MIRROR演唱會丨王貽興千字文疑鬧爆ViuTV:用人唯親,私相授受!

流行娛樂

廣告

MIRROR紅館演唱會昨日(28日)舉行第四場,早前已不斷爆出唔少意外,搞到鏡粉都非常擔心。後來回應粉絲訴求Mirror 12子許多空中表演,改到平台進行。可非常不幸的是昨晚仍然出現大型意外,演唱會期間成個Screen從天而降,有兩名Dancer受傷送院隨即演唱會腰斬,其中一位為女團collar soching男朋友阿mo,目前仍在深切治療部留醫,情況嚴重。事後不少藝人有對此事件發聲,曾參與ViuTV節目導演、編審製作的王貽興今日(29日)於社交平台千字文發聲,爆ViuTV內幕,更強調事件荒謬,衰過大台!

mirror演唱會 王貽興
(圖片來源:ig@ongyihing)

王貽興暗指ViuTV比TVB更差賺到盡!

王貽興指佢呢幾年嚟一直沉默不作聲,但眼見今次嚴重事故終於忍唔住要同大家講出背後實情。王貽興疑暗指當時ViuTV初成立時確實與TVB不同,老闆亦有火,可惜愈來愈好時結果同樣變成第2個大台「一樣用人唯親,一樣度縮慳皮,一樣私相授受,一樣賺到盡,罔顧演藝人員嘅安全同待遇」,運作模式及思維無甚分別,今次事件實屬荒謬,認為就算TVB不被人看好,亦不會縮減綵排時間,製作求其!希望提供一個安全健康合理嘅環境俾一班追夢的年輕人。

mirror演唱會 王貽興
(圖片來源:ig@ongyihing)

全文如下:

相信尋晚對好多香港人嚟講,都係好沉重、好不安嘅一晚🥲震驚係嚟自香港一直引以為傲嘅舞台製作同安全,一鋪清袋,而當中嘅風險,由開騷前Dancer嘅社交平台投訴,到開騷咁多日嚟各種驚險意外,就算作為觀眾,都睇得出好有問題,已經用盡各種方法向主辦單位反映,但除咗啲門面功夫之外,最後,騷都係照做,抱住僥倖心態,得過且過,然後,就係原本可以避免嘅更可怕意外,香港開埠以嚟從未發生過嘅可怕畫面,終於,響紅館發生,成為歷史畫面,成為香港人嘅共同傷口。

錢唔係咁賺,騷都唔應該咁做。唔識做就唔該搵返真正專業嘅人去做,而唔係急就章,用人唯親,私相授受,最後釀成今次不幸意外。

令我哋徹夜難眠、傷心痛心嘅真正原因,其實,係我哋咁辛苦先至搵到啲值得欣賞支持嘅對象,同投入嘅事物,但點解?點解連最基本嘅享受娛樂都得唔到,香港人,連睇場紅館騷,都擔驚受怕過以前睇果啲驚險籌款慈善騷,望住鏡仔行嚟行去唱歌跳舞,仲驚過以前睇楊盼盼高空踩鋼線,點解?點解觀眾要做埋主辦單位做唔到,或者做唔好嘅嘢?

呢件事,真心荒謬。

我知道咁講會令好多香港人覺得唔啱聽,但實情係,果間大家都認為好fresh,同大台好唔同嘅電視台,其實佢哋嘅運作模式同思維,根本就同大台冇分別。

又或者咁講,最初真係有心唔想一樣,亦都畀到我哋希望,但慢慢地,不幸地,由曾經同佢哋合作過嘅人,到街外人,都已經開始聞到果種大台味道,而且越成功,就越大台,點解?因為咁,先可以賺到盡,維持壟斷,永保江山。

呢個,就係香港一直以嚟嘅成功方程式。

呢幾年嚟,我哋都好唔開心,好迷失,好窒息,並且將太多情感投射咗響果間電視台上面,正如我哋曾經將同樣嘅感情,痴心錯付咗響果位叱咤女歌手身上。

有啲嘢呢幾年嚟我一直沉默冇出過聲,但當關乎人命,我都有啲嘢需要畀大家知道返。由最初合作,感受到老闆有心有火,佢哋好想做啲與別不同嘅嘢,到後嚟社會事件,然後公司大咗,搵多咗啲人返嚟話事,一朝天子一朝臣,以至一啲離開咗果度嘅簽約藝人,佢哋嘅遭遇,被fade out 或者被雪藏,甚至某啲部門嘅對外態度,都描述緊一個好清晰嘅劇本畀我哋知,我哋,其實係響冇得揀嘅情況下,又或者太一廂情願嘅想像下,餵飼緊一隻,長大咗同大台其實冇分別嘅畸型怪物。一樣用人唯親,一樣度縮慳皮,一樣私相授受,一樣賺到盡,罔顧演藝人員嘅安全同待遇,當能力越大,就越係順我者昌,逆我者亡,到時,我哋只能嚟多次林X汶2.0,再次響失望中受傷沉淪,然後,同最初一樣,響以為有得揀嘅情況下,支持下一個以為與別不同嘅新電視台/歌手/組合,然後一次又一次失望輪迴……

衰啲講句,大台咁垃圾咁hea,但咁多年嚟,就算當年涉嫌中飽私囊嘅商場騷,搞騷都冇慳皮到會縮減綵排時間、製作求其、亂咁外判,最後有呢啲大型意外發生……

今次呢件不幸意外,或者係一吓好un 耳嘅喪鐘,提醒我哋,如果繼續咁樣盲目支持果間電視台,其實係支持緊佢哋繼續用呢種模式去擴大,去發展,去榨乾榨盡旗下藝人,用最低成本,將藝人用最短視最慳皮嘅方式消費淨盡,佢哋係咪捱殘,情緒有冇問題,係咪身心疲累,仲會唔會再一次當眾暈低,無論係咪佢哋嘅粉絲,都冇人想再見到呢啲咁令人心痛心酸嘅情況發生。

越係喜愛呢一班年輕人,我哋就越應該提供一個安全健康同合理嘅環境,畀佢哋繼續發光發熱,展現才華,至少,唔需要響表演過程擔驚受怕。

又或者我哋又係時候問一問,其實……公司同佢哋簽嘅合約,真正有幾多係落佢哋袋?會唔會最後得個做字,肥嘅都只係呢間是但求其,罔顧人命嘅公司?

我知道我以上呢番說話,可能會得罪好多人,但既然響當年大台如日中天,當大家仲係好鍾意大台嘅十幾年前,我明知講咗出嚟會冇嘢撈,唔啱聽,畀人誤解扭曲,都仲係夠膽死第一個企出嚟鬧爆果間電視台,到今時今日,呢間電視台將會好大機會步大台後塵,我又點可能當冇件事唔出聲?

香港人,值得擁有更好嘅電視台;香港嘅演藝人員,亦值得擁有更好嘅平台。

至少,唔係罔顧安全、只求賺盡,將香港人當水魚嘅明日大台。

圖片來源:ig@ongyihing