Kenny以養貓為名直播呃網民課金?3大瘋狂行為被大鬧:放過隻貓啦!
Kenny直播養貓餵食蕉魚豬扒
YouTuber Kenny養貓,直播拍片「Kenny養貓日記Day 1」直播一開始就俾「Hely老母」鬧佢自己都搞唔掂竟學人養貓,唔少網民都有留言質疑問佢到底會唔會照顧貓貓一世,不過Kenny未有回應只顧食蕉,然後仲隨即餵蕉俾隻貓貓食,不過貓貓就唔食,然後Hely老母不斷提議餵唔同嘢俾貓貓食如魚、咸蛋黃、豬扒等,不過貓貓都係唔食,Kenny仲夾硬捉住貓貓想餵佢食。
基本用品乜都未有 Hely老母警告Kenny會棄養!
期間Hely老母不斷問Kenny貓貓會唔會周圍小便,仲揚言如果會的話就要棄養,然後Kenny開始用指甲鉗幫貓貓剪指甲。網民對於Kenny對貓貓剪指甲不斷叫Kenny收手,事關貓貓剪指甲唔應該用人類的指甲鉗而且如果唔識剪好容易傷到隻貓,不過Kenny未有理會。
Kenny咩都未準備好就養貓 叫網民課金先餵食
網民問到Kenny準備好貓貓的基本用品未時,例如貓砂、裝貓窗網、貓糧等,Kenny就話佢淘咗貓砂,但未到,要過2日先到。裝貓窗網方面Kenny就話佢哋屋企唔會開窗,但後來又話昨日半夜突然開窗,嚇到佢勁驚隻貓會跳出去。
隻貓唔肯食嘢佢就話「佢咁肥點會餓死」聲稱自己昨日已餵過隻貓,但被老母督爆講大話只係有飲水。Kenny又話「你哋唔課金邊有錢買嘢俾佢食」不過佢後來又補充原來佢淘寶已買十斤貓糧。
Kenny介紹貓貓已經十幾歲,俾人拋棄然後佢接手,話佢好聽話好乖好痴人。有網民鬧佢話佢對貓貓唔好,Kenny就否認,強調佢係善待貓貓,會負責,仲大返啲網民叫佢哋咪舉報囉,佢不如幾想上新聞,咁就可以爆紅。
Kenny養貓日記day 2 表示自己買咗貓砂
Kenny一開場就話自己買咗貓砂同罐罐,貓貓全日未有食嘢直到Kenny返屋企為止,然後Kenny就開罐罐俾貓貓食,貓貓終於有進食同埋有便便痾,Kenny仲話驚啲貓糧有味精會沖咗水先俾貓貓食!而網民問Kenny會唔會帶貓貓睇醫生,Kenny表示自己會帶貓貓去,仲已先咗去問獸醫貓貓情況咁樣要唔要睇醫生,同埋Kenny解釋因為昨日第一日接貓貓返嚟屋企所以先乜都無。
一齊睇片:
網民:最怕癲佬突然有愛心
唔少網民狂鬧Kenny,好驚Kenny對隻貓唔好,叫佢放過隻貓!「放生隻貓啦」「愛謢動物協會舉報!」「佢老母仲正常過佢」「貓貓諗要搵一日逃離呢個地方」「貓貓唔郁好x大鑊」「都幾肯定佢冇裝貓網,不過都唔知叫唔叫好彩,隻貓已經冇力,淨係趴喺度」「真係有人課金佢去買糧」「隻貓變左課金密碼」
網民驚恐虛弱的貓貓已捱唔住過咗世
其後有網民發現Kenny養貓日記去到第3日之後就無再更新過,IG都無再po出貓貓的照片,網民留言問貓貓的事,Kenny都罕有del晒,仲封埋留言唔俾人睇!唔少網民極度懷疑本來虛弱的貓貓已捱唔住過咗世,希望Kenny可以澄清交代貓貓近況。