TVB招聘吸引逾700人應徵！ 曾志偉：係最好入行時候、係電視里程碑

撰文：Andy｜圖片：TVB｜編輯：海月

TVB招聘吸引逾700人應徵

TVB舉行《2021藝員及電視製作人員訓練班面試》，早前TVB罕有地高調想媒體公布共有逾2千人應徵幕後工作人員。而面試當日現場大約有700人到場應徵。

曾志偉、曾勵珍及樂易玲等高層均到場向應聘者大派「雞湯」。恰逢曾志偉68歲生日，佢有感而發向700幾個應聘者發表講話。

曾志偉呼籲大家向佢學習 後生仔好好吸取經驗

曾志偉稱大家可以學佢咁，由幕後做起。佢憶述自己由龍虎武師做起，一步步向上爬。後來做埋編劇、副導演、導演，最後成為一個演員。佢循例地鼓勵在場嘅後生仔要「接受不同挑戰」和「多多吸取經驗」。

曾志偉意外咁多人應徵 稱現時為入行最好時機

曾志偉透露自己對於咁多人應徵確實感到意外，佢又指宜家就係入行最好嘅時機。曾志偉分析指，宜家係電視業嘅里程碑時刻；打呢份工除咗為興趣，仲要:「將社會資訊、娛樂，傳遞俾大家。」

不過，小編唔明白里程碑喺邊？將社會資訊、娛樂傳遞俾大家唔係電視廣播業基本功能嗎？

其他高層都對應徵者大派雞湯 寄望大家努力為TVB工作

在場嘅另一位高層曾勵珍亦提醒有意入行者，無論喺TVB做邊個崗位，都要「努力」、「專注」和「堅持」。

好多市民認為香港有機會再一次進入兩台爭霸嘅年代，不過曾勵珍就唔認同。強調今次招聘係TVB常規請人，並稱TVB全年都請人，唔係用來應付所謂嘅「電視大戰」。不過佢都坦承，今次招聘較為大型。

係唔係常規招聘小編就唔知啦，不過TVB今次招聘會的確係罕有地發稿邀請傳媒到場。至於係唔係用來同Viu TV打仗就見仁見智啦。