Fashion嘅嘢真係… 盤點潮流界膠物 索帶、文件夾都可以做飾物 Supreme出磚頭！
廣告
Fashion嘅嘢真係…潮流界設計真係五花八門，無論你諗到或諗都冇諗過嘅都有機會出現，所以當中出現過唔少所謂「膠物」。最近日牌Amubsh所推出嘅天價膠索帶，推出後立即掀起熱話，全因網民視設計為「好過去搶」。其實除咗Ambush，潮流界近年亦出現過唔少「呃錢」，例如Supreme出過磚頭，G-Dragon出文件夾。以下便回顧一下被網民評為「搞笑時裝膠物」有啲乜，你地又覺得邊件最膠？
撰文：Easy｜圖片來源：wrongweather、farfetch、Supreme、Off-White、劇照
Fashion嘅嘢真係… 盤點潮流界膠物
Ambush膠索帶系列
日本品牌Ambush嘅設計向來都以大膽見稱，而最近嘅膠索帶飾物系列更成為網民討論話題，全因設計同平日喺屋企索電線嘅索帶根本一樣，不過價錢就幾百倍以上，例如手帶要$4千幾，介指都要$2千幾…真心想知有幾多人買。
Ambush衣㚒
Ambush其實除咗膠索帶，仲有唔少「創意」飾物，好似呢個你同我屋企都大把嘅衣㚒，不過佢就夾住Ambush嘅大名，定價盛惠港幣約$2,508，錢真係易揾。
Off-White螺絲模戒指
潮人最愛嘅Off-White，多年來嘅產品爭議性都極高，例如2019年初所出嘅螺絲模戒指，當時定價要港紙約$2,100，索價可謂相當誇張。其實如果冇咗Off-White光環同”Hex Nut”個字，真係同一般六角螺絲模冇分別。
Off-White文件夾
再一次係Off-White出品，於2019年推出了一款文件夾，定價約港紙$785。由呢個文件夾再一次證明，只要任何一件products加上潮牌logo，你就可以set個貴一貴嘅價錢啦。
Supreme磚頭
呢嚿Supreme磚頭，相信大家都有印象，因為電影《春嬌救志明》中出現過，而呢嚿Supreme磚頭當年推出時被評為最無謂潮物之一，不過定價唔平㗎，要成接近$1,100，真係…
peaceminusone文件夾
唔知大家有冇印象，G-Dragon早幾年經常加上一個文件夾於身上作裝飾，一眾fans當然照跟，然後G-D自家品牌peaceminusone索性推出文件夾裝飾，而定價要美金$30.27(約港幣$235)，真係好過去搶。
