Nike及H&M唔採用新疆棉花 中國網友發起抵制活動 有網友燒波鞋表態
廣告
Nike及H&M絕對係近期時裝界最有話題目牌，話說美國、英國及歐盟等聯手因新疆人權問題制裁中國，令中國引發一輪反西方品牌熱潮，受影響嘅品牌包括H&M與Nike等，呢2個品牌因去年曾表明唔採用新疆棉花聲明，最近被中國網友挖出呢單新聞，然後以行動去表示反感，更有網友火燒Nike波鞋作表態。
撰文：拓海 ｜ 圖片來源：Weibo、Nike、H&M
Nike及H&M唔採用新疆棉花 中國網友燒波鞋表態
Nike及H&M事件愈演愈烈，今日大陸網路流傳一段成都「大悅城」商場，一眾網民為抵制Nike及H&M行動，片段中可見一眾大陸網民拆除H&M廣告牌。另一邊廂，有大陸網友自拍火燒Nike波鞋作抵制Nike，不過有唔少網友質疑其網民唔捨得燒真鞋，而用上紙紥或山寨貨代替，有唔少資深波鞋友稱，片中所燒嘅Nike波鞋極大可能係假貨。
而微博更發起「我支持新疆棉花」運動，得到陳小春、文詠珊等明星轉發貼文支持。
近年主力係大陸時裝界發展，有「中國時尚教母」之稱嘅洪晃(唔係李司棋)，亦都拍片呼籲全民抵制外國品牌，不過以中國人咁崇尚外國名牌嘅風氣，唔知呢個抵制運動會維持幾耐呢？
