今年都仍然有新產品推出,保守估計「孖寶兄弟」曾經出過超過150隻game,紅帽、有鬚、工人服嘅瑪利歐大叔幾乎等於任天堂。由宮本茂創作。

早10年前,行家成日會為譯名大戰,但其實官方中文名就係瑪利歐,就如多啦A夢一樣,唔鍾意都要跟囉~(我就鍾意孖寶嘅)
早10年前,行家成日會為譯名大戰,但其實官方中文名就係瑪利歐,就如多啦A夢一樣,唔鍾意都要跟囉~(我就鍾意孖寶嘅)

瑪利歐賽車(Mario Kart)
由《超級瑪利歐兄弟》嘅角色衍生出嚟嘅最強作品,一次考驗友情、親情同愛情嘅深度作品,如果你想知嗰個男人嫁唔嫁得過,或者想體驗吓人性黑暗面,玩1場就知。最勁當然係當年NDS隻「孖車」,應該全香港人都玩過,甩尾之後左右左右捽火、放蕉皮、射龜、食星星變無敵…講講吓都想玩呀喂,有冇人有興趣鍊返轉先?

出幾多集都係咁好玩嘅孖車
出幾多集都係咁好玩嘅孖車。

薩爾達傳說
因為遊戲水準極高而達到傳說級別,《薩爾達傳說》系列屬遊戲界中神作之中嘅神作,無論翻炒重製又好、重新作品又好都必定大賣,無一例外。美國影星Robin Williams甚至將佢個女個名改做「Zelda」,最正係任天堂都話未來會考慮喺遊戲世界加入一個叫Robin Williams嘅角色。又係宮本茂創作。

最近玩埋「無雙」,可惜得Wii U版。
最近玩埋「無雙」,可惜得Wii U版。

寵物小精靈

其實都唔駛多介紹,就算近年俾《妖怪手錶》瘋狂狙擊都好,《寵物小精靈》仍然穩坐皇者地位,由動畫、遊戲、玩具等全部搵錢,一隻比卡超勝過千言萬語,你重記得當年玩Game Boy隻《寵物小精靈》玩到唔訓覺嘅日子嗎?

剩係《寵物小精靈》都可再戰10年,任天堂一日有此遊戲在手都好難有危機。
剩係《寵物小精靈》都可再戰10年,任天堂一日有此遊戲在手都好難有危機。

內容延讀:

>等咗成個星期 《龍珠 超》第2集要繼續追

>好似唔係幾好 家下睇呢啲 但又好想睇少女時代噴血寫真

銀河戰士(Metroid)
首作於1986年推出,當時唔止遊戲機性能唔高,射擊科技題材亦唔算大熱,更顯得此作有無比前膽性,係任天堂最成功嘅遊戲系列之一。但呢個系列嘅風格都好鬼佬口味(好唔任天堂),香港人可能陌生。由橫井軍平創作。

《Metroid》真係好鬼佬,個人嚟講頂唔順。
《Metroid》真係好鬼佬,個人嚟講頂唔順。

動物之森
本來只係任天堂為社交潮流而開發嘅小品,但同樣因為遊戲品質太高而得到高度評價,01年開發至今只有4款作品,但累計銷量竟超過2400萬套,當中NDS嘅《歡迎來到 動物之森》甚至超過1000萬套成績,芒亨都冇咁癲。

好多日文一樣照玩,鬼叫妹豬冧咩。
好多日文一樣照玩,鬼叫妹豬冧咩。

火焰之纹章
由任天堂子公司Intelligent Systems創作,橫井軍平曾經參與,屬「國民SRPG」嘅級別。以極高難度見稱,最令人印象深刻就係遊戲角色死咗就唔會再復活,並且唔能夠中途SAVE。上月剛剛推出新作,銷量已過30萬。

我打你兩下死,你打我三下死…玩火紋可測EQ。
我打你兩下死,你打我三下死…玩火紋可測EQ。

任天堂明星大亂斗
睇個名都知玩乜,就係將一堆任天堂嘅角色放入同一隻game度,為動作類遊戲,每次一出又係必定大賣,相當受歐美市場歡迎。未來會聯同amiibo玩具齊齊出啲現實又玩得、game又玩得嘅周邊,真係買玩具都買窮你。

亂鬥game唔會死錯人,長出長有。
亂鬥game唔會死錯人,長出長有。

星之卡比
由HAL研究所同任天堂共同創作,而HAL研究所嘅代表人物就係岩田聰(後尾先去任天堂),所以唔少人會將《星之卡比》系列歸納為岩田聰創造,但實際上櫻井政博先係創作人。此系列92年初出,至今年仍然有新產品。01年甚至動畫化過,過多幾年就係集體回憶。

你以為低B?玩過就知呢個系列係「高手向」,智商低少少都爆唔到機。
你以為低B?玩過就知呢個系列係「高手向」,智商低少少都爆唔到機。

Balloon Fight
呢隻並非什麼大title,但卻係資料記錄真正由岩田聰開發,所以點都要提一提。我當年都有玩過,你呢?

作為岩田聰1隻被認可嘅作品。
作為岩田聰1隻被認可嘅作品。

後記:岩田聰創造Wii及NDS
任天堂作為傳統日本公司,同時亦係封閉家族企業(由岩田聰打破家族親屬做社長宿命),好多嘢其實從未正式公開過,就算重要如橫井軍平,都係要等佢去世後,先由日本出版嘅人物傳奇書籍中睇到真相,所以,網上就算有幾多岩田聰嘅維基資料,我亦唔夠膽深入講解岩田聰喺任天堂嘅位置及工作,以免將錯誤嘅資訊愈傳愈錯。然而,近10年嚟唯一一本真正得到任天堂授權嘅書《任天堂創造”驚奇”的方程式》入面,就可以由岩田聰把口,聽(睇)到佢點樣唔理市場、不顧後果咁開發出Wii及NDS,由於佢堅持開發「門檻低、人人都要識玩」嘅遊戲,最終帶領任天堂成功喺Sony手上搶返遊戲龍頭位置,就算到今時今日家用機市場再次打輸,但由NDS發展出嚟嘅3DS仍然壟斷咗手提遊戲機市場。就算對任天堂冇興趣,呢本書都可以睇到一個商業奇才個腦點諗嘢,同埋睇到日本企業嘅運作,個人非常推薦,想瞭解更多,你都不妨買本睇睇(有中文版呀)。

YOU MAY ALSO LIKE ...

There are 2 comments

Add yours
  1. 新Monday / 【單手打字系列】夜媽媽最啱睇雞排妹最新寫真 - 新Monday

    […] >任天堂社長 岩田聰一路好走 編輯部嚴選10隻撐起任天堂遊戲 […]

  2. 新Monday / 勁似Game Boy 任天堂手電?好想玩呀! - 新Monday

    […] 因為岩田聰先生離開,最近多咗唔少「專家」走出嚟分析任天堂,好多「專家」都認為任天堂唯一出路就係造手電遊戲。始終大勢所趨,而家冇人打機呀嘛!連好多外國玩家都係咁諗,所以外國有位叫Pierre Cerveau嘅設計師,就用任天堂元素設計咗1部概念手電出嚟,重叫做Smart Boy。外形睇落勁似Game Boy,用番白、灰主色,除咗一般手電有嘅嘢例如前、後鏡頭、超大螢幕之外,最特別係機身左邊有個插口,只要插件叫Game Bat嘅配件,就可以變成手提遊戲機。呢個插口重可以插其他擴充配件,包括電池、儲存裝置,甚至1,300萬像素嘅3D鏡頭等等,如果唔夠電,重可以轉Power Saving Mode,成部機變番Game Boy黑白8-bit嘅畫面,夠gimmicks! […]


Comments are closed.