JPEX案｜陳怡連環拍片回應素顏事件：覺得好正常 網民：講嘢仲係咁搶口！

JPEX案｜陳怡一出返嚟就拍片真係好似電影情節

陳怡一出返嚟之後就喺youtube預告會出片「老娘回來了！！今晚出片同大家講吓被羈留的一天」今日20日喺youtube發布咗一條叫「我在拘留所的一天，保釋金100萬」影片，片中陳怡似乎心情都唔差，大講到佢喺拘留所的所見所聞，食物就麻麻地，就入面好靜，瞓覺都唔會俾人嘈醒，仲話瞓得幾好，形容好多位都真係好似電影情節。陳怡仲講笑指拎咗佢好多手袋，令個記召睇落好似海關檢獲咗大量「走私水貨咁」。

JPEX案｜陳怡回應素顏：睇返啲相覺得好正常

陳怡仲回應咗佢「素顏被捕」一事，指因為佢一早知要入拘留所所以佢只會著長衫長褲舒服的衫，唔會化妝打扮，結果就被大家大做文章，認為做女人真係好慘，同埋又指如果自己真係大家所講咁「肉酸」「大份」，早前3月的見面會已經比人笑死啦。自言睇返啲相覺得好正常，因為著咗冷衫，同埋無理由呢個時候仲騷大長腿。

JPEX案｜JPEX無大家想像中咁件事

陳怡有講返叫大家唔駛咁擔心，其實無大家想像中咁大件事，啲警察都係公事公辦，佢都只係配合調查，同埋如果真係咁大件事，佢唔可能咁快可以保釋到出嚟，要坐到上庭為止，唔可以咁樣拍片。

一齊睇片：

JPEX案｜陳怡深夜再拍片：人最慘無錢又唔出名

陳怡深夜再拍片，標題為「天下熙攘，皆為利往，本來就是叢林社會，非要裝什麼文明」內容講到佢知道最近好多人評論佢，但佢只覺得今次的事真係好小兒科，反過來安慰粉絲，指自己而家比起2019年時真係無乜事，認為人最慘無錢又唔出名，咁樣就係會俾人恰，但而家的自己又有錢又出名，仲有咩咁慘咁難！對於陳怡的新片，唔少網民睇完都覺得陳怡心理質素真係十分強勁「到而家仲咁搶口」「安慰定串緊人」「林作都識收」「高調唔係好事喎，林作而家都收口啦」「個filter好堅下」「又開美顏」

大家又點睇？