【香港潮流】盤點香港近20年潮流黑歷史！毛巾黨、棒棒堂頭你有冇跟過？

May 17 2021

【香港潮流】所謂「人誰無MK過」，每隔幾年睇返以前嘅自己，都會覺得自己有陣濃濃嘅柒味，但呢樣真係冇得怪邊個，怪在有句嘢叫做「呢刻愈潮，他朝更柒」，好似呢兩年大家都會有件傍身嘅馬甲，幾年後再睇返一定柒到盡頭。以下呢幾個潮流造型，有返咁上下年紀嘅一定經歷過，呢家睇返簡直就係香港潮界黑歷史，究竟有啲乜？即睇！

撰文: K.P.｜圖片來源：LIHKG、網上圖片、Pinterest｜編輯：海月

【香港潮流】盤點香港近20年潮流黑歷史！毛巾黨、棒棒堂頭你有冇跟過？

香港潮流黑歷史 1.毛巾黨

要數近20年香港潮流史入面最遠嘅，一定非毛巾黨莫屬！大概出現喺2002年左右，但有趣喺呢個熱潮唔係由潮流雜誌，想當年好興一個交友網站「AK Zone」，會定時定侯約喺旺角家樂公園聚埋一齊吹水，而所謂將條毛巾掛喺頸嘅風氣就係由佢哋帶起，而且仲要講牌子，例如Beams Boy同當時日本限定嘅Burberry Blue Label。

如果有經歷過「毛巾黨」時期，閣下都肯定年過30以上！

香港潮流黑歷史2.飛輪海、棒棒堂Style

隔咗幾年之後，香港興起一股「台風」，無論台灣偶像組合、台劇同綜藝節目都備受熱捧，其中最勁就係飛輪海同由節目《模范棒棒堂》出道嘅棒棒堂，當時香港人會由頭跟到落腳，MK味濃嘅斜陰頭不突止，朋友之間更會買類似嘅衫扮組合，最離奇係走去2%同IZZUE買埋啲衣不稱身嘅西裝褸，呢家睇到真係得啖笑！

果時個個都跟住棒棒堂或者飛輪海，我覺得最勁係成班人最到一樣咁滯扮偶像組合！

香港潮流黑歷史3.潮童「公廁」Look

日本嘅「裏原宿系」潮流文化當然就唔止廿年，但講到喺香港最盛行嘅時期，大概係2008年至2012年左右。當時仲係記者仔嘅筆者日日都要旺角潮特、尖沙咀加連威老道同銅鑼灣總統商場，影最新最快嘅潮物介紹畀大家，可謂見盡唔少香港當時潮人嘅打扮，每人身上都要有件OriginalFake或者NEIGHBORHOOD tee，加條FENOM或者LVC牛仔褲，鞋同袋都要用visvim，最後仲有條Y-3布帶，用返今日嘅語言，即係所謂嘅潮童「公廁」Look。

visvim Christo涼鞋、Y-3布帶、CLOT荊棘Tee，大家入手過邊樣？

朋友之間由頭到腳都係類似嘅Items，而且visvim backpack係重點！

KAWS主要理嘅OriginalFake Tee，潮人一定擁有過！

講潮Tee又點能夠冇Play CdG嘅心心Tee份，當年唔好話潮人著，就連港、台、外國潮星都一人一件！

香港潮流黑歷史4.七彩蝦條Jeremy Scott

咁多個潮流黑歷史，我有冇瀨過嘢？咪就係當年Jeremy Scott引發嘅七彩蝦條Look囉！其實都係發生喺2010年左右，同所謂嘅潮童「公廁」Look同時期，但呢類Style最初係好偏門嘅，點知同咗adidas合作，再搵埋Eason做香港區代言，一夜之間個個都排隊搶購，而其中最經典莫過於網絡紅人「肥寶」嘅親身著用。

當年Jeremy Scott真係好勁，佢同adidas嘅聯名搵咗Eason代言，仲成日親自飛嚟香港見Fans！

網絡紅人「肥堡」腳上嘅熊仔鞋當時好炒得架！

香港潮流黑歷史5.暗黑系暗黑過Juno

Jeremy Scott嘅七彩蝦條Style完結後，迎嚟嘅係極端嘅「暗黑系」Style，當年撐過雨傘運動嘅周柏豪係代表人物，唔單止帶起「比比鳥」髮型，仲有一身嘅黑鼆鼆造型，長身窄Tee同Rick Owens波鞋都係必備單品！最勁係，之前一身Jeremy Scott嘅網絡紅人「肥寶」，亦係果陣時有轉玩「暗黑系」Style，仲暗黑過Juno㖭！