熱到想剪爛條褲! 夏日5款必備短褲推介
撰文:意義衣丨編輯:白仔丨圖片來源:Instagram、NBA
夏日5款必備短褲推介
1.Sweat shorts
2018年最多人著嘅短褲,一定係Kanye West帶起嘅潮流Sweat Shorts。不過係咪人人都有錢買到Fear Of God或者Yeezy?不過其實平有平著嘅,例如Champion都有出平民版嘅Sweat shorts,雖然版型一定冇FOG嘅低浪咁型,但著低腰啲一樣有同樣嘅效果。
點著?望下Kanye一年四季點著就知啦!
但不過真係唔好著太窄身嘅上身衫,會令到成個style變晒味道。
2.Basketball Shorts
講Trend,一定唔少得霸佔咗成年嘅Jordan Brand。前年出到街一定會見到人著Air Jordan嘅籃球鞋,無論由Baby到阿伯都會有一對喺屋企,但籃球褲你又有冇一條?
其實一開始為咗方便籃球員,籃球褲係迷你短褲嘅設計,但之後慢慢因爲外形同潮流開始淘汰。進化到90年代,就一直沿用膝長嘅波褲。
而好多Fashion icon因爲佢嘅褲形開始著籃球褲,而且Jordan熱潮影響咗好多人以運動Look出門。
3.Swim Trunks
夏日熱辣辣,點都要去沙灘玩下水,畀人𥄫下啦!咁點少得一條令人眼前一亮嘅沙灘褲呢?
近來好多人鍾意用大膽嘅配色嚟襯衫,而沙灘褲其實好適合螢光色,因為沙灘褲嘅物料會令顏色更加突出。就算襯滑浪衫、背心、T shirt都可以簡單襯托,無論咩style都可以著到。
4.Suit shorts
喺好多Fashion Show裡面嘅designer會著Suit shorts,令造型玩味得嚟帶點優雅。不過除咗西裝外,其實唔同嘅類型嘅上衣都可以襯到嫁。
咁樣著最適合就係鍾意斯斯文文,但又想搞搞新意嘅朋友們。
5.Cargo Shorts
大部分男人都希望自己可以佬味重啲,咁呢種軍褲就啱晒。軍褲就好似一件背心外套咁,有唔同嘅褲袋用嚟裝唔同嘅嘢,連袋都唔使帶。
軍裝通常都會以深沉嘅顏色為主,例如軍綠、海軍藍、迷彩,呢啲顏色襯番件sharp 色啲嘅T shirt都已經十分突出。
軍褲仲可以襯出唔同嘅Style,可以佬味又可以玩味,今個夏天買番幾條都唔會嫌多。