TVB無綫電視終於搵到觀眾定位！？一台獨霸時代已完結！

Nov 1 2022

關於TVB，相信大家都一定聽過，而大家都一定會有經歷過「電視汁撈飯」的年代。不過隨著科技的發達，TVB開始被年輕一代遺棄，而慢慢地他們亦終於開始搵到屬於自己的觀眾定位啦！

TVB無綫電視終於搵到觀眾定位！？一台獨霸時代已完結！

講舊史

TVB於1967年11月19日成立，是香港的一間商營電視台，而且亦是香港首個投得無線電視牌照的電視台，從1967年至1973年間是香港唯一一間無線電視台。無綫電視的節目收視亦都長期領先其他台，加上公司規模都較大，所以一直都被稱之為「大台」。

TVB盛世皇朝已完結

無綫電視都可說是輝煌多時，由舊時所盛產電視劇、綜藝等等，都成功打開東南亞市場。就算是港人，每次食飯都一定打開TVB去觀看時下的劇集，另外舊版的《獎門人》相信大家都一定睇過，當時更是香港綜藝的高峰。不過去到現今，TVB似乎開始慢慢進入沒落，被淘汰。

娛樂選擇變多

不過要講到最大成因，相信科技的發展絕對是其中一環因素。唔少人去到呢個年代，已經唔再依靠電視吸收訊息，開一開IG或者碌一碌Facebook都已經可以知道發生的事。而且網絡頻道的興起，也令觀眾有更多選擇空間，去有更多娛樂節目能接觸，並不再依靠單個電視台去接收娛樂。有些新型家庭甚至買完電視都淨係睇YouTube同Netflix等等，鮮少開著TVB。

人才流失元老演員用完又用

人才流失也是其中一大因素，唔少TVB藝人都在完約後過檔ViuTV，或者自立門戶搞自己生意。令到TVB的藝人都慢慢大換血，新一代幾乎冇乜人識。另外，TVB對於新藝人的培訓及提供機會也較少，宏觀現時的電視劇，當中的演員大多數都係同一班，出現「8半睇完馬明，9半又再睇馬明」的現象出現。

節目過於守舊

另一個因素則是TVB太過「守舊」，對家ViuTV無論是在電視劇抑或綜藝上，其創作理念都更貼近年輕人思想，被譽為「貼地」。反觀TVB，繼續沿用舊時爆紅的理念去創作節目，就連曾志偉都要再再再次重啟《獎門人》，好聽啲講句叫「經典」，難聽啲就叫「炒冷飯」。而TVB不時都爆出疑抄襲疑雲，就好似最近上映的《超能使者》，明顯是同外國的超能力背景相同，就連能力都要抄到足！