紐約直擊Puma×ALIFE 有態度的聯乘
text & photo-譚大偉(ig:taiwaitam)
https://youtu.be/6ub1ia2HnBo?list=PLOIFOQA0p8sfW_i7M2VEYJARr0FQeKKP2
ALIFE的態度
雖然ALIFE喺香港冇Supreme咁有名氣,但喺紐約係同Supreme齊名嘅街頭品牌,極具影響力。品牌於1999年創立,由Arnaud Delecolle、Tammy Brainard Rob、Cristofaro及Tony Arcabascio 4人共同主理,過去都推出過唔少聯名作品。
ALIFE,係指同紐約為鄰嘅下東城內嘅生活理念,着重藝術、時裝、音樂同原創性設計為主,品牌宗旨係希望提升、延續及展示紐約市長久以嚟嘅街頭文化。專門店除咗有衫褲鞋賣之外,亦會積極喺下東城區內舉辦即興音樂會,當中由多位世界級人氣Rap stars所組成嘅「Alife Sessions」,更不時會喺音樂會中演出,潮得有態度。
念念不忘 必有回響
其實,Puma同ALIFE喺2007年已經作出首度聯乘,念念不忘必有回響。如果要話今次係第2次聯乘,不如話係07年嘅延伸,因為今次嘅產品設計同樣奪目、突出兼且有故事性。
今次設計靈感就係嚟自ALIFE紐約店ALIFE Rivington Club(簡稱ARC),最明顯係系列主色紅、黑、紫係ALIFE喜愛嘅顏色,同埋其鑽石菱形圖案,就連店中嘅假食人魚缸都係今次設計嘅重要元素。
另外,大家可以見到系列中用咗大量方格,主理人創意總監Jesse Villanueva話方格係代表紐約,希望透過今次聯乘產品,令大家感受到紐約街頭文化氣息。
專訪Jesse Villanueva@Creative Director of ALIFE
點解會同Puma聯乘?
「今次合作咁啱係ALIFE成軍15年,呢個真係個里程碑,所以同Puma合作上,特別希望強調我哋呢個引以為傲嘅故事。因此我哋打算透過今次聯乘可以大肆慶祝一番。設計嘅理念融合咗我哋店嘅設計、我哋一直追求嘅文化,一切對ALIFE重要嘅嘢。」
用咗幾耐去設計同生產?
「差唔多用咗16-18個月,由第1個樣本開始就不斷調整,修改咗好多,不過時間過得好快,而家諗返好似3個月前嘅事咁。」
最鍾意邊件單品?
「其實每件我都鍾意,實在太難揀。如果真係要揀,我會揀經典嘅Suede。因為我6歲已經着Puma Suede,嗰陣重未知呢對鞋叫咩名,但我已經話俾自己知,將來我一定要擁有呢對鞋。我今年38歲,從我第1對Puma Suede到而家已經有32年,但我重係好鍾意呢對鞋,可以一直着自己由細已經熱愛嘅鞋,重可以為佢設計,其實係好瘋狂又好完美嘅經驗!所以我真心覺得自己同Suede有特別嘅情感連接。」
支持邊支NBA球隊?
「當然係紐約人,我鍾意安東尼(Carmelo Anthony,紐約人球星)。其實我住喺佢附近,佢真係好好波,可以話係1隻籃球怪物。」
香港同紐約有冇相同嘅地方?
「我唔知呀!因為未去過,不過我喺電視都見到有人踩板,建築物好靚。雖然我未去過,但NYC同香港經常都有聯繫。可否快啲請我去?哈哈!」
成軍15年 最佳傑作
踏入2015年,亦係ALIFE成軍15年嘅大日子,所以對於今次同Puma聯乘,係前所未有咁推出整整一系列產品。不過,有啲可惜嘅係聯乘產品之中,對主理人Jesse Villanueva有特別情意結嘅Puma Suede,香港重未有返貨時間表,睇住相先。
Puma 尖沙咀海港城港威商場2樓2605及2606號鋪 2377 1775
double-park 尖沙咀新港中心37號鋪 2377 4622
延伸閱讀